Last updated on June 12th, 2026 at 08:55 am
ಬೆಂಗಳೂರ್, ಜೂ. 12: ಧರ್ಮಸ್ಥಳ ಗ್ರಾಮೊದ ಬುರುಡೆ ಕೇಸ್ಗ್ (Dharmasthala Skull Case) ಮಲ್ಲ ಟ್ವಿಸ್ಟ್ ತಿಕ್ಕ್ದ್ಂಡ್. ಎನನ್ ಗಲಸೊಂದು ಧರ್ಮಸ್ಥಳೊದ ವಿರುದ್ಧ ಷಡ್ಯಂತ್ರ ಮಲ್ತ್ದೆರ್ ಪನ್ದ್ ಚಿನ್ನಯ್ಯೆ (Chinnayya) ಹೈಕೋರ್ಟ್ಗ್ ರಿಟ್ ಅರ್ಜಿ ಪಾಡ್ದೆರ್. ಈ ಬಗೆಟ್ SIT ಜಡ್ತೆನ್ ಪತ್ತ ಮಲ್ಪೆರೆ ನಿರ್ದೇಶನ ಕೊರೊಡು ಪನ್ದ್ ಕೇನೊಂದೆರ್. ಷಡ್ಯಂತ್ರೊಡು ಮಹೇಶ್ ಶೆಟ್ಟಿ ತಿಮರೋಡಿ, ಗಿರೀಶ್ ಮಟ್ಟಣ್ಣವರ್, ವಿಠಲ್ ಗೌಡ, ಜಯಂತ್, ಯೂಟ್ಯೂಬರ್ನಕುಲಾಯಿನ ಸಮೀರ್ ಎಂ.ಡಿ., ಅಜಯ್, ದಿನೇಶ್ ಸೇರ್ದ್ ಪಾಕ ಜನ ಇಪ್ಪುನೆತ ಬಗೆಟ್ ಉಲ್ಲೇಖ ಮಲ್ತ್ದೆರ್. ನಟೆ ಪ್ರಕಾಶ್ ರಾಜ್ (Prakash Raj) ನ ಬಗೆಟ್ಲಾ ಅರ್ಜಿಡ್ ಪ್ರಸ್ತಾಪ ಮಲ್ತ್ದೆರ್. ಅರ್ಜಿ ವಿಚಾರಣೆ ಮಲ್ತಿನ ಹೈಕೋರ್ಟ್ ಸರ್ಕಾರೊಗು ನೋಟಿಸ್ ಜಾರಿ ಮಲ್ದ್ಂಡ್.
ಚಿನ್ನಯ್ಯನ ರಿಟ್ ಅರ್ಜಿಡ್ ದಾದ ಉಂಡು?
‘ವಿಠಲ್ ಗೌಡೆರ್ ಎನನ್ ಮಹೇಶ್ ಶೆಟ್ಟಿ ತಿಮರೋಡಿಗ್ ಗುರ್ತ ಮಲ್ತ್ ಕೊರ್ಯೆರ್. ಧರ್ಮಸ್ಥಳೊಡು ಪಾಕ ಪುನೊಕ್ಲೆನ್ ಕೌಂತುದೆರ್. ಅಲ್ಪ ಸಾರಗಟ್ಲೆ ಪುನೊಕುಲು ಉಲ್ಲ ಪನ್ದ್ ಪನರೆ ಪನ್ದಿತ್ತೆರ್. ಬೊಕ್ಕ ಗಿರೀಶ್ ಮಟ್ಟಣ್ಣನವರ್, ವಿಠಲ್ ಗೌಡೆ, ಗಣೇಶ್ ಬೇತೆ ಒಂತೆ ಜನ ಕೂಡ್ದ್ ಕೇರಳ, ತಮಿಳುನಾಡ್ ಅಂಚೆನೇ ಬೇತೆ ಕಡೆಕ್ ಮಾತ ಲೆತೊಂದು ಪೋತೆರ್. ಅಪಗಪಗ 5 ಸಾರ, 15 ಸಾರ ಕಾಸ್ ಕೊರೊಂದಿತ್ತೆರ್. ಬೊಕ್ಕ ಬೆಂಗಳೂರ್ಡ್ ಜಯಂತ್ನ ಇಲ್ಲಗ್ ಲೆತೊಂದು ಪೋದು ಮಂಡೆದ ಬುರುಡೆ ಕೊರ್ದು ಕೈಟ್ ಪತೊನ್ರೆ ಪನ್ಡ್ದ್ ಫೋಟೋ ಕಲೆತೆರ್. ಬೊಕ್ಕ ವಕೀಲೆರೆ ಕಚೇರಿಗ್ ಲೆತೊಂದು ಪೋದು ಅಲ್ಪ ಸೈನ್ ಪಾಡ್ಪಾವೊಂಡೆರ್. ಬೊಕ್ಕ ಸುಜಾತಾ ಭಟ್ ನ ಒಟ್ಟುಗು ಗಿರೀಶ್ ಮಟ್ಟಣ್ಣನವರ್ ಎನನ್ಲಾ ದೆಲ್ಲಿಗ್ ಸುಪ್ರೀಂಕೋರ್ಟ್ಗ್ ಲೆತೊಂದು ಪೋಯೆರ್. ಬೊಕ್ಕ ಉಜಿರೆಗ್ ಪೋನಗ ಮಹೇಶ್ ಶೆಟ್ಟಿ ತಿಮರೋಡಿನ ಇಲ್ಲಡ್ ಪತ್ತ್ರ್ದ್ ಪಾಡ್ದಿತ್ತೆರ್. ಬಯ್ಯದ ಪೊರ್ತುಡು ಗಿರೀಶ್ ಮಟ್ಟಣ್ಣನವರ್ ಆರೆನ ತರೆ, ಕಾರ್ಗ್ ಮಸಾಜ್ ಮಲ್ಪೆರ, ಮಹೇಶ್ ಶೆಟ್ಟಿ ತಿಮರೋಡಿಗ್ಲಾ ಮಸಾಜ್ ಮಲ್ಪೆರ ಒತ್ತಾಯ ಮಲ್ತೊಂದಿತ್ತೆರ್. ಆರೆನ ತೋಟಡ್ ಬೆನ್ಪಾವೊಂದಿತ್ತೆರ್. ವಕೀಲೆರ್ ಪನ್ಲೆಕ ಕೋರ್ಟ್ಡ್ ಪನ್ಡಿಜಿನ್ಡ ಕೆರ್ದ್ ಅವೇ ಜಾಗೆಡ್ ಕೌಂಪುವ ಪನ್ದ್ ಪೋಡಿಕಟ್ಟಾದೆರ್. ಸಮೀರ್ ಎಂ.ಡಿ. ಅಜಯ್ ಮೊಕಲೆನ ಯೂಟ್ಯೂಬ್ ಚಾನಲ್ಲೆಡ್ ಅಕ್ಲ್ ಪನ್ಡಿಲೆಕ ಪನ್ಪಾದ್ ರೆಕಾರ್ಡ್ ಮಲ್ತೆರ್. ಇಲ್ಲ್ ಕಟ್ಟೆರ 5 ಲಕ್ಷ ರೂಪಾಯಿದ ಚೆಕ್ ಕೊರ್ಪ ಪನ್ದ್ ಪಾತೆರ ಕೊರ್ದಿತ್ತೆರ್’ ಪನ್ದ್ ಚಿನ್ನಯ್ಯನ ರಿಟ್ ಅರ್ಜಿಡ್ ಉಲ್ಲೇಖ ಆತ್ಂಡ್.
ಇಂಚ, ಬುರುಡೆ ಗ್ಯಾಂಗ್ದ ಷಡ್ಯಂತ್ರೊನು ರಿಟ್ ಅರ್ಜಿಡ್ ಉಲ್ಲೇಖ ಮಲ್ದಿನ ಮಾಸ್ಕ್ಮ್ಯಾನ್ ಚಿನ್ನಯ್ಯೆ, ಕುಡೊಂಜಿ ಸ್ಫೋಟಕ ಪುದರ್ನ್ ಪಿದಯಿ ಕನತ್ದೆರ್. ಪುಗರ್ತೆದ ಬಹುಭಾಷಾ ನಟೆ ಪ್ರಕಾಶ್ ರಾಜ್ನ ಪುದರ್ನ್ಲಾ ಚಿನ್ನಯ್ಯೆ ಉಲ್ಲೇಖ ಮಲ್ತ್ದೆರ್.
ಪ್ರಕಾಶ್ ರಾಜ್ನ ಪುದರ್ ಉಲ್ಲೇಖ ಮಲ್ದಿನ ಚಿನ್ನಯ್ಯೆ
ಬುರುಡೆ ಕೊರ್ದು ಪೊಲೀಸೆರೆಡ ಒಯಿಲ್ ಬರೆಪಾಯಿ ಬೊಕ್ಕ ಕೇರಳದ ರೆಸಾರ್ಟ್ಗ್ ಲೆತೊಂದು ಪೋದಿತ್ತೆರ್. ಅಲ್ಪ ರಾತ್ರೆ 8 ಗಂಟೆಗ್ ನಟೆ ಪ್ರಕಾಶ್ ರಾಜ್ಗ್ ಕಾಲ್ ಮಲ್ತ್ದ್ ಅರ್ಜಿದಾರೆರೆಗ್ ಫೋನ್ ಕೊರ್ತೆರ್. ಪ್ರಕಾಶ್ ರಾಜ್ ತಮಿಳ್ಡ್ ಪಾತೆರ್ದ್ ಗಿರೀಶ್ ಮಟ್ಟಣ್ಣನವರ್ ಪನ್ಲೆಕ ಪನೊಡು. ಆರ್ 29 ನೇ ತಾರೀಕ್ಗ್ ಬತ್ತ್ದ್ ಅರಾದ್ ಪತ್ತುವೆ ಪನ್ದ್ ಪನ್ತೆರ್. ಕರ್ನಾಟಕ ಸರ್ಕಾರ ವಿಶೇಷ ಜಡ್ತೆ ಕೂಟ ಮಲ್ಪುನಗ ಕುಸಿಟ್ ವೀರೇಂದ್ರ ಹೆಗ್ಗಡೆರೆನ್ ಜೈಲ್ಗ್ ಕಡಪುಡುನ ದಿನ ಬತ್ತ್ಂಡ್ ಪನ್ದ್ ಗೌಜಿ ಮಲ್ತ್ದೆರ್. ಮಹೇಶ್ ಶೆಟ್ಟಿ ತಿಮರೋಡಿ ಬೊಕ್ಕ ಗಿರೀಶ್ ಮಟ್ಟಣ್ಣವರ್ ಬಂಗ್ಲೆಗುಡ್ಡೆದ ಜಾಗೆ ಗುರ್ತ ಪತ್ತ್ದ್ ಅಲ್ಪ ಒಕ್ಕಾದ್ ಸರ್ಕಾರೊದ ಕಾಸ್ ಕರ್ಚಿ ಮಲ್ಪಾಯೆರ ಸೂಚನೆ ಕೊರ್ತೆರ್. ಯೋಜನೆದ ಬಜೆಟ್ 200 ಕೋಟಿ ಇತ್ತ್ದ್, ವೀರೇಂದ್ರ ಹೆಗ್ಗಡೆರೆನ್ ಜೈಲ್ಗ್ ಕಡಪುಡ್ರೆ ಸಕಾಯ ಮಲ್ತ್ಂಡ 50 ಲಕ್ಷ ರೂಪಾಯಿ ಕೊರ್ಪ ಪನ್ದ್ ಪಾತೆರ ಕೊರ್ದಿತ್ತೆರ್. ಮಹೇಶ್ ಶೆಟ್ಟಿ ತಿಮರೋಡಿ, ಗಿರೀಶ್ ಮಟ್ಟಣ್ಣವರ್, ವಿಠಲ್ ಗೌಡ, ಜಯಂತ್, ಯೂಟ್ಯೂಬರ್ ಸಮೀರ್ ಎಂ.ಡಿ., ಅಜಯ್, ದಿನೇಶ್ ಮೊಕುಲು ಪನ್ಡಿನ ಜಾಗೆಲೆನ್ SITಗ್ ತೋಜಾವುಲೆಕ ಸೂಚನೆ ಕೊರ್ದು, ಅಂಚ ಮಲ್ತಿಜಿಂಡ ಎನ್ನ ಬೊಡೆದಿನ್ ಕೆರ್ಪಾವ ಪನ್ದ್ ಪೋಡಿಕಟ್ಟಾದೆರ್. ಆಂಡ ಅಲ್ಪ ಒವ್ವೇ ಪುನೊತ ಅವಶೇಷ ತಿಕ್ಕ್ದ್ಜಿ. ಧರ್ಮಸ್ಥಳೊದ ವಿರುದ್ಧ ಮೊಕಲೆನ ಷಡ್ಯಂತ್ರೊರ್ದಾವರ ಪೋಡಿದ್ ಸತ್ಯ ಪನರೆ ತೀರ್ಮಾನ ಮಲ್ತೆ. ಬೊಕ್ಕ SIT ದ ಎದುರು ಷಡ್ಯಂತ್ರೊದ ಬಗೆಟ್ ಪನ್ಡೆ ಪನ್ದ್ ಚಿನ್ನಯ್ಯೆ ಉಲ್ಲೇಖ ಮಲ್ತ್ದೆರ್.
ಇಂಚ, ಇಡೀ ಪ್ರಕರಣೊಡು ಸ್ಫೋಟಕ ತಿರ್ಗೆಲ್ ಪನ್ಪಿಲೆಕ ಪ್ರಕಾಶ್ ರಾಜ್ನ ಪುದರ್ಲಾ ಚಿನ್ನಯ್ಯೆ ರಿಟ್ ಅರ್ಜಿಡ್ ಉಲ್ಲೇಖ ಮಲ್ದಿನವು ಬಾರೀ ಸೋದ್ಯ ಉಂಡು ಮಲ್ದ್ಂಡ್. ಯಾನ್ ಮಾತ ಪನ್ಡಿಬೊಕ್ಕ ಷಡ್ಯಂತ್ರ ಮಲ್ತಿನಕಲೆನ ವಿರುದ್ಧ ಕ್ರಮ ಗೆತೊಂದುಜೆರ್. ಅಂಚಾದ್ ಸರ್ಕಾರ, ಎಸ್ಐಟಿಗ್ ನಿರ್ದೇಶನ ಕೊರೊಡು ಪನ್ದ್ ಚಿನ್ನಯ್ಯೆ ಕೇನೊಂದೆರ್. ರಿಟ್ ಅರ್ಜಿ ವಿಚಾರಣೆ ಮಲ್ತಿನ ಹೈಕೋರ್ಟ್, ಸರ್ಕಾರ SITಗ್ ನೋಟಿಸ್ ಜಾರಿ ಮಲ್ದ್ಂಡ್. ಜೂನ್ 29ದ ಉಲಯಿ SIT ಜಡ್ತೆದ ಸ್ಥಿತಿಗತಿದ ಬಗೆಟ್ ಒಲವು ಕೊರ್ಯೆರ ಸರ್ಕಾರೊಗು ಸೂಚನೆ ಕೊರ್ತುಂಡು.