Last updated on June 12th, 2026 at 10:13 am
ಬೆಂಗಳೂರ್ ಜೂ. 12: ಐನರೆ ವರ್ಸೊದ ಬಾಲೆ ಪಿ. ವೆನ್ನೆಲಾ ನ್ ಕೆರ್ತಿನ ಪ್ರಕರಣೊಗು ಸಂಬಂಧಿತ್ದ್ ಕರಿನ ಕೆಲ ದಿನೊರ್ದಿಂಚಿ ದೆಂಗ್ತಪ್ಪಾದಿತ್ತಿನ ಬಾಲೆದ ಪೆದ್ಯಪ್ಪೆ, ವಕೀಲೆದಿ ಪ್ರಿಯಾಂಕಾ (44) ನ್ ಕಾಡುಗೋಡಿ ಪೊಲೀಸೆರ್ ಗುರುವಾರ ಕೈದ್ ಮಲ್ತ್ದೆರ್. ಹಾಸನ ಜಿಲ್ಲೆದ ಸಕಲೇಶಪುರ ಕೈತಲ್ದ ಫಾರ್ಮ್ಹೌಸ್ ಒಂಜೆಟ್ ದೆಂಗ್ದ್ ಕುಲ್ದಿತ್ತಿನ ಆರೋಪಿನ್ ಉಲಕೈ ಮಲ್ತೊಂದಿನ ಪೊಲೀಸೆರ್, ನ್ಯಾಯಂತಡೆದ ಎದುರು ಲೆತೊಂದು ಪೋದು ಎಚ್ಚಿಗೆ ಜಡ್ತೆಗ್ 5 ದಿನೊಕು ಪೊಲೀಸ್ ಕಸ್ಟಡಿಗ್ ದೆತೊಂದೆರ್.
ದಾವಣಗೆರೆಡ್ ಪ್ರೈವೇಟ್ ಶಾಲೆ ನಡಪಾವುನ ಪ್ರಿಯಾಂಕಾ ಬೊಕ್ಕ ಆಲೆನ ಕಂಡನೆ ಪ್ರವೀಣ್ ಇಂಚಿಪ ದೂರ ದೂರ ಆದಿತ್ತೆರ್. ಪ್ರಿಯಾಂಕಾ ತನ್ನ ಲಿವ್-ಇನ್ ಪಾರ್ಟ್ನರ್, ರಿಯಲ್ ಎಸ್ಟೇಟ್ ಡೆವಲಪರ್ ಮೋಹನ್ ಜಿ. ಮಹಾಲಿಂಗಪ್ಪ (40) ನ ಒಟ್ಟುಗು ಬೆಂಗಳೂರ್ಡ್ ಇಪ್ಪೆದಲ್. ಮಾರ್ಚ್ 24ತ ರಾತ್ರೆ ಪ್ರಿಯಾಂಕಾ ಇಂದಿರಾನಗರ ಗ್ ಶಾಪಿಂಗ್ಗ್ ಪೋದುಪ್ಪುನಗ, ಬಾಲೆ ವೆನ್ನೆಲಾ ಕಾರ್ಡ್ ಮೋಹನ್ ನ ಒಟ್ಟುಗು ಇತ್ತಲ್. ಈ ಪೊರ್ತುಡು ಬಾಲೆ ಐಸ್ಕ್ರೀಂ ಕೇನ್ದಿತ್ತ್ದ್, ಮೋಹನ್ ಕನತ್ ಕೊರ್ನ ಫ್ಲೇವರ್ ಬೊರ್ಚಿ, ಬೇತೆ ಫ್ಲೇವರ್ ಬೋಡು ಪನ್ದ್ ಪೆರ್ಚಿ ಕಟ್ಟ್ದಿತ್ತಲ್. ಉಂದೆರ್ದ್ ಪಿಸ್ರಾಯಿನ ಮೋಹನ್ ಬಾಲೆದ ಬಂಜಿಗ್ ಜೋರುಡು ಆಕ್ದೆ. ಬಾಲೆ ಬೇನೆಡ್ ಜೋರು ಬುಲ್ಪೆರೆ ಪತ್ತ್ನಗ ಆಯೆ ಬಾಯಿ ಬೊಕ್ಕ ಮೂಂಕು ಮುಚ್ಚಿದ್ ದಮ್ಮು ಕಟ್ಟಾದ್ ಕೆರ್ತೆ.
ಈ ಅಪರಾಧೊನು ಮುಚ್ಚಿದ್ ದೀಯೆರ ಪ್ರಿಯಾಂಕಾ ಆಲೆನ ಇಲ್ಲದಕಲೆಗ್ ರಡ್ಡ್ ಬೇತೆ ಬೇತೆ ಕಲು ಕತೆ ಕಟ್ಟ್ದ್ ಪನ್ತಲ್. ಒರ ಬಾಲೆ ವನಸ್ ಮಲ್ತ್ದ್ ಜೆತ್ತಿನಲ್ಪ ತೀರ್ದಲ್ ಪನ್ದ್ ಪನ್ಡಲ್ನ್ಡ, ಕುಡೊರ ಕೋಲಾರದ ರೆಸ್ಟೋರೆಂಟ್ ದಲ್ಪ ಕಾರ್ಡ್ ಎಸಿ ಆನ್ ಮಲ್ತ್ ಜೆತ್ತುಪ್ಪುನಗ ತೀರ್ದಲ್ ಪನ್ದ್ ಪನ್ಡ್ದ್ ನಂಬಾಯೆರೆ ತೂತಲ್. ಬಾಲೆದ ಮರಣೋತ್ತರ ಪರೀಕ್ಷೆಡ್ ದಮ್ಮು ಕಟ್ಟ್ದ್ ತೀರ್ದಿನ ಬಗೆಟ್ ವರದಿ ಬತ್ತಿತ್ತ್ಂಡಲಾ ಪೊಲೀಸೆರ್ ಸುರುಟು ಕ್ರಮ ಗೆತೊಂದಿಜ್ಜಂಡ್. ಅಂಚಾದ್ ಅನುಮಾನೊಡು ಪ್ರಿಯಾಂಕಾನ ಸುರುತ ಕಂಡನೆ ಪ್ರವೀಣ್, ಪಿದಯಿ ದೇಶೊಡು ಇಪ್ಪುನ ತನ್ನ ಪಲಿ (ಜೋಕುಲೆನ ಡಾಕ್ಟರ್) ನ ಮುಕೇನ ಲೋಕಾಯುಕ್ತ ಐಜಿಪಿಡ ಒಯಿಲ್ ಬರೆಪಾವುಲೆಕ ಮಲ್ತ್ದೆರ್. ಲೋಕಾಯುಕ್ತ ನಡುಕು ಬತ್ತಿ ಬೊಕ್ಕನೇ ಪೊಲೀಸೆರ್ ಎಫ್ಐಆರ್ ದಾಕಲ್ತೊಂದೆರ್.
ಪ್ರಕರಣ ದಾಕಲಾವೊಂದಿತ್ತಿಲೆಕನೇ ಪ್ರಿಯಾಂಕಾ ಆಲೆನ ಮೊಬೈಲ್ ಫೋನ್, ಕ್ರೆಡಿಟ್ ಬೊಕ್ಕ ಡೆಬಿಟ್ ಕಾರ್ಡ್ ಗಲಕೆನ್ ಅಲಕ್ಕ ಉಂತಾದ್, ಮೋಹನ್ನ ದೋಸ್ತಿನ ಸಕಲೇಶಪುರದ ಫಾರ್ಮ್ಹೌಸ್ಡ್ ದೆಂಗ್ದ್ ಕುಲ್ಲುದಿತ್ತಲ್. ಇತ್ತೆ ಇರ್ವೆರ್ ಆರೋಪಿಲೆನ್ಲಾ ಉಲಕೈ ಮಲ್ತೊಂದಿನ ಪೊಲೀಸೆರ್, ಕೆರ್ತಿನೆಟ್ ಅಪ್ಪೆನ ಪಾತ್ರ ಬೊಕ್ಕ ಸಾಕ್ಷ್ಯ ನಾಶೊದ ಬಗೆಟ್ ವಿಚಾರಣೆ ಮಲ್ತೊಂದುಲ್ಲೆರ್.