Last updated on June 10th, 2026 at 04:52 pm
ಬೆಳ್ಳಾರೆ, ಜೂ. 10: ಐವರ್ನಾಡ್ದ ಜವನ್ದಿ ಒರ್ತಿಗ್ ಲೈಂಗಿಕ ಕಿರುಕುಳ ಕೊರ್ದು ಜಾತಿ ನಿಂದನೆ ಮಲ್ದಿನ ಆರೋಪಡ್ ಬೆಳ್ಳಾರೆದ ಚಿಕನ್ ಸೆಂಟರ್ದ ದನಿ ಪ್ರಸಾದ್ ಪನ್ಪಿನಾಯನ ಮಿತ್ತ್ ಬೆಳ್ಳಾರೆ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.
ಜವನ್ದಿ ಜೂನ್ 8ದಾನಿ ಬರೆಪಾದಿನ ಒಯಿಲ್ದ ಪ್ರಕಾರ, ಆರ್ ಬೆಳ್ಳಾರೆದ ಅಂಗಡಿ ಒಂಜೆಟ್ ಬೇಲೆ ಮಲ್ತೊಂದಿತ್ತ್ದ್, ಜೂನ್ 2 ತಾನಿ ಬೇಲೆ ಮುಗಿತ್ದ್ ಬಯ್ಯಡ್ ಸುಳ್ಯ ದಂಚಿ ಪೋಪುನ ಬಸ್ಸ್ಡ್ ಪೋದು ಕಲ್ಲೋಣಿಡ್ ಜತ್ತ್ದ್ ಇಲ್ಲಗ್ ನಡತೊಂದು ಪೋವೊಂದುಪ್ಪುನಗ, ಗುರ್ತದಾಯೆನೇ ಆದಿತ್ತಿನ ಪ್ರಸಾದ್ ಕಾರ್ಡ್ ಬತ್ತ್ದ್ ಇಲ್ಲಗ್ ಬುಡ್ಪೆ ಪನ್ಡ್ದ್ ಆರೆನ್ ಕಾರ್ಡ್ ಲೆತೊಂದು ಪೋತೆಗೆ.
ಒಯಿಲ್ದ ಪ್ರಕಾರ, ಸುಮಾರ್ 2 ಕಿಲೋಮೀಟರ್ ದೂರ ಪೋಯಿ ಬೊಕ್ಕ ಪ್ರಸಾದ್ ಆರೆನ ತಿಗಲೆ, ಕೆಪ್ಪೆ, ಮೋನೆ ಬೊಕ್ಕ ಸೊಂಟನ್ ಮಾತ ಪೊಕ್ಕಡೆ ಪೊಕ್ಕಡೆ ಮುಟ್ಟುದು ಲೈಂಗಿಕ ಕಿರುಕುಳ ಕೊರ್ತೆ ಪನ್ದ್ ಜವನ್ದಿ ಆರೋಪ ಮಲ್ತ್ದೆರ್. ಆರ್ ಅಂಚ ಮಲ್ಪೊರ್ಚಿನ್ದ್ ಪನ್ನಗ ಜಾತಿ ನಿಂದನೆ ಮಲ್ತ್ದ್, ಈ ವಿಷಯೊನು ಇಲ್ಲದಕಲೆಗ್ ಅತ್ತ್ಂಡ ಪೊಲೀಸೆರೆಗ್ ತೆರಿಪಾಂಡ ಕೆರ್ಪೆ ಪನ್ದ್ ಪೋಡಿಕಟ್ಟಾದೆ ಪನ್ದ್ ಒಯಿಲ್ಡ್ ಬರೆಪಾದೆರ್.
ಜವನ್ದಿ ಬರೆಪಾದಿನ ಒಯಿಲ್ದ ಆಧಾರೊಡು ಬೆಳ್ಳಾರೆ ಪೊಲೀಸೆರ್ ಆರೋಪಿನ ಮಿತ್ತ್ ಪ್ರಕರಣ ದಾಕಲ್ತೊಂದು, ಜಡ್ತೆ ಮಲ್ತೊಂದುಲ್ಲೆರ್ ಪನ್ದ್ ತೆರಿದ್ ಬೈದ್ಂಡ್.