Last updated on June 8th, 2026 at 03:51 pm
ಲಕ್ಷ್ಮೀ ಟೀಚರ್,ಕಣ್ಣಪ್ಪ ಮಾಸ್ಟರ್ ಮೆಮೋರಿಯಲ್ ಟ್ರಸ್ಟ್ ಕುಂಜತ್ತೂರು ಮುಕ್ಲೆನ ನಿಲೆಟ್, ವಿಶ್ವ ಪರಿಸರ ದಿನೊತಾನಿ ಜೋಕ್ಲೆಗ್ ಪಸಂತ್ರೊದ ಬಗೆಟ್ ಚಿತ್ರ ಬುಡ್ಪಾವುನ ಪಂತೊ ಕುಂಜತ್ತೂರ್ಡ್ ನಡತ್ಂಡ್. ಕುಂಜತ್ತೂರುದ ಸುತ್ತೊರ್ಮೆದ ಅತ್ತಾಂದೆ, ಕೊಲ್ಯ, ತೊಕ್ಕೊಟ್ಟು, ಕುಡ್ಲರ್ದ್ ಲಾ ಸುಮಾರ್ ಜೋಕುಲು ಪಂತೊಡು ಪಾಲ್ ಪಡೆಯೆರ್.
ಸುರೂತ,ರಡ್ಡನೇ ಬೊಕ ಮೂಜನೆ ಇನಾಮು ಗೆಂದಿನಕ್ಲೆಗ್ ಪಣವುದ ಇನಾಮುನಾ ಪಾಲ್ ಪಡೆಯಿನ ಮಾತಾ ಜೋಕ್ಲೆಗ್ ನೆಂಪುದೋಲೆಲಾ ಕೊರ್ಯೆರ್. ಜೋಕ್ಲೆಡ್ ಪಸೊಂತ್ರೊದ ಮೋಕೆ ಬೊಕ ಕಾಪು ಪುಟ್ಟಾಯೆರೆಗಾದ್ ಪಸಂತ್ರೊದ ಚಿತ್ರ ಪಂತೊ ಒಂಜಿ ನೆವನ ಆಪುಂಡು, ದೇವೆರ್ ನಂಕ್ ಈ ಪುಡಮಿದ ಮಿತ್ತ್ ಬದ್ಕೆರೆ ಪೊರ್ಲು ದ ಪಸಂತ್ರೊನು ಉಂಡು ಮನ್ತ್ದೆರ್, ಅಯಿನ್ ಒರಿಪುನ, ಕಾಪುನ ನಮ್ಮ ಕರ್ತವ್ಯ ಆದುಂಡುಂದು ಟ್ರಸ್ಟ್ ದ ಪದುಕೆರಾಯಿನ ಶ್ರೀಮತಿ ಚಂದ್ರಿಕಾ ಟೀಚರ್ ಪಂಡೆರ್.
ಈ ಲೇಸ್ ಡ್ ಶ್ರೀಮತಿ ಕುಶಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ ಮಲ್ಲ ಬಿನ್ನರಾದಿತ್ತ್ದ್, ಸೈಂಟ್ ಸೆಬಾಸ್ಟಿಯನ್ ಶಾಲೆ ತೊಕ್ಕೊಟುದ ಚಿತ್ರ ಕಲ್ಪಾದಿ ಆಯಿನ ಶ್ರೀ ಚಂದ್ರಾಡ್ಕರ್ ಬೊಕ ರಾಷ್ಟ್ರಪ್ರತಿಷ್ಠಾನದ ಡ್ರಾಯಿಂಗ್ ಕಲ್ಪಾದಿ ಶ್ರೀ ಕಿಶೋರ್ ಒತ್ತುಪಾಲ್ಡಿತ್ತೆರ್.
ಶ್ರೀಮತಿ ಮಾಳವಿಕಾ, ಕುಮಾರಿ ಶಾರದಾ ಸಗಾಯ ಮಂತೆರ್. ಟ್ರಸ್ಟ್ದ ಶ್ರೀ ರವಿ ಉಚ್ಚಿಲ್ ಬೊಕ ಇಲ್ಲದಕುಲು ಒತ್ತುಸಾಗಾಯೊಡು ಇತ್ತೊಂದು ಜೋಕ್ಲೆಗ್ ಫಲಹಾರದ ವ್ಯವಸ್ಥೆ ಮಂತೆರ್. ಜೋಕ್ಲೆನ ಒಟ್ಟಿಗೆ ಜೋಕ್ಲೆನ ಅಪ್ಪೆಮ್ಮೆ,ಇಲ್ಲದಕುಲು ಲೇಸ್ಗ್ ಪೊರ್ಲು ದಿಂಜಾಯೆರ್.