Last updated on June 9th, 2026 at 08:35 am
ಒಡಿಪು, ಜೂ. 09: ಗ್ಯಾಸ್ ಪೆಟ್ರೋಲ್ ಡಿಸೇಲ್ ಬಿಲೆ ಏರೊಂದುಪ್ಪುನೆತ ನಡುಟು ಇತ್ತೆ ಪ್ರೈವೇಟ್ ಬಸ್ದಲಾ ಟಿಕೆಟ್ ರೇಟ್ ಏರ್ದ್ಂಡ್. ತೈಲ ರೇಟ್ ಬೊಕ್ಕ ಟೋಲ್ ರೇಟ್ ಏರ್ದಿನೆರ್ದಾವರ ಇತ್ತೆ ಪ್ರೈವೇಟ್ ಬಸ್ ಟಿಕೆಟ್ ರೇಟ್ ನನಲಾತ್ ಎಚ್ಚ ಆತ್ಂಡ್. ರಾಜ್ಯೊಡೊರ್ಮೆ ಪ್ರೈವೇಟ್ ಬಸ್ಲೆನ (ಸ್ಟೇಜ್ ಕ್ಯಾರಿಯರ್) ಪ್ರಯಾಣ ರೇಟ್ನ್ ಶೇ 5 ರ್ದ್ ಶೇ 8 ದಾತ್ ಎಚ್ಚ ಮಲ್ತಿತ್ತ್ದ್, ಪರಿಷ್ಕೃತ ಪೊಸ ರೇಟ್ ಜೂನ್ 9 ರ್ದ್ (ಇನಿ) ಜಾರಿಗ್ ಬರ್ಪುಂಡು ಪನ್ದ್ ಕರ್ನಾಟಕ ರಾಜ್ಯ ಮಜಲ್ ವಾಹನ ಬಸ್ ಮಾಲಕೆರೆ ಸಂಘೊಲೆನ ಒಕ್ಕೂಟೊದ ಅಧ್ಯಕ್ಷೆ ಕುಯಿಲಾಡಿ ಸುರೇಶ್ ನಾಯಕ್ ತೆರಿಪಾದೆರ್. ಒಡಿಪುಡು ಸೋಮವಾರ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರ್ನ ಆರ್, ಬಸ್ ರೇಟ್ ಏರ್ಪುನೆತ ಅನಿವಾರ್ಯತೆದ ಬಗೆಟ್ ತೆರಿಪಾಯೆರ್.
ರಾಜ್ಯ ಸರ್ಕಾರೊದ ಅಧಿಕೃತ ಅಧಿಸೂಚನೆದ ನಿಯಮೊಲೆನ ಪ್ರಕಾರ ಸೆಸ್ ಪಾಡೆರ ಅವಕಾಶ ಇತ್ತ್ದ್, ಆ ಪ್ರಕಾರೊನೇ ಇತ್ತೆ ರೇಟ್ ಪರಿಷ್ಕರಣೆ ಮಲ್ದ್ಂಡ್. ಇಂಚಿಪೊದ ದಿನೊಟು ಇಂಧನ ರೇಟ್ ಮಾತ್ರ ಅತ್ತಂದೆ, ಬಸ್ಲೆನ ಟೈರ್ ಬೊಕ್ಕ ಟೈರ್ ರಿಸೋಲಿಂಗ್ (Resoling) ಕರ್ಚಿ, ಇಂಜಿನ್ ಪಾರ್ಟ್ಲೆನ (Spare Parts) ಬಿಲೆಲಾ ಬಾನ ಮುಟ್ಟುದುಂಡು. ಇಂದೆರ್ದಾವರ ಪ್ರೈವೇಟ್ ಬಸ್ದಕುಲು ನಿಚ್ಚೊದ ಮೈಂಟೆನೆನ್ಸ್ಗ್ಲಾ ಬಂಙ ಬರೊಂದುಲ್ಲೆರ್. ಅಂಚಾದ್ ರೇಟ್ ಏರ್ಪುನ ಅನಿವಾರ್ಯ ಆತ್ಂಡ್ ಪನ್ದ್ ಆರ್ ಸ್ಪಷ್ಟ ಮಲ್ತೆರ್.
ಪತ್ರಿಕಾಗೋಷ್ಠಿಡ್ ತುಳುನಾಡ್ದ ಪ್ರಮುಖ ಮಾರ್ಗೊಲೆನ ಪರಿಷ್ಕೃತ ಟಿಕೆಟ್ ರೇಟ್ದ ಒಲವು ಕೊರ್ಯೆರ್
ಒಡಿಪು – ಕುಡ್ಲ: ದುಂಬು ಇತ್ತಿನ ₹95 ಟಿಕೆಟ್ ಇತ್ತೆ ₹100 ಕ್ ಏರ್ದ್ಂಡ್.
ಕುಂದಾಪುರ – ಒಡಿಪು: ₹60 ರ್ದ್ ₹63 ಆತ್ಂಡ್.
ಒಡಿಪು – ಮಣಿಪಾಲ: ಕನಿಷ್ಠ ಪ್ರಯಾಣ ದರ ₹12 ಇತ್ತ್ಂಡ್, ಇನಿರ್ದ್ ₹15 ಆಪುಂಡು.