ಕರ್ನಾಟಕ ಕಾಂಗ್ರೆಸ್ ಅಧಿಕಾರ ಪಟ್ಟೊನುನ ಇರ್ಗಂಟ್‌ಗ್ ಕಡೇಕ್ಲಾ ಪಿರಿಕಟ್ಟ್??: ಎಲ್ಲೆ ಸಿಎಂ ಸ್ಥಾನೊಗು ಸಿದ್ದರಾಮಯ್ಯೆರ್ ರಾಜೀನಾಮೆ ಸಾಧ್ಯತೆ?

Last updated on May 27th, 2026 at 10:49 am

ಬೆಂಗಳೂರ್, ಮೇ 27: ಕರ್ನಾಟಕ ಕಾಂಗ್ರೆಸ್‌ಡ್ (Congress) ಕರಿನ ಕೆಲ ದಿನೊರ್ದು ಬಾರೀ ತಾರಕೊಗು ಏರ್ದಿತ್ತಿನ ಮುಖ್ಯಮಂತ್ರಿ ಪಗಪುನ ಕೊಲಲೊಗು ಕಡೆಕ್ಲಾ ದೆಲ್ಲಿ ದರ್ಬಾರ್‌‌ಡ್ ಪರದೆ ಬೂರ್ದಿ ಲೆಕ ತೋಜೊಂದುಂಡು. ರಾಷ್ಟ್ರ ರಾಜಧಾನಿಡ್ ಎಐಸಿಸಿ ಕಚೇರಿಡ್ ನಡತಿನ 7 ಗಂಟೆದ ಮ್ಯಾರಥಾನ್ ಇನಯ ಬೊಕ್ಕ ರಾಹುಲ್ ಗಾಂಧಿ ನ (Rahul Gandhi)  ಒಟ್ಟುದ ಮಹತ್ವೊದ ‘ಒನ್-ಟು-ಒನ್’ ರಹಸ್ಯ ಚರ್ಚೆರ್ದ್ ಬೊಕ್ಕ, ಮುಖ್ಯಮಂತ್ರಿ ಸಿದ್ದರಾಮಯ್ಯೆರ್ ಸಿಎಂ ಸ್ಥಾನ ಬುಡ್ದು ಕೊರ್ರೆ ಒತ್ತೊಂದೆರ್ ಪನ್ದ್ ಉನ್ನತ ಮೂಲೊಲೆರ್ದ್ ತೆರಿದ್‌ ಬೈದ್ಂಡ್. ಇಂದೆಕ್ ದುಂಬು ಮಲ್ತಿತ್ತಿನ ಆಂತರಿಕ ‘ಅಧಿಕಾರ ಹಂಚಿಕೆ ಸೂತ್ರ’ದ (Power Sharing Formula) ಪ್ರಕಾರೊನೇ ಸಿಎಂ ಸಿದ್ದರಾಮಯ್ಯೆರ್ ಎಲ್ಲೆ (ಗುರುವಾರ) ಮುಖ್ಯಮಂತ್ರಿ ಸ್ಥಾನೊಗು ಅಧಿಕೃತವಾದ್ ರಾಜೀನಾಮೆ ಕೊರ್ಪುನ ಸಾಧ್ಯತೆ ತೋಜೊಂದುಂಡು. ಅವೆತ ಒಟ್ಟುಗು ರಾಜ್ಯ ರಾಜಕಾರಣೊಡು ಕುಡೊಂಜಿ ಪೊಸ ನಾಯಕತ್ವೊದ ಅಧ್ಯಾಯ ಸುರು ಆಪಿನ ಲಕ್ಷಣೊಲು ತೋಜೊಂದುಲ್ಲ.

ಹೈಕಮಾಂಡ್ ಇನಯೊಡು ದಾದ ಮಾತಾ ಚರ್ಚೆ ಆಂಡ್? ಸಿದ್ದರಾಮಯ್ಯೆರೆಗ್ ಕೊರ್ತಿನ ಆಫರ್ ದಾದ ಮಾತ?
ಅಂಗಾರೆ ದೆಲ್ಲಿಡ್ ನಡತಿನ ಹೈಕಮಾಂಡ್ ಇನಯ ಬಾರೀ  ಸೋದ್ಯ ಉಂಡು ಮಲ್ತಿತ್ತ್ಂಡ್. ಎಐಸಿಸಿ ಅಧ್ಯಕ್ಷೆ ಮಲ್ಲಿಕಾರ್ಜುನ ಖರ್ಗೆ, ರಾಹುಲ್ ಗಾಂಧಿ, ಕೆ.ಸಿ. ವೇಣುಗೋಪಾಲ್ ಬೊಕ್ಕ ರಣದೀಪ್ ಸಿಂಗ್ ಸುರ್ಜೇವಾಲ ಮೊಕುಲು ಸಿಎಂ ಸಿದ್ದರಾಮಯ್ಯೆ ಬೊಕ್ಕ ಡಿಸಿಎಂ ಡಿ.ಕೆ. ಶಿವಕುಮಾರ್‌ರೆನ ಒಟ್ಟುಗು ಬಾರೀ ಉದ್ದೊಗು ಇನಯ ಮಲ್ತ್‌ದೆರ್. ಮೂಲೊಲೆನ ಪ್ರಕಾರ, ರಾಹುಲ್ ಗಾಂಧಿ ಸಿದ್ದರಾಮಯ್ಯೆರೆಡ ಮಲ್ತಿನ ಬೇತೆನೇ ಸಭೆಟ್ ಪಕ್ಷೊದ ಹಿತದೃಷ್ಟಿ ಬೊಕ್ಕ ನನದ ಚುನಾವಣೆಲೆನ್ ಕಾದೆರ ನಾಯಕತ್ವ ಪಗಪುನ ಅನಿವಾರ್ಯ ಪನ್ದ್ ಮನವರಿಕೆ ಮಲ್ತ್‌ಕೊರ್ತೆರ್‌ಗೆ. ಈ ಪೊರ್ತುಡು ಸಿದ್ದರಾಮಯ್ಯೆರೆಗ್ ರಾಷ್ಟ್ರ ರಾಜಕಾರಣೊಗು ಬರ್ಯೆರ ರಾಜ್ಯಸಭಾ ಸ್ಥಾನೊದ ಆಫರ್ ಬೊಕ್ಕ ಆರೆನ ಮಗೆ ಡಾ. ಯತೀಂದ್ರ ಸಿದ್ದರಾಮಯ್ಯಗ್ ಪೊಸತಾದ್ ಉಂಡಾಪುನ ಸಂಪುಟೊಡು ಉಪಮುಖ್ಯಮಂತ್ರಿ ಪಟ್ಟ ಕೊರ್ಪುನ ಆಫರ್‌ಲಾ ಹೈಕಮಾಂಡ್ ದುಂಬು ದಿತ್ಂಡ್‌ಗೆ.

ಆಪ್ತೆರೆ ಒತ್ತಮೆ ಬೊಕ್ಕ ಸಿಎಂ:
ದೆಲ್ಲಿ ಸಭೆ ಮುಗಿನನೇ ಸಿಎಂ ಸಿದ್ದರಾಮಯ್ಯೆ ದೆಲ್ಲಿಡ್ ಆಪ್ತ ಸಚಿವೆರಾಯಿನ ಡಾ. ಜಿ. ಪರಮೇಶ್ವರ್, ಕೆ.ಜೆ. ಜಾರ್ಜ್, ಎಂ.ಬಿ. ಪಾಟೀಲ್ ಬೊಕ್ಕ ಭೈರತಿ ಸುರೇಶ್ ಮೊಕಲೆನ ಒಟ್ಟುಗು ತುರ್ತು ಇನಯ ಮಲ್ತ್‌ದ್ ಹೈಕಮಾಂಡ್ ನಿರ್ಧಾರೊನು ಪಟ್ಟೊಂದೆರ್. ಈ ಪೊರ್ತುಡು ಆಪ್ತ ಸಚಿವೆರ್, ‘ಒವ್ವೇ ನೆವನೊಗು ಈರ್ ರಾಜೀನಾಮೆ ಕೊರೊರ್ಚಿ, ಈರೆನ ಪರವಾದ್ ಎಂಕ್ಲನೇ ಹೈಕಮಾಂಡ್‌ದ ಒಟ್ಟುಗು ಕುಡೊರ ಪಾತೆರುವ’ ಪನ್ದ್ ಪನ್ತೆರ್‌ಗೆ. ಆಂಡ ಸಚಿವೆರೆ ಬಿನ್ನಪುಗು ಸಿದ್ದರಾಮಯ್ಯೆರ್, ‘ರಾಹುಲ್ ಗಾಂಧಿನ ಪಾತೆರೊನು ನಿರಾಕರಿಪೆರ ಎನರ್ದ್ ಸಾಧ್ಯ ಇಜ್ಜಿ. ಕೊರ್ತಿನ ಪಾತೆರೊದ ಲೆಕ ಯಾನ್ ಸಿಎಂ ಸ್ಥಾನೊಗು ರಾಜೀನಾಮೆ ಕೊರ್ಯೆರ ರೆಡಿ ಉಲ್ಲೆ’ ಪನ್ದ್ ಪನ್ತೆರ್ ಪನ್ದ್ ಟಿವಿ9 ಕನ್ನಡ ವರದಿ ಮಲ್ತ್‌ದ್ಂಡ್.

ಅಂಗಾರೆ ರಾತ್ರೆನೇ ಸಿಎಂ ಸಿದ್ದರಾಮಯ್ಯೆ ಸಚಿವೆರಾಯಿನ ಜಮೀರ್ ಅಹ್ಮದ್ ಖಾನ್, ಹೆಚ್.ಸಿ. ಮಹದೇವಪ್ಪೆ, ಕೃಷ್ಣಬೈರೇಗೌಡೆ ಬೊಕ್ಕ ಕಾನೂನು ಸಲಹೆಗಾರೆ ಎ.ಎಸ್. ಪೊನ್ನಣ್ಣೆ ಮೊಕಲೆನ ಒಟ್ಟುಗು ಬೆಂಗಳೂರ್‌ದ ಹೆಚ್‌ಎಎಲ್ (HAL) ವಿಮಾನ ಉಂತಡೆಗ್ ಬತ್ತ್‌ದ್ ಎತ್ತ್‌ದೆರ್. ಇನಿ ಮುಖ್ಯಮಂತ್ರಿಲು ಮಹಾತ್ಮಾ ಗಾಂಧಿ ಬೊಕ್ಕ ಜವಾಹರಲಾಲ್ ನೆಹರೂನ ಪುಣ್ಯಸ್ಮರಣೆ ಕಾರ್ಯಕ್ರಮೊಡು ಪಾಲ್‌ಪಡೆಯೆರೆ ಇತ್ತ್‌ದ್, ಬೊಕ್ಕ ಮಹತ್ವೊದ ಸುದ್ದಿಗೋಷ್ಠಿ ಮಲ್ತ್‌ದ್ ಆರೆನ ರಾಜೀನಾಮೆದ ಅಧಿಕೃತ ನಿರ್ಧಾರ ಪ್ರಕಟ ಮಲ್ಪುನ ಸಾಧ್ಯತೆ ಉಂಡು.