Last updated on August 27th, 2026 at 10:45 am
ಕುಡ್ಲ, ಆ. 27: ತನ್ನ ಸ್ವಂತ ಸಂಗಡಿನೇ ಸುತ್ಯೆಡ್ ಆಕ್ದ್ ಭೀಕರವಾದ್ ಕೆರ್ತಿನ ಆರೋಪಿಗ್ ಕುಡ್ಲದ 2ನೇ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸೆಷನ್ಸ್ ನ್ಯಾಯಂತಡೆ ಶಿಕ್ಷೆ ಕೊರ್ದು ತೀರ್ಪು ಪ್ರಕಟ ಮಲ್ದ್ಂಡ್. ಕೊಣಾಜೆ ಪೊಲೀಸ್ ಸ್ಟೇಶನ್ ಸೀಮೆದ ಕಂಬುಲಪದವು ನಿವಾಸಿ ಸ್ಯಾಮ್ಸನ್ ಫ್ರಾನ್ಸಿಸ್ ಕುಟಿನ್ಹಾ ಶಿಕ್ಷೆ ಆತಿನ ಅಪರಾಧಿ.
ನ್ಯಾಯಂತಡೆ ಐಪಿಸಿ ಕಲಂ 304 (II) ದ ಪ್ರಕಾರ ಅಪರಾಧಿಗ್ 4 ವರ್ಷ ಕರ್ಪಿಲ್ಲ ಶಿಕ್ಷೆ ಬೊಕ್ಕ ₹10,000 ದಂಡ ಅಂಚೆನೇ ಸಾಕ್ಷ್ಯ ನಾಶ ಮಲ್ತಿನೆಕ್ ಐಪಿಸಿ ಕಲಂ 201ತ ಪ್ರಕಾರ 1 ವರ್ಷ ಶಿಕ್ಷೆ ಬೊಕ್ಕ ₹1,000 ದಂಡ ಪಾಡ್ದ್ ಸೋಮವಾರ ಆದೇಶ ಕೊರ್ತುಂಡು.
2019ದ ಆಕ್ಟೋಬರ್ಡ್ 8 ಪೋಪುನಾನಿ ಮಧ್ಯಾಹ್ನ ಅಂದಾಜಿ 12 ಗಂಟೆಗ್ ಕಂಬುಲಪದವುಡು ಇಪ್ಪುನ ಇಲ್ಲಡ್ ಆರೋಪಿ ಸ್ಯಾಮ್ಸನ್, ತನ್ನ ಸಂಗಡಿ ಫಿಯೋನಾ ಸ್ವೀಡಲ್ ಕುಟಿನ್ಹಾ ಡ ಮೊಬೈಲ್ ಫೋನ್ ಗಲಸೆರೆ ಕೇನ್ದಿತ್ತೆ. ಈ ವಿಚಾರೊಡು ಇರ್ವೆರೆ ನಡುಟು ಪಾತೆರೊಗು ಪಾತೆರ ಬುಲೆದ್ಂಡ್. ಈ ಪೊರ್ತುಡು ಪಿತ್ತ್ ಗೆಜಲಿನ ಸ್ಯಾಮ್ಸನ್, ಸುತ್ಯೆಡ್ ಸಂಗಡಿನ ತರೆಕ್ ಜೋರುಡು ಆಕ್ದ್ ಕೆರ್ತೆ. ಬೊಕ್ಕ ಸಾಕ್ಷ್ಯ ನಾಶ ಮಲ್ಪುನ ಉದ್ದೇಶೊಡು ಆಲೆನ ಪುನೊನು ಇಲ್ಲ ಬಿತ್ತ್ಲ್ದ ಬಲ್ಲೆಡ್ ದೆಂಗಾದ್ ದೀದಿತ್ತೆ.
ನಡಪುರ್ದ್ ಬೊಕ್ಕ ಮಗಲ್ ತೋಜೊಂದಿಜ್ಜಲ್ ಪನ್ದ್ ತೀರ್ದಿನ ಫಿಯೋನಾನ ಅಮ್ಮೆರ್ ಫ್ರಾನ್ಸಿಸ್ ಕುಟಿನ್ಹಾ ಮೇರ್ ಪೊಲೀಸೆರೆಡ ಒಯಿಲ್ ಬರೆಪಾದೆರ್. ಈ ಒಯಿಲ್ದ ಪ್ರಕಾರ ಪೊಲೀಸೆರ್ ಕಿಡ್ನಾಪ್ ಪ್ರಕರಣ (ಕಲಂ 363 ಐಪಿಸಿ) ದಾಕಲ್ತೊಂಡೆರ್. ಪ್ರಕರಣೊದ ಜಡ್ತೆ ಮಲ್ತಿನ ತೆನ್ಕಾಯಿ ಕುಡ್ಲ ಉಪವಿಭಾಗೊದ ಅಪಗದ ಎಸಿಪಿ ಟಿ. ಕೋದಂಡ ರಾಮ್ ಮೇರ್, ಜಡ್ತೆ ಮಲ್ತ್ದ್ ಕೆರ್ತಿನ ರಹಸ್ಯೊಲೆನ್ ಮಾತಾ ಬುಡ್ಪಾದೆರ್. ಜಡ್ತೆ ಮುಗಿತಿನ ಪೊಲೀಸೆರ್, 2020ದ ಜನವರಿ 10 ತಾನಿ ನ್ಯಾಯಂತಡೆಕ್ ಕಲಂ 302 ಬೊಕ್ಕ 201 ಐಪಿಸಿ ಅಡಿಟ್ ದೋಷಾರೋಪಣಾ ಪಟ್ಟಿ ಸಂದಾದೆರ್.
ಪ್ರಕರಣೊದ ಸಮಗ್ರ ವಿಚಾರಣೆ ಮಲ್ತಿನ ಕುಡ್ಲದ 2ನೇ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸೆಷನ್ಸ್ ನ್ಯಾಯಂತಡೆ, ತೇದಿ 24-08-2026 ತಾನಿ ಆರೋಪಿಗ್ ಶಿಕ್ಷೆ ಪ್ರಕಟ ಮಲ್ದ್ಂಡ್.