Last updated on June 11th, 2026 at 11:49 am
ಕುಡುಮ, ಜೂ 11: ಬೋಲ್ತೇರ್ ತಾಲೂಕ್ದ ಕುಡುಮ ಡ್ ಒಂಜಿ ಸೋದ್ಯದ ನಡಕೆ ನಡತ್ದ್ಂಡ್. ಸುಮಾರ್ 26 ವರ್ಸೊಗು ದುಂಬು 12 ವರ್ಸ ಇಪ್ಪುನಗ ಇಲ್ಲ್ ಬುಡ್ದು ನಾಪತ್ತೆ ಆದಿತ್ತಿನ ಆಣ್ ಒರಿ, ಕುಡ ಇಲ್ಲಗ್ ಬತ್ತ್ದೆ. ಕುಡುಮದ ಅಶೋಕನಗರದ ನಿವಾಸಿ ಆದಿತ್ತಿನ ಸತೀಶ್ ಪನ್ಪಿನಾರೇ ಇತ್ತೆ ಸಲೀಂ ಆದ್ ಪಿರ ಇಲ್ಲಗ್ ಬತ್ತ್ದ್ ಅಪ್ಪೆನ್ ಕೂಡ್ನ ಅಪರೂಪೊದ ಆಂಜೊವು. 2000ನೇ ಇಸವಿಡ್ ಕುಡುಮಗ್ ಬತ್ತಿತ್ತಿನ ಸರ್ಕಸ್ದಕಲೆನ ಒಟ್ಟುಗು ಬಲ್ತಿತ್ತಿನ ಸತೀಶ್, ಈತ್ ವರ್ಸಮುಟ್ಟ ಮಹಾರಾಷ್ಟ್ರಡ್ ಇತ್ತೆರ್.
ಊರ್ ಮದತ್ದ್ ಮಹಾರಾಷ್ಟ್ರೊಡು ‘ಸಲೀಂ ಅಬ್ದುಲ್ ಅನ್ಸಾರಿ’ ಆದಿತ್ತಿನ ಸತೀಶ್!
ಇಲ್ಲ್ ಬುಡ್ದು ಪೋಯಿ ಬೊಕ್ಕ ಸರ್ಕಸ್ದಕಲೆನ ಒಟ್ಟುಗು ದೇಶೊಡೊರ್ಮೆ ತಿರ್ಗಿನ ಸತೀಶ್, ಕರಿನ 26 ವರ್ಸೊರ್ದಿಂಚಿ ಮಹಾರಾಷ್ಟ್ರೊಡೇ ಒಕ್ಕೆಲ್ ಕುಲ್ಲುದ್ ಬೇಲೆ ಮಲ್ತೊಂದಿತ್ತೆರ್. ಬೆನ್ಪಾಟಿಗೆದ ನಡುಟು ಆರ್ ತನ್ನ ಸ್ವಂತ ಊರ್, ಭಾಷೆ ಬೊಕ್ಕ ಅಪ್ಪೆಅಮ್ಮನೇ ಅಲಕ್ಕ ಮದತ್ ಬುಡ್ದಿತ್ತೆರ್. ಅಲ್ಪನೇ ಇಸ್ಲಾಂಗ್ ಮತಾಂತರ ಆದ್ ಆರೆನ ಪುದರ್ನ್ ‘ಸಲೀಂ ಅಬ್ದುಲ್ ಅನ್ಸಾರಿ’ ಪನ್ದ್ ಪಗತಿತ್ತೆರ್. ಆತೇ ಅತ್ತಂದೆ, ತಾಲೀಮಾ ಪನ್ಪಿನಾಲೆನ್ ಮದಿಮೆ ಆತಿನ ಮೆರೆಗ್ ಇತ್ತೆ ಖುಷಿ ಬೊಕ್ಕ ಅಝಂ ಪನ್ಪಿನ ಇರ್ವೆರ್ ಜೋಕುಲು ಉಲ್ಲೆರ್. ಈತ್ ವರ್ಸ ದೂರೊಡೇ ಇತ್ತಿನೆರ್ದಾವರ ಸತೀಶ್ಗ್ ತನ್ನ ಅಪ್ಪೆಬಾಸೆ ತುಳು ಅಲಕ್ಕ ಮದತ್ ಪೋದಿತ್ತ್ದ್, ಇತ್ತೆ ಕಾಲಿ ಹಿಂದಿ ಭಾಷೆಡ್ ಮಾತ್ರ ಪಾತೆರುವೆರ್.
ದೋಸ್ತಿಲೆನ ಒಟ್ಟುಗು ಕುಡುಮಗ್ ಬನ್ನಗ ಪರ ನೆಂಪು ಪಿರ ಬತ್ತ್ಂಡ್!
ಜೂನ್ 9 ದಾನಿ ಸತೀಶ್ (ಸಲೀಂ) ತನ್ನ ಮಹಾರಾಷ್ಟ್ರೊದ ದೋಸ್ತಿಲೆನ ಒಟ್ಟುಗು ತಿರ್ಗೊಂದು ಕುಡುಮಗ್ ಬತ್ತಿತ್ತೆರ್. ಈ ಪೊರ್ತುಡು ದುಂಬು ಸರ್ಕಸ್ ನಡತೊಂದಿತ್ತಿನ ಜಾಗೆಗ್ ಬನ್ನಗ ಆರೆಗ್ ಪರ ನೆಂಪುಲು ಒರರ್ದ್ ಒರಾನೆ ಪಿರ ಬೈದ. ‘ಉಂದೇ ಎನ್ನ ಸ್ವಂತ ಊರ್’ ಪನ್ಪಿ ಸತ್ಯ ತೆರಿದ್ಂಡ್. ಮೆಗ್ಯಡಿಕುಲೆ ಪುದರ್ ನೆನೆಪಿತ್ತಿನೆರ್ದಾವರ, ಕೈತಲ್ದ ಅಂಗಡಿದಕಲೆಡ ಮಾತಾ ಕೇನ್ದ್ ಎಂಚಲಾ ತನ್ನ ಪರ ಇಲ್ಲ್ನ್ ನಾಡೊಂದು ಪೋತೆರ್. ಇಲ್ಲ ಬಾಕಿಲ್ಗ್ ಬತ್ತ್ದ್ ಉಂತಿನ ಮಲ್ಲ ಮಗನ್ ತೂಯಿನ ಅಪ್ಪೆನ ಕಣ್ಣ ಕೋಂಟು ಚಂಡಿ ಆತ್ಂಡ್. ಇಲ್ಲದಕುಲು ಮಾತ ಕೂಡ್ದ್ ಮಗನ್ ಬಾರೀ ಕುಸಿಟ್ ಎದುಕೊಂದೆರ್.
ಭಾಷೆದ ಗಡು ಮೀರ್ನ ಅಪ್ಪೆನ ಮೋಕೆ, ಪಲಿತ್ಂಡ್ ಪರಕೆ
ಸತೀಶ್ಗ್ ಕಾಲಿ ಹಿಂದಿ ಮಾತ್ರ ಬರೊಂದಿತ್ತ್ದ್, ಇಂಚಿ ಅಪ್ಪೆಗ್ ಹಿಂದಿ ಬರಂದಿನೆರ್ದಾವರ ಇರ್ವೆರೆಗ್ ಭಾಷೆ ಅಡ್ಡ ಆದಿತ್ತ್ಂಡ್. ಆಂಡಲಾ ಭಾಷೆದ ಅಂಗ್ದಾಂತೆ ಅಪ್ಪೆ ಬೊಕ್ಕ ಮೆಗ್ಯಡಿಕುಲೆನ್ ಪಲಯೆ ಸತೀಶ್ ಗುರ್ತ ಪತ್ತ್ದ್ ಅರಾದ್ ಪತ್ತ್ದೆರ್. ಮಗೆ ತಿಕ್ಕಡ್ ಪನ್ದ್ ಕುಡುಮ, ಕಟೀಲ್ದಪ್ಪೆ ಉಲ್ಲಾಲ್ದಿ ಬೊಕ್ಕ ಪಣೋಲಿಬೈಲ್ಗ್ ಅಪ್ಪೆ ಪನ್ದಿತ್ತಿನ ಪರಕೆ ಪಲಿತ್ದ್ಂಡ್.
‘ಏನ್ ಸಯ್ಯೆರೆ ದುಂಬು ಎನ್ನ ಮಲ್ಲ ಮಗನ್ ಒರ ಆಂಡಲಾ ತೂವೊಡು, ಆಯನ್ ಎಂಚಾಂಡಲಾ ಲೆತೊಂದು ಬಲೆ’ ಪನ್ದ್ ಇಂಚಿಪ ಆತೇ ಅಪ್ಪೆ ತನ್ನ ಒರಿನ ಜೋಕುಲೆಡ ಕಣ್ಣನೀರ್ ದೀದ್ ಪನ್ದಿತ್ತೆರ್ಗೆ. ಅಪ್ಪೆ ಉಡಲ ಬುಲಿಪು ಕೇನ್ದಾ ದಾನ್ನ ಪಿರ ಬತ್ತಿನ ಸತೀಶ್/ಸಲೀಂ, ಇಲ್ಲದಕಲೆ ಒಟ್ಟುಗು ಇತ್ತ್ದ್, ಕುಸಿಟ್ ದಿನ ಕರಿತ್ದ್, ಮಹಾರಾಷ್ಟ್ರಗ್ ಪಿರ ಪೋತೆರ್.