Last updated on June 11th, 2026 at 10:27 am
ಬೆರ್ಮಾವರ, ಜೂ. 11: ಪೆದ್ದಿನ ಅಪ್ಪೆ ತನ್ನ ಮಲ್ಲ ಮಗಲೆನ್ ಶಾಲೆಗ್ ಬುಡ್ರೆ ಪೋವೊಂದಿತ್ತಿನ ಪೊರ್ತುಡು, ತಟೊಂದಿತ್ತಿನ ಒಂಜರೆ ವರ್ಸ ಪ್ರಾಯೊದ ಆಣ್ ಬಾಲೆದ ತರೆಕ್ ತಾರಾಯಿ ಬೂರ್ದು ಬಾಲೆ ತೀರ್ದಿನ ನಡಕೆ ಹೆರಂಜೆಡ್ ಅಂಗಾರೆ ನಡತ್ದ್ಂಡ್. ಬೆರ್ಮಾವರಡ್ ಫಾಸ್ಟ್ ಫುಡ್ ಅಂಗಡಿ ನಡಪಾವೊಂದುಪ್ಪುನ ಪ್ರಶಾಂತ್ ಬೊಕ್ಕ ಸುಚಿತ್ರಾ ದಂಪತಿನ ಒಂಜರೆ ವರ್ಸೊದ ಮಗೆ ತೀರ್ದಿನ ಬಾಲೆ.
ಏಪೊಲ ಅಪ್ಪೆ ಸುಚಿತ್ರಾ ತನ್ನ 6 ವರ್ಸೊದ ಮಲ್ಲ ಮಗಲೆನ್ ಶಾಲೆದ ಬಸ್ ಬರ್ತಾಯೆರ ಪೋನಗ ಈ ಎಲ್ಯ ಬಾಲೆನ್ ಲೆತೊಂದು ಪೋಪೆದಿಜೆರ್. ವಿಶೇಷವಾದ್ ಬರ್ಸ ಬನ್ನಗ ಕೊಡೆ ಪತೊನೊಡು ಪನ್ಪಿ ನೆವನೊಡು ಬಾಲೆನ್ ಇಲ್ಲಲೇ ಬುಡ್ಪೆದೆರ್. ಆಂಡ ಅಂಗಾರೆ ಮಗಲೆನ ಶಾಲೆದ ಬಸ್ ಬರ್ಪಿ ಪೊರ್ತುಗು ಬರ್ಸ ಉಂತುದಿತ್ತಿನೆರ್ದಾವರ, ಸುಚಿತ್ರಾ ಮೇರ್ ಎಲ್ಯ ಬಾಲೆನ್ಲಾ ತಟೊಂದು ಪಿದಡ್ದೆರ್. ಆಂಡ ಕಾಲದ ಗೊಬ್ಬು ಬೇತೆನೇ ಇತ್ತ್ಂಡ್.
ಮೊಕಲೆನ ಇಲ್ಲಗ್ ಸೀದಾ ರೋಡ್ ಇಜ್ಜಂದಿನೆರ್ದಾವರ, ಶಾಲೆದ ಬಸ್ ಬರ್ಪುನಡೆ ಎತ್ತೆರೆ ತೋಟ ಬೊಕ್ಕ ಪುಣಿಯೆ ಸುಮಾರ್ 250 ರ್ದ್ 300 ಮೀಟರ್ ನಡಪೊಡು. ಇಲ್ಲ್ ಕರಿದ್ ತೋಟದ ಸಾದಿಡ್ ಕಾಲಿ 50 ಮೀಟರ್ ದೂರೊಡು, ಸಾದಿ ಬರಿಟಿತ್ತಿನ 40 ಫೀಟ್ ಎತ್ತರೊದ ತಾರೆರ್ದ್ ಪಜ್ಜಿ ತಾರಾಯಿ ಒಂಜಿ ಸೀದಾ ಅಪ್ಪೆ ತಟೊಂದಿನ ಬಾಲೆದ ತರೆಕ್ ಬೂರ್ದ್ಂಡ್. ತಾರಾಯಿ ಬಾರ್ದಿನ ಬರಸ್ಗ್ ಬಾಲೆದ ತರೆಟ್ ಒಂಜಿ ಇಂಚಿದಾತ್ ತಾರ್ತ್ದ್ ಗಡಿ ಆತ್ಂಡ್ಗೆ.
ದುರಂತ ನಡತಿನೇ ಕೈತಲ್ದಕುಲು ಅಪಗನೇ ಸಕಾಯೊಗು ಬೈದೆರ್. ಬರಿತ ಇಲ್ಲದ ಗಾಡಿ ಒಂಜೆಟ್ ಬಾಲೆನ್ ಮಣಿಪಾಲ ಆಸ್ಪತ್ರೆಗ್ ಲೆತೊಂದು ಪೋತೆರ್. ಆಸ್ಪತ್ರೆ ಎತ್ತುನೇಟಲಾ ಬಾಲೆ ಕಣ್ಣ್ ಬುಲಾದ್ ತೂವೊಂದಿತ್ತ್ಂಡ್ಗೆ. ಮಣಿಪಾಲ ಆಸ್ಪತ್ರೆದ ಡಾಕ್ಟರ್ನಕುಲು ಅಪಗನೇ ಬಾಲೆಗ್ ತುರ್ತು ಶಸ್ತ್ರಚಿಕಿತ್ಸೆ ಮಲ್ತಂಡಲಾ, ಲತ್ತ್ ತರೆಕ್ ಗಾತಿದ ಪೆಟ್ಟ್ ಬೂರ್ದಿನೆರ್ದಾವರ ಮರ್ದ್ ಪಲಿಪಂದೆ ಅಂಗಾರೆ ಬಯ್ಯಡ್ ಬಾಲೆ ತೀರ್ದ್ಂಡ್.