Last updated on July 17th, 2026 at 12:26 pm
ಕಾಸ್ರೋಡ್, ಜು. 17: ಕುಂಬ್ಳೆ ಗ್ ಕೈತಲ್ದ ಮುಜುಂಗಾವು ಪನ್ಪಿನಲ್ಪ ಗುರುವಾರ 48 ವರ್ಸ ಪ್ರಾಯೊದ ಪೊಂಜೊವು ಒರ್ತಿ ಕೆರೆಟ್ ಮುರ್ಕ್ದ್ ತೀರ್ದಿನ ನಡಪು ನಡತ್ದ್ಂಡ್.
ತೀರ್ದಿನಾರೆನ್ ಸೀತಾಂಗೋಳಿದ ಎಡನಾಡ್ ಬ್ಯಾಂಕ್ದ ಕೈತಲ್ ಇಪ್ಪುನ ರಾಮಕೃಷ್ಣೆ ಪನ್ಪಿನಾರೆನ ಬೊಡೆದಿ ಎಂ ಸುನೀತಾ ಪನ್ದ್ ಗುರ್ತ ಪತ್ತ್ದೆರ್.
ಇಲ್ಲದಕಲೆನ ಪ್ರಕಾರ, ಬುಧವಾರ ರಾತ್ರೆ ಜೆತ್ತಿತ್ತಿನ ಸುನೀತಾ , ಗುರುವಾರ ಕಾಂಡೆ ಇಲ್ಲದಕುಲು ಲಕ್ಕ್ನಗ ತೋಜೊಂದಿಜ್ಜಂಡ್. ಸುತ್ತಮುತ್ತ ಪಾಕ ನಾಡ್ಂಡಲಾ, ಆರ್ ತಿಕ್ಕ್ದಿಜ್ಜಂಡ್, ಅಂಚಾದ್ ಇಲ್ಲದಕುಲು ಕುಂಬ್ಳೆ ಪೊಲೀಸೆರೆಡ ನಾಪತ್ತೆ ಆತಿನ ಬಗೆಟ್ ಒಯಿಲ್ ಬರೆಪಾದೆರ್.
ನಾಪತ್ತೆದ ಬಗೆಟ್ ಪೊಲೀಸೆರ್ ಜಡ್ತೆ ಮಲ್ಪುನಗ ಗುರುವಾರ ಬಯ್ಯಡ್ ಮುಜುಂಗಾವು ದೇಲಂತಡೆದ ಕೈತಲ್ ಕೆರೆಟ್ ಒಂಜಿ ಪುನ ಪಾಂಬೊಂದುಪ್ಪುನ ತೋಜಿದ್ ಬೈದ್ಂಡ್. ಅಗ್ನಿಶಾಮಕ ಬೊಕ್ಕ ರಕ್ಷಣಾ ಸೇವೆಲೆನ ಸಿಬ್ಬಂದಿ ಅಡೆಗ್ ಬತ್ತ್ದ್ ಪುನೊನು ನೀರ್ರ್ದ್ ಮಿತ್ತ್ ದೆತ್ತ್ದೆರ್.
ಬೊಕ್ಕ ಪುನತ ಮರಣೋತ್ತರ ಪರೀಕ್ಷೆಗ್ ಕಾಸ್ರೋಡ್ ಜನರಲ್ ಆಸ್ಪತ್ರೆಗ್ ಕಡಪುಡ್ದೆರ್. ನಡಪುದ ಬಗೆಟ್ ಕುಂಬ್ಳೆ ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.