Last updated on August 14th, 2026 at 12:31 pm
ಕೊಚ್ಚಿ, ಆ. 14: ಬೇತೆ ಆಣನ ಒಟ್ಟುಗು ನಿಶ್ಚಯ ಮಲ್ತೊಂದು ಮದಿಮೆ ಆವರೆ ಒತ್ತೊಂಡಿನೆಕ್ ಪಿಸ್‌ರ್‌ಡ್ ಮಾಜಿ ಪ್ರಿಯಕರೆ ಒರಿ, ಪಾತೆರುನ ನೆವನೊಡು ಮೋಕೆ ಮಲ್ತಿನಾಲೆನ್ ತನ್ನ ಇಲ್ಲಗ್ ಲೆಪ್ಪುಡಾದ್ ಬೀಸತ್ತಿ ಪಾಡ್ದ್ ಕೆರ್ತಿನ ನಡಪು ಕೇರಳದ ಉತ್ತರ ಪರವೂರ್‌ಡ್ ಗುರುವಾರ ನಡತ್‌ದ್ಂಡ್. ಚೂಂಡಿ ಮೂಲೊದ ಸುರಮ್ಯಾ (24) ತೀರ್ದಿನ ಪೊಣ್ಣು. ನಡಪುಗು ಸಂಬಂಧಿತ್‌ದ್ ತುರುತಿಪ್ಪುರಂ ಮೂಲೊದ ಶಿಬಿನ್ (34) ಪನ್ಪಿನಾಯನ್ ಪೊಲೀಸೆರ್ ಕೈದ್ ಮಲ್ತ್‌ದೆರ್.
ಪೊಲೀಸೆರೆ ಪ್ರಾಥಮಿಕ ಜಡ್ತೆದ ಪ್ರಕಾರ, ಸುರಮ್ಯಾ ಬೊಕ್ಕ ಶಿಬಿನ್ 2018 ರ್ದ್ ಪಣ್ಡ ಕಾಲೇಜ್ ದಿನೊರ್ದೇ ಒರಿಯನೊರಿ ಮೋಕೆ ಮಲ್ತೊನ್ದಿತ್ತೆರ್‌ಗೆ. ಆಂಡ ಇಂಚಿಪ ಕೆಲ ಭಿನ್ನಾಭಿಪ್ರಾಯೊಡು ಕರಿನ ನಾಲ್ ತಿಂಗೊಲುರ್ದಿಂಚಿ ಕಾಲಿ ಇನ್‌ಸ್ಟಾಗ್ರಾಮ್‌ ಮುಕೇನ ಮಾತ್ರ ಸಂಪರ್ಕೊಡು ಇತ್ತೆರ್. ಈ ನಡುಟು ಸುರಮ್ಯಾ ಬೇತೆ ಒರಿ ಆಣಗ್ ಮುಟ್ಟ ಆದಿತ್ತ್‌ದ್, ಆಯನೇ ಮದಿಮೆ ಆಪುನು ಪನ್ದ್ ಅಂಚೆನೇ ಶಿಬಿನ್‌ನ ಒಟ್ಟುಗು ಸಂಬಂಧ ದುಂಬರಿಪರೆ ಇಷ್ಟ ಇಜ್ಜಿ ಪನ್ದ್ ಪನ್ದಿತ್ತಲ್. ಇಂದೆರ್ದಾವರ ಶಿಬಿನ್‌ನ ಪಿತ್ತ್ ತರೆಕ್ ಏರ್ದ್ಂಡ್.
ಗುರುವಾರ ಕಾಂಡೆ ಇಲ್ಲರ್ದ್ ಪಿದಡ್ದಿತ್ತಿನ ಸುರಮ್ಯಾನ್ ಸಮಸ್ಯೆಗ್ ಪಿರಿಕಟ್ಟ್ ಮಲ್ತೊನುಗ ಪನ್ದ್ ನಂಬಾಯಿನ ಶಿಬಿನ್, ಪರವೂರ್ ಬಸ್ ಉಂತಡೆಡ್ ತಿಕ್ಕ್‌ದ್ ತನ್ನ ಬೈಕ್‌‌ಡ್ ವಡಕ್ಕೇಕರದ ಮುರವೆಂತುರುತ್‌ ಡ್ ಇಪ್ಪುನ ಆಯನ ಇಲ್ಲಗ್ ಲೆತೊಂದು ಪೋದಿತ್ತೆ. ಕಾಂಡೆ 10 ಗಂಟೆದ ಅಂದಾಜಿಗ್ ಇರ್ವೆರ್ಲಾ ಶಿಬಿನ್‌ನ ಇಲ್ಲದ ಅದೆಟ್ ಪಾತೆರೊಂದುಪ್ಪುನಗ ಲಡಯಿ ಜೋರಾತ್ಂಡ್. ಪಿಸ್‌ರ್‌ಡ್ ಶಿಬಿನ್ ಅಡ್ಪಿಲ್ಲ್‌ರ್ದ್ ಬೀಸತ್ತಿ ಕನತ್‌ದ್ ಸುರಮ್ಯಾ ನ ಮಿತ್ತ ಭೀಕರವಾದ್ ಲಾಗಿದೆ. ಅದೆರ್ದ್ ಕಲ್ಕುನ ಕೇನ್ನಗ ಶಿಬಿನ್‌ನ ಅಪ್ಪೆ ಅಮ್ಮೆ ಬಾಕಿಲ್ ಬೊಟ್ಟ್ಂಡಲಾ ದೆಪ್ಪಂದೆ, 10 ನಿಮಿಷ ಕರಿದ್ ಬಾಕಿಲ್ ದೆತ್ತ್‌ದೆ.
ಗಾತಿದ ಗಡಿಕುಲಾದಿತ್ತಿನ ಸುರಮ್ಯಾನ್ ಅಪಗನೇ ಪರವೂರ್ ತಾಲೂಕು ಆಸ್ಪತ್ರೆಗ್ ದಾಕಲ್ತ್ಂಡಲಾ ಮರ್ದ್ ಪಲಿಪಂದೆ ಆಲ್ ತೀರ್ದಲ್. ಕೆರಿಬೊಕ್ಕ ಆರೋಪಿ ಶಿಬಿನ್ ವಡಕ್ಕೇಕರ ಪೊಲೀಸ್ ಸ್ಟೇಶನ್‌ಗ್ ಪೋದು ಸರೆಂಡರ್ ಆದಿತ್ತ್‌ದ್, ಪೊಲೀಸೆರ್ ಆಯನ್ ಕೈದ್ ಮಲ್ತ್‌ದ್ ಜಡ್ತೆ ಮಲ್ತೊಂದುಲ್ಲೆರ್.