Last updated on June 29th, 2026 at 12:40 pm
ಕುಲಾಲ ಶ್ರೀ ಸಾಹಿತ್ಯ ಕಲಾ ಸಂಪದ ಕುಡ್ಲದ ಶ್ರೀ ಮಹೇಶ್ ಕುಲಾಲ್ ಅರ್ತಿಮೂಲೆ ಮೆರೆನ ಮುತಾಲಿಕೆಡ್, ‘ತುಲುನಾಡ ಮೂಲ್ಯ -ಕುಲಾಲೆರ್ನ ಅಳಿಯ ಸಂತಾನ ಕಟ್ಟ್ದ ಅಳಿದ್ ಪೋಪುನ ಮೂಲ ಕಟ್ಟ್ -ಕಟ್ಟಳೆದ ತುಲಿಪು ಕಾರ್ತೆಲ್ ಪದಿಮೂಜಿ ಪೋಪುನ ಐತಾರ(ಜೂನ್ 28 ತಾನಿ) ಕಾಸರಗೋಡು ಜಿಲ್ಲಾ ಕುಲಾಲ ಸಂಘ (ರಿ), ಮಂಜೇಶ್ವರದ ಒತ್ತು ಸೇರಿಗೆ ಡ್ ಜಿಲ್ಲಾ ಕುಲಾಲ ಸಮುದಾಯ ಭವನ, ತೂಮಿನಾಡ್ ಡ್, ಸಂಘೊದ ಗುರ್ಕಾರ್ಲು ಶ್ರೀಯುತ ರವೀಂದ್ರ ಮುನ್ನಿಪ್ಪಾಡಿ ಮೆರೆನ ಗುರ್ಕರ್ಮೆಡ್ ನಡತ್ಂಡ್.
ಈ ಲೇಸ್ನ್ ಶ್ರೀಯುತ ಬಾಲಕೃಷ್ಣ ದೀಕ್ಷಾ ತುಡರ್ ಅರ್ಲಾದ್ ಉದಿಪನ ಮಂತೆರ್. ಅತ್ತಂದೆ ಕುಲಾಲ ಸಮಾಜದ ಮಾನಾದಿಗೆದ ಬಿನ್ನೆರ್ನಕುಲು ಜತೆ ಕೊರ್ಯೆರ್.
ಕುಲಾಲ ಮೂಲ್ಯೆರೆಡ ಪಿರಾಕ್ರ್ದ್ ನಡತೊಂದು ಬೈದಿನ ಅಳಿಯ ಸಂತಾನದ ಕಟ್ಟ್ -ಕಟ್ಟಳೆ ಅವು ಇತ್ತೆದ ಆಧುನೀಕರಣದ ಒಯ್ಲ್ಗ್ ತಿಕ್ಕ್ದ್ ಅಳಿದ್ ಪೋವೊಂದುಪ್ಪುನಗ ಅಯಿನ್ ದಾಖಲೀಕರಣ ಮಂತ್ದ್ ಒರಿಪುನ ಅಗತ್ಯ ಉಂಡು.ಅಂಚಿನ ಬೇಲೆಗ್ ಜಯಿದಿನ ಶ್ರೀ ಮಹೇಶ್ ಅರ್ತಿಮೂಲೆ ಅರೆನ ಬೇಲೆಗ್ ಸಮಾಜ ಬಾಂಧವೆರ್ ಬೆರಿತಾಂಗ್ ಕೊರೊಡು, ಪಂಡ್ದ್ ಬತ್ತಿ ಬಿನ್ನೆರ್ ಪಂಡೆರ್. ಈ ಪೊರ್ತುಡು ತುಲುನಾಡೊರ್ಮೆ ಇತ್ತಿನ ಮೂಲ್ಯೆರೆನ ಗುತ್ತು, ಗತ್ತ್ದ ಪೊಲಬು ಕೊರ್ಪುನ ತುಳುನಾಡ ಮೂಲ್ಯೆರ್ ಪನ್ಪುನ ಮಹಾ ಸಂಪುಟ ಮಂತೊಂದುಪ್ಪುನ ಶ್ರೀ ಮಹೇಶ್ ಅರ್ತಿಮೂಲೆ ಬೊಕ ರೆಡ್ ಕ್ರಾಸ್ ಸಂಸ್ಥೆರ್ದ್ ಅತೀಮೀರ ನೆತ್ತೆರ್ ದಾನ ಮಂತಿನಕ್ಲೆಗ್ ತಿಕ್ಕುನ ಮಾನಾದಿಗೆ ಪಡೆಯೊನಿನ ಶ್ರೀ ಸುಧೀರ್ ರಂಜನ್ ದೈಗೋಳಿ ಮೆರೆಗ್ಲಾ ಸಂಘದ ಪರವಾದ್ ಸಮ್ಮನ ಪಾಡಿಯೆರ್.
ಅಯಿರ್ದ್ ಬೊಕ್ಕ ನಡತಿನ ತುಲಿಪುಡು ಕುಲಾಲ ಸಮಾಜದ ಪೆರಿಯ, ಕಿರಿಯ ಬಂಧುಲು ಕುಲಾಲ ಮೂಲ್ಯೆರೆನ ಅಳಿಯ ಸಂತಾನ ದ ಕಟ್ಟ್ ಕಟ್ಟಳೆದ ಬಗೆಟ್ ಪುಟ್ಟುರ್ದು ಸಾವುಮುಟ್ಟದ ಅಚೆರಿಪುದ ಅನುಭವಲೆನ್ ಪಟ್ಟೊಂಡೆರ್. ಅಂಚೆನೆ ಅಯಿತ ದಾಖಲೀಕರಣಲಾ ನಡತ್ಂಡ್.
ಈ ಲೇಸ್ ಕು.ರಶ್ಮಿತಾ ಬೊಕ ಕೂಟದಕ್ಲೆನ ದೇವೆರೆ ಸುಗಿಪುದೊಟ್ಟಿಗೆ ಸುರುವಾಂಡ್, ಶ್ರೀ ಮಹೇಶ್ ಅರ್ತಿಮೂಲೆ ಬತ್ತಿ ಬಿನ್ನೆರೆನ್ ಎದ್ಕೊಂಡೆರ್, ಶ್ರೀ ಸುಧೀರ್ ರಂಜನ್ ಸೊಲ್ಮೆ ಸಂದೈತ ಮಂತೆರ್, ಶ್ರೀ ರವೀಂದ್ರ ವರ್ಕಾಡಿ ಸುದಾರಿಕೆ ಮಂತೆರ್, ಕಾಸರಗೋಡು ಕುಲಾಲ ಸಂಘೊದ ಪದುಕೆರ್ ಸಹಾಯಮಂತೆರ್. ಕಾಂಡೆದ ಫಲಾರ, ಮಧ್ಯಾಹ್ನದ ಒನಸ್, ಬಯ್ಯದ ಚಾ ತೆನಸ್ದೊಟ್ಟಿಗೆ ತುಲಿಪು ಮಂಜೇಶ್ವರಡ್ ತೊಡಗ್ದ್ ದುಂಬಗ್ ಜುಲಾಯಿ 26 ಕ್ ಬಿ.ಸಿ.ರೋಡ್ ಕುಲಾಲ ಭವನ ಪೊಸಳ್ಳಿ, ಅಗಸ್ಟ್ 30 ಗ್ ಪೆರ್ಡೂರು ಕುಲಾಲ ಭವನ ಪೆರ್ಡೂರುಡು ದುಂಬು ಪೋಪುಂಡುಂದುಲಾ, 04-11-2026 ಯಾನಿ ಕುಡ್ಲದ ಪುರಭವನ ಡ್ ತುಳುನಾಡ ಮೂಲ್ಯೆರ್ ಮಹಾ ಸಂಪುಟದ ಬುಡುಗಡೆ ನಡಪೆರುಂಡೂಂದು ತೆರಿಪಾಯೆರ್.