Last updated on July 17th, 2026 at 09:44 am
ಕುಡ್ಲ: ಮೂಜಿ ವರ್ಸ ಎಣ್ಮ ತಿಂಗೊಲ್ದ ಬಾಲೆದ ಮಿತ್ತ್ ಲೈಂಗಿಕ ದೌರ್ಜನ್ಯ ಮಲ್ದಿನ ಪ್ರಕರಣೊಡು ಅಶೋಕ್ ಕೆ. (50) ಪನ್ಪಿನಾಯನ ಮಿತ್ತ್ದ ಆರೋಪ ಸಾಬೀತಾದಿತ್ತ್ದ್, ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ (ಎಫ್ಟಿಎಸ್ಸಿ-1 ಪೋಕ್ಸೋ) ಅಪರಾಧಿಗ್ 5 ವರ್ಸದ ಕಠಿಣ ಕರ್ಪಿಲ್ಲ ಶಿಕ್ಷೆ ಕೊರ್ದು ತೀರ್ಪು ಪ್ರಕಟ ಮಲ್ದ್ಂಡ್.
ಪ್ರಕರಣೊದ ಒಲವು: 2025ತ ಮೇ 4 ತಾನಿ ಇಲ್ಲ ಜಾಲ್ಡ್ ಗೊಬ್ಬೊಂದಿತ್ತಿನ ಬಾಲೆನ್ ಬರಿತಿಲ್ಲದ ಅಶೋಕ್ ಆಯನ ಇಲ್ಲಗ್ ಲೆತ್ತ್ದ್ ತೆನಸ್ ಕೊರ್ದಿತ್ತೆ. ಬಾಲೆ ಅವೆನ್ ಪ್ಲೇಟ್ಡ್ ಇಲ್ಲಗ್ ಕನತ್ದ್ ತೆನಸ್ ತಿನ್ದಿ ಬೊಕ್ಕ, ಬಾಲೆದ ಅಪ್ಪೆ ಪ್ಲೇಟ್ ಪಿರ ಕೊರ್ಯೆರ ಕಡಪುಡ್ದಿತ್ತೆರ್ಗೆ. ಅಂಚ ಬಾಲೆ ಪ್ಲೇಟ್ ಕೊರ್ಯೆರ ಅಶೋಕನ ಇಲ್ಲಗ್ ಪೋದುಪ್ಪುನಗ ಆಯೆ ಲೈಂಗಿಕ ದೌರ್ಜನ್ಯ ಮಲ್ತ್ದೆ.
ಈ ಬಗೆಟ್ ಬಾಲೆದ ಅಪ್ಪೆ ಬರೆಪಾದಿನ ಒಯಿಲ್ದ ಪ್ರಕಾರ ಪಣಂಬೂರ್ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ಂಡ್. ಅಪಗದ ಎಸಿಪಿ ನಜ್ಮಾ ಫಾರೂಕಿ ಮೇರ್ ಪ್ರಕರಣದ ಜಡ್ತೆ ಮಲ್ತ್ದ್ ನ್ಯಾಯಂತಡೆಕ್ ದೋಷಾರೋಪಣಾ ಪಟ್ಟಿ ಸಂದಾದಿತ್ತೆರ್.
ನ್ಯಾಯಂತಡೆದ ತೀರ್ಪು: ಪ್ರಕರಣೊದ ವಾದ-ಪ್ರತಿವಾದ ಕೇನ್ಡಿನ ಪೋಕ್ಸೋ ನ್ಯಾಯಂತಡೆದ ನ್ಯಾಯಾಧೀಶೆರಾಯಿನ ಮೋಹನ ಜೆ.ಎಸ್. ಮೇರ್, ಆರೋಪಿ ಅಶೋಕ್ನ ಅಪರಾಧ ಸಾಬೀತಾಯಿನೆರ್ದಾವರ ಜುಲೈ 16ತಾನಿ ಶಿಕ್ಷೆ ಪ್ರಕಟ ಮಲ್ತ್ದೆರ್.
ಪೋಕ್ಸೋ ಕಾಯ್ದೆದ ಕಲಂ 10ತ ಅಡಿಟ್ ಅಪರಾಧಿಗ್ 5 ವರ್ಸೊದ ಕಠಿಣ ಶಿಕ್ಷೆ ಬೊಕ್ಕ 60 ಸಾರ ರೂ. ದಂಡ ಪಾಡ್ದೆರ್. ದಂಡ ಕಟ್ಟ್ಜಿಂಡ ಎಚ್ಚಿಗೆ ಒಂಜಿ ವರ್ಸ ಸಾದಾ ಶಿಕ್ಷೆಗ್ ತೀರ್ಪುಡು ಆದೇಶ ಕೊರ್ತೆರ್. ಸರ್ಕಾರೊದ ಪರವಾದ್ ವಿಶೇಷ ಸರ್ಕಾರಿ ಅಭಿಯೋಜಕೆದಿ ಸಹನಾದೇವಿ ಬೋಳೂರು ವಾದ ಮಂಡನೆ ಮಲ್ತೆರ್.
1.50 ಲಕ್ಷ ರೂ. ಪಿರಿಕಟ್ಟ್ಗ್ ಆದೇಶ: ಅಪರಾಧಿಗ್ ಪಾಡ್ದಿನ ದಂಡೊದ ಕಾಸ್ಡ್ 50 ಸಾರ ರೂ.ನ್ ಸಂತ್ರಸ್ತೆದಿ ಬಾಲೆಗ್ ಪಿರಿಕಟ್ಟ್ ಆದ್ ಕೊರ್ಯೆರ ನ್ಯಾಯಾಧೀಶೆರ್ ಆದೇಶ ಮಲ್ತ್ದೆರ್. ಅವೆತ ಒಟ್ಟುಗು ಜಿಲ್ಲಾ ಕಾನೂನ್ ಸೇವಾ ಪ್ರಾಧಿಕಾರೊದ ಕಡೆರ್ದ್ ಬಾಲೆಗ್ ಎಚ್ಚಿಗೆ 1 ಲಕ್ಷ ರೂ. ಪರಿಹಾರ ಧನ ಕೊರ್ಯೆರ ತೀರ್ಪುಡು ಸೂಚನೆ ಕೊರ್ತೆರ್.