Last updated on May 2nd, 2026 at 08:02 pm
ತುಮಕೂರು, ಮೇ 02: ಕುಣಿಗಲ್ ತಾಲೂಕ್ದ ಆಲ್ಕೆರೆ ಗ್ರಾಮೊಡು ಕೌಟುಂಬಿಕ ಕೊಲಲೊಗು ಇರ್ವೆರ್ ಜೋಕುಲೆನ್ ಕೆರ್ದ್ ಅಮ್ಮೆ ಆತ್ಮಹತ್ಯೆ ಮಲ್ತೊಂದಿನ ಪ್ರಕರಣೊಗು ಸ್ಫೋಟಕ ಟ್ವಿಸ್ಟ್ ತಿಕ್ಕ್ದ್ಂಡ್. ಬಂಗಾರ್, ಕಾಸ್ ಲಕ್ಕಾದ್ ಬೊಡೆದಿ ಬೇತೆ ಒರಿಯನ ಒಟ್ಟುಗು ಬಲ್ತ್ ಪೋತಿನೆಕ್ ಬೆಸರ್ಡ್ ಶಿವಣ್ಣೆ ಪನ್ಪಿನಾಯೆ ತನ್ನ ಇರ್ವೆರ್ ಜೋಕುಲೆನ್ ದಮ್ಮುಕಟ್ಟಾದ್ ಕೆರ್ದ್ ಬೊಕ್ಕ ತಾನ್ಲಾ ಬಲ್ಲ್ ಪಾಡೊಂದೆ. ಆಂಡ ಶಿವಣ್ಣನ ಬೊಡೆದಿ ಕಾವ್ಯಾ ಬಲ್ತ್ದಿನ ಆಯನ ಪಲಿನ ಮಗೆ ಹೇಮಂತ್ ಪನ್ಪಿನಾಯನ ಒಟ್ಟುಗು ಪನ್ಪಿ ವಿಷಯ ಇತ್ತೆ ಪಿದಯಿ ಬೈದ್ಂಡ್.
ಪಲಿ ತೀರಿಬೊಕ್ಕ ಆಲೆನ ಮಗೆ ಹೇಮಂತ್ನ್ ತನ್ನ ಇಲ್ಲಗೇ ಲೆತಬತ್ತ್ದ್ ಶಿವಣ್ಣೆ ಸಾಂಕೊಂದಿತ್ತೆ. ಆಂಡ ಈ ಹೇಮಂತ್ ಸಮ್ಮಲೆನ ಬೆರಿಕೇ ಬೀಸತ್ತಿ ಪಾಡ್ದಿತ್ತ್ದ್, ಆಯನ ಬೊಡೆದಿ ಪನ್ಡ ಮಾಮಿ ಕಾವ್ಯಾ ಡ ಅಕ್ರಮ ಸಂಬಂಧ ದೀವೊಂದೆ. ಈ ವಿಚಾರ ತೆರಿದ್ ಆಯನ್ ಶಿವಣ್ಣೆ ಇಲ್ಲರ್ದ್ ಪಿದಯಿ ಪಿಡ್ದಿತ್ತೆ. ಅವೆರ್ದ್ ಬೊಕ್ಕ ಒರ ವಿಷ ಪರ್ದ್ ಸೈಯ್ಯೆರಲಾ ತೂದಿತ್ತೆ. ಆ ಪೊರ್ತುಡು ಊರುದಕುಲು ಪಂಚಾದಿಗೆ ಮಲ್ತ್ದ್ ಕಂಡನಿಬೊಡೆದಿಗ್ ಎಡ್ಡೆಡ್ ಇತ್ತೊನರೆ ಬುದ್ದಿ ಪನ್ದಿತ್ತೆರ್. ಬೊಕ್ಕ ಕೆಲ ತಿಂಗೊಲು ಕಂಡನಿಬೊಡೆದಿ ಎಡ್ಡೆಡೇ ಇತ್ತೆರ್. ಆಂಡ ಕರಿನ ಒಂಜಿ ವಾರೊಗು ದುಂಬು ಕಂಡನೆ ಶಿವಣ್ಣೆ ಬೊಕ್ಕ ಜೋಕುಲೆನ್ ಬುಡ್ದು ಹೇಮಂತ್ನ ಒಟ್ಟುಗು ಕಾವ್ಯಾ ಬಲಿತ್ ಪೋತಲ್. ಈ ಬಗೆಟ್ ಕುಣಿಗಲ್ ಪೊಲೀಸ್ ಸ್ಟೇಶನ್ಡ್ ಶಿವಣ್ಣೆ ಒಯಿಲ್ ಬರೆಪಾದಿತ್ತ್ದ್, ಕುಡೊರ ಇಂಚ ಮಲ್ಪುಜಿ ಪನ್ದ್ ಸ್ಟೇಶನ್ಡೇ ಮಾಪು ನಟ್ಟ್ದ್ ಕಂಡನ್ಯನ ಇಲ್ಲಗ್ ಪಿರ ಬೈದಿತ್ತಲ್ಗೆ.
ಕುಡ ಕಂಡನ್ಯನ ಇಲ್ಲಗ್ ಬತ್ತಿನ ಮನದಾನಿಯೇ ಶಿವಣ್ಣೆ ಬೇಲೆಗ್ ಪಿದಯಿ ಪೋದಿತ್ತಿನ ಪೊರ್ತುಡು ಇಲ್ಲಡ್ ಇತ್ತಿನ ಲಕ್ಷಗಟ್ಲೆ ರೂಪಾಯಿದ ಪದ್ದೈ ಬಂಗಾರ್ ಬೊಕ್ಕ ಇಲ್ಲಡ್ ಇತ್ತಿನ ಕಾಸ್ನ್ ಪತೊಂದು ಬಲಿತ್ದಲ್. ಉಂದೆರ್ದಾವರ ಬೆಸರ್ಡ್ ಶಿವಣ್ಣೆ, ಕೋಡೆ ರಾತ್ರೆ ತನ್ನ ಇಲ್ಲಡ್ ಜೋಕುಲೆನ್ ದಮ್ಮು ಕಟ್ಟಾದ್ ಕೆರ್ದ್ ಬೊಕ್ಕ ತಾನ್ಲಾ ಬಲ್ಲ್ ಪಾಡೊಂದು ಊವ ಗೆತ್ತೊಂದೆ. ಕಾಂಡೆ ನಿರೆಕರೆತಕುಲು ತೂನಗ ಈ ಬಗೆಟ್ ತೆರಿದ್ ಬೈದಿತ್ತ್ದ್, ಕುಣಿಗಲ್ ಪೊಲೀಸೆರ್ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.