Last updated on August 14th, 2026 at 08:39 am
ಕಡಬ, ಆ. 14: ಲವ್ ಮಲ್ಪು ಪನ್ದ್ ಒತ್ತಾಯ ಮಲ್ತ್ದ್ ಕಾಲೇಜ್ ಕಲ್ತೊಂದಿತ್ತಿನ ಒರ್ತಿ ಪೊಣ್ಣನ ಬೆರಿಯೆ ದಿನೋಲಾ ಓಂಗೊಂದು ಕಿರುಕುಳ ಕೊರ್ತಿನತ್ತಂದೆ, ಆಲೆನ ಇಲ್ಲದಕಲೆನ್ ಕೆರ್ಪೆ ಪನ್ದ್ ಪೋಡಿಕಟ್ಟಾದ್ ಅಂಚೆನೇ ಆಲೆನ ದೋಸ್ತಿನಕ್ಲೆಗ್ಲಾ ಪೋಡಿಕಟ್ಪಾದಿನ ನಡಪು ಕಡಬ ಪೊಲೀಸ್ ಸ್ಟೇಶನ್ ಸೀಮೆದ ಚಾರ್ವಾಕ ಗ್ರಾಮೊಡು ನಡತಿತ್ತ್ದ್, ಆರೋಪಿನ ಮಿತ್ತ್ ಕಡಬ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್. ಕಡಬ ತಾಲೂಕ್ದ ಚಾರ್ವಾಕ ಗ್ರಾಮೊದ ಪದ್ಮನಾಭೆ ಪನ್ಪಿನಾಯೆನೇ ಪ್ರಕರಣೊದ ಆರೋಪಿ.
18 ವರ್ಸ ಪ್ರಾಯೊದ ಜವನ್ದಿ ಒಂಜಿ ಕಾಲೇಜ್ಡ್ ಕಲ್ತೊಂದುಲ್ಲಲ್. ಆಲ್ ಇಲ್ಲಗ್ ಬರ್ಪಿ ಸಾದಿಡ್ ಪದ್ಮನಾಭೆ ಪನ್ಪಿನಾಯೆ ಏಪೊಲಾ ಬೆರಿಯೆ ಬರ್ಪುನ ಮಲ್ಪೆದೆ. ಈ ಬಗೆಟ್ ಪೊಣ್ಣನ ಇಲ್ಲದಕುಲು ಆರೋಪಿಗ್ ಎಚ್ಚರ್ಗೆ ಕೊರ್ನ್ಡಲಾ, ಆಯೆ ತನ್ನ ಓಂಗುನ ಬುದ್ದಿ ಬುಡ್ತಿಜೆಗೆ. ಜುಲೈ 29ದಾನಿ ಪೊಣ್ಣು ಕಾಲೇಜ್ರ್ದ್ ಇಲ್ಲಗ್ ಬರೊಂದುಪ್ಪುನಗ ಆರೋಪಿ ಕುಡ ಆಲೆನ ಬೆರಿಯೆ ಪೋದು, “ಯಾನ್ ನಿನನ್ ಕೆರಂದೆ ಬುಡ್ಪುಜಿ, ಯಾನ್ ಸೈಪೆ” ಪನ್ದ್ ಪೊಣ್ಣನ ಅಪ್ಪೆ ಬೊಕ್ಕ ಪಲಿಗ್ ಕೇನುಲೆಕ ಪೋಡಿಕಟ್ಟಾದೆ. ಆತೇ ಅತ್ತಂದೆ, ಆಗಸ್ಟ್ 10ತಾನಿ ಕುಡ ಬೆರಿಯೆ ಬತ್ತ್ದ್, ಆಲೆನ ಪಲಿಗ್ ಫೋನ್ ಮಲ್ತ್ದ್ “ಆಲ್ ಎನಡ ಪಾತೆರ್ಜಲ್ನ್ಡ ಯಾನ್ ಸೈಪೆ” ಪನ್ದ್ ಪೋಡಿಕಟ್ಟಾದೆಗೆ.
BNS ಕಾಯ್ದೆದಡಿಟ್ ಕೇಸ್
ಲವ್ ಮಲ್ಪು ಪನ್ದ್ ಬೆರಿಯೆ ಓಂಗೊಂದು ಕಿರುಕುಳ ಕೊರೊಂದಿತ್ತಿನ ಆರೋಪದ ಬಗೆಟ್ ಪೊಣ್ಣು ಆಗಸ್ಟ್ 11ತಾನಿ ಕಡಬ ಪೊಲೀಸ್ ಸ್ಟೇಷನ್ಡ್ ಬರೆಪಾದಿನ ಒಯಿಲ್ದ ಆಧಾರೊಡು ಪ್ರಕರಣ ದಾಕಲ್ತೊಂದೆರ್. ಕಡಬ ಪೊಲೀಸೆರ್ ಅಪರಾಧ ಸಂಖ್ಯೆ 96/2026 ಟ್ BNS 2023ರ ಕಲಂ 78(2) ಬೊಕ್ಕ 351(2)ತ ಅಡಿಟ್ ಎಫ್ಐಆರ್ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.