Last updated on June 30th, 2026 at 07:59 am
ಸುಳ್ಯ, ಜೂ. 30: ಸುಳ್ಯದ ಸರಕಾರಿ ಆಸ್ಪತ್ರೆದ ಬರಿತ ರಿಕ್ಷಾ ಉಂತಡೆದ ಎದುರುಡೆ ಆದ್ ಜೂನಿಯರ್ ಕಾಲೇಜ್ ಪೋಪುನ ಸಾದಿಡ್ ಕರೆಂಟ್ ಕುಂದೊಲೆನ್ ದೆಪ್ಪಂದೆ/ಬರಿಕ್ ಪಾಡಂದೆ ಕಾಂಕ್ರೀಟ್ ರೋಡ್ ಮಲ್ದಿನ ಬಗೆಟ್ ಸಾಮಾಜಿಕ ಬಲೆತ್ತಾನೊಡು ಪೋಟೋ ವೈರಲ್ ಆದಿತ್ತ್ದ್, ಕೋಡೆ ಅಡೆಗ್ ಶಾಸಕೆದಿ ಭಾಗೀರಥಿ ಮುರುಳ್ಯ ಮೇರ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್.
ರೋಡ್ ಕಾಂಕ್ರೀಟ್ ಪಾಡ್ನಗ ಕರೆಂಟ್ ಕುಂದೊಲೆನ್ ಸಾದಿದ ನಡುಟೇ ದೀವೊಂದು ಸುತ್ತಲಾ ಕಾಂಕ್ರೀಟ್ ಪಾಡ್ದೆರ್. ಉಂದೆರ್ದಾವರ ಈ ಸಾದಿಯೆ ಪೋಪುನಕ್ಲೆಗ್ಲಾ ಬಂಙ ಆತ್ಂಡ್. ಈ ಸಾದಿದ ಪೋಟೋ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆವೊಂದಿತ್ತಿಲೆಕನೆ ಸುಳ್ಯ ಶಾಸಕೆದಿ ಭಾಗೀರಥಿ ಮುರುಳ್ಯ ಮೇರ್ ರೋಡ್ ಬೊಕ್ಕ ಮೆಸ್ಕಾಂ ಅಧಿಕಾರಿಲೆನ್ ಲೆಪ್ಪುಡಾದ್ ಜಾಗೆದ ಪರಿಶೀಲನೆ ಮಲ್ತೆರ್. “ಕರೆಂಟ್ ಕುಂದೊಲೆನ್ ಶಿಫ್ಟ್ ಮಲ್ಪಂದೆ ಇಂಚ ಕಾಂಕ್ರೀಟ್ ರೋಡ್ ಮಲ್ದಿನವು ಬಾರೀ ಅಪಾಯಕಾರಿ ಬೊಕ್ಕ ಅವೈಜ್ಞಾನಿಕ. ಇತ್ತೆನೇ ಮೆಸ್ಕಾಂ ಬೊಕ್ಕ ಕಾಂಟ್ರಾಕ್ಟ್ದಕುಲು ಸಮನ್ವಯ ಮಲ್ತ್ದ್ ಸಾದಿದ ನಡುಟು ಇಪ್ಪುನ ಕುಂದೊಲೆನ್ ದೆಪ್ಪಾದ್ ಸುಗಮ ಸಂಚಾರೊಗು ವ್ಯವಸ್ಥೆ ಮಲ್ಪೊಡು” ಪನ್ದ್ ಸೂಚನೆ ಕೊರ್ತೆರ್.
ಈ ಪೊರ್ತುಡು ಪಾತೆರ್ನ ಆರ್ ಇಂದು ಸರಕಾರೊರ್ದು ಮಲ್ದಿನ ರೋಡ್ ಅತ್ತ್. ಇಂದು ಲೇಔಟ್ದಕುಲು ಖಾಸಗಿಯಾಗಿಯಾದ್ ಮಲ್ತೊಂದಿನ ರೋಡ್ ಆದಿತ್ತ್ದ್, ಸ್ಥಳೀಯ ಅಧಿಕಾರಿಲು ಬೊಕ್ಕ ಮೆಸ್ಕಾಂ ದಕುಲು ರೋಡ್ದ ಬೇಲೆ ಮಲ್ಪೆರೆ ಅನು ಕೊರ್ತಿಜೆರ್ ಪನ್ದ್ ತೆರಿದ್ ಬೈದ್ಂಡ್ ಪನ್ದ್ ಪನ್ಡೆರ್. ಆತೇ ಅತ್ತಂದೆ ಒವ್ವೇ ಅನುದಾಂತೆ ರೋಡ್ ಮಲ್ದಿನ ಲೇಔಟ್ ದನಿನ ಮಿತ್ತ್ ಕ್ರಮ ಗೆತೊನರೆ ಶಾಸಕೆದಿ ಸೂಚನೆ ಕೊರ್ತೆರ್.
ಈ ಪೊರ್ತುಡು ಮುಲ್ಪ ಸಮಗಟ್ಟ್ ಕನಿ ದಾಂತೆ ಬರ್ಸದ ಬೊಲ್ಲದ ನೀರ್ ಇಲ್ಲ ಜಾಲ್ಗ್, ಇಲ್ಲ್ಗ್ ಬರ್ಪುಂಡು ಪನ್ದ್ ನೆಟೆದಕುಲು ಶಾಸಕೆರೆಡ ಪನ್ಡೊನ್ದೆರ್. ಈ ಸಮಸ್ಯೆಗ್ಲಾ ಆಯಿನಾತ್ ಬೇಗ ಪಿರಿಕಟ್ಟ್ ಮಲ್ಪೆರೆ ಶಾಸಕೆರೆನ್ ಒತ್ತಾಯ ಮಲ್ತ್ದೆರ್.