Last updated on July 10th, 2026 at 11:31 am
ಒಡಿಪು ಜು. 10: ಶಾಲೆದ ಜೋಕುಲೆನ್ ಲೆತೊಂದು ಪೋವೊಂದಿತ್ತಿನ ಪ್ರೈವೇಟ್ ಶಾಲೆದ ಬಸ್ಸ್, ಡ್ರೈವರ್ನ ಅಂಕೆ ತತ್ತ್ದ್ ಸಾದಿ ಬರಿತ ತೋಡುಗು ಪೊರೆಲ್ದ್ ಬೂರ್ದಿನೆರ್ದಾವರ ಏಳ್ ಜನ ಜೋಕುಲೆಗ್ ಗಡಿಕುಲಾತಿನ ನಡಪು ಸರಳೆಬೊಟ್ಟು ಕೊಡಂಗೆ ದೇಲಂತಡೆದ ಕೈತಲ್ ಇನಿ (ಶುಕ್ರವಾರ) ಕಾಂಡೆ ನಡತ್ದ್ಂಡ್.
ಮಣಿಪಾಲದ ‘ಕ್ರೈಸ್ಟ್ ಇಂಗ್ಲಿಷ್ ಮೀಡಿಯಂ ಶಾಲೆ’ಗ್ ಸೇರ್ದಿನ ಬಸ್ ಉಂದಾದಿತ್ತ್ದ್, ಏಪೊಲ್ದ ಲೆಕ ಕಾಂಡೆ ಜೋಕುಲೆನ್ ಶಾಲೆಗ್ ಲೆತೊಂದು ಪೋವೊಂದಿತ್ತ್ಂಡ್. ಕೊಡಂಗೆ ದೇಲಂತಡೆದ ಕೈತಲ್ದ ತಿರ್ಗೆಲ್ಡ್ ಡ್ರೈವರ್ ಬಸ್ನ್ ರಿವರ್ಸ್ ದೆತ್ತೊಂದುಪ್ಪುನಗ ಅಂಕೆ ತತ್ತ್ದ್ ಬರಿಟೇ ಇತ್ತಿನ ತೋಡುಗು ಕಬ್ಬೆ ಬೂರ್ದುಂಡುಗೆ.
ಬೂರುನ ಪೊರ್ತುಡು ಬಸ್ಡ್ ಸುಮಾರ್ 20 ಜೋಕುಲು ಇತ್ತೆರ್. ಬಸ್ ಬೂರೊಂದಿತ್ತಿಲೆಕನೆ ಜೋಕುಲು ಪೋಡಿಗೆಡ್ ಕಲ್ಕೆರೆ ಪತ್ತ್ದಿತ್ತ್ದ್, ಕೈತಲ್ದಕುಲು ಅಪಗನೇ ಬಲಿತೊಂದು ಬತ್ತ್ದ್ ಜೋಕುಲೆನ್ ಕಾತ್ದೆರ್. ನಡಪುಡು ಏಳ್ ಜನ ಜೋಕುಲೆಗ್ ಕಿಞ್ಞ ಕಿಞ್ಞ ಗಡಿಕುಲಾದಿತ್ತ್ದ್, ಪ್ರೈವೇಟ್ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು.
ಜಾಗೆಗ್ ಮಣಿಪಾಲ ಪೊಲೀಸೆರ್ ಬತ್ತ್ದ್ ಪರಿಶೀಲನೆ ಮಲ್ತಿತ್ತ್ದ್, ಕ್ರೇನ್ಡ್ ಬಸ್ನ್ ಮಿತ್ತ್ ದೇರ್ತ್ದೆರ್. ಈ ನಡಪುಡು ಡ್ರೈವರ್ನ ಗೋಸ್ಮರಿದ ಬಗೆಟ್ ಪೊಲೀಸೆರ್ ಪ್ರಕರಣ ದಾಕಲ್ತೊಂದಿತ್ತ್ದ್ ಜಡ್ತೆ ಮಲ್ತೊಂದುಲ್ಲೆರ್.