Last updated on August 10th, 2026 at 02:24 pm
ದೇರಳಕಟ್ಟೆ, ಆ. 10: ಬೆಳ್ಮ ಗ್ರಾಮ ಪಂಚಾಯಿತಿ ಸೀಮೆದ ಮಾಗಣ್ತಡಿ ಪ್ರದೇಶೊದ ಜನೊಕುಲು ಎಚ್ಚ ಆತಿನ ಗಲೇಜಿ ನೀರ್ದ ಸಮಸ್ಯೆಗ್ ಸ್ಥಳೀಯ ಆಡಳಿತ ಸ್ಪಂದನೆ ಮಲ್ಪಂದಿನೆರ್ದಾವರ ಪೊಸ ರೀತಿಡ್ ಪ್ರತಿಭಟನೆ ಮಲ್ತ್ದೆರ್.
ಸಮಸ್ಯೆಗ್ ಪಿರಿಕಟ್ಟ್ ಮಲ್ಪೆರೆ ಪಾಕ ಸರ್ತಿ ಬಿನ್ನಪು ಸಂದಾಂಡಲಾ, ಅಧಿಕಾರಿಲೆನ ಕಚೇರಿಗ್ ನಟ್ಟ್ತಿರ್ಗ್ಂಡಲಾ ಒವ್ವೇ ಪ್ರೇಜನ ಆವಂದಿನೆರ್ದಾವರ ಗ್ರಾಮಸ್ಥೆರ್ ಇತ್ತೆ ಸಮಸ್ಯೆಗ್ ಅಕುಲೇ ಪಿರಿಕಟ್ಟ್ ಮಲ್ತೊನರೆ ಪಿದಡ್ದೆರ್. ಗಲೇಜಿ ನೀರ್ ಬುಡೊಂದುಲ್ಲೆರ್ ಪನ್ಡ್ದ್ ಆರೋಪ ಇಪ್ಪುನ ಬರ್ಸದ ನೀರ್ ಪೋಪುನ ಕಣಿನೇ ಮಣ್ಣ್ ಪಾಡ್ದ್ ಬಂದ್ ಮಲ್ಪುನ ಮುಕೇನ ಪ್ರತಿಭಟನೆ ಮಲ್ತ್ದೆರ್.
ಕೈತಲ್ದ ವಾಣಿಜ್ಯ ಕಟ್ವಾನೊಲೆರ್ದ್ ಬೊಕ್ಕ ಲಾಡ್ಜ್ಲೆರ್ದ್ ಗಲೇಜಿ ನೀರ್ ಬೊಕ್ಕ ಮಾನವ ತ್ಯಾಜ್ಯೊನು ಬರ್ಸದ ನೀರ್ ಪರಪೊಡಾಯಿನ ಕಣಿಕ್ ಬೂಡೊಂದುಲ್ಲೆರ್ ಪನ್ದ್ ಗ್ರಾಮಸ್ಥೆರ್ ಆರೋಪ ಮಲ್ತ್ದೆರ್. ಈ ಗಲೇಜಿ ನೀರ್ ಬೊಕ್ಕ ಮಾಗಣ್ತಡಿಗ್ ಸಂಪರ್ಕ ಮಲ್ಪುನ ಸಾದಿದಂಚಿ ಬರೊಂದುಂಡು. ಅಂಚಾದ್ ತಡೆಯೆರಾವಂದಿ ವಾಸನೆ ಬೊಕ್ಕ ಅಸ್ವಚ್ಛ ವಾತಾವರಣ ಉಂಡಾದ್, ಈ ಸಾದಿಯೆ ಪೋಪಿನ ಬರ್ಪಿನಕಲೆಗ್ ಬಾರೀ ಉಪದ್ರ ಆತ್ಂಡ್.
ಈ ಬಗೆಟ್ ಗ್ರಾಮಸ್ಥೆರ್ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿಡ ಪಾಕ ಸರ್ತಿ ಒಯಿಲ್ ಬರೆಪಾಂಡಲಾ, ಅಕಲೆನ ಬಿನ್ನಪುನು ಗೆನ್ತೊಂದೇ ಇಜ್ಜೆರ್ ಪನ್ದ್ ಆರೋಪ ಮಲ್ತ್ದೆರ್.
ಅಧಿಕಾರಿಲೆನ ಈ ನಾಮಾಸ್ರ್ದಾವರ ಸೋತ್ದ್ ಕಡೆಕ್ ಊರದಕುಲು ಕಣಿಕ್ ಮಣ್ಣ್ ದಿಂಜಾದ್ ಗಲೇಜಿ ನೀರ್ ಪರಪುನೆನ್ ಉಂತಾದೆರ್. ಈ ಪೊರ್ತುಡು, ವಾಣಿಜ್ಯ ಕಟ್ವಾನೊಲು ಬೊಕ್ಕ ಲಾಡ್ಜ್ಲೆಗ್ ಲೈಸೆನ್ಸ್ ಕೊರ್ನಗ ನಿಯಮ ಉಲ್ಲಂಘನೆ ಮಲ್ತೊಂದುಲ್ಲೆರಾ ಪನ್ಪಿ ಪ್ರಶ್ನೆನ್ಲಾ ಕೇನೊಂದುಪ್ಪುನ ಗ್ರಾಮಸ್ಥೆರ್, ಲಂಚ ಗೆತೊಂದು ನಿಯಮೊಲೆನ್ ಪೊಲ್ತೊಂದುಲ್ಲೆರ್ ಪನ್ದ್ ಮಕ್ಕರ್ ಮಲ್ತ್ದೆರ್.
ಈ ಸಮಸ್ಯೆಗ್ ನಡುಕು ಬತ್ತ್ದ್ ಬೋಡಾಪಿನ ಪಿರಿಕಟ್ಟ್ ಮಲ್ತ್ ಕೊರ್ರೆ ಆರೋಗ್ಯ ಸಚಿವೆ ಯು.ಟಿ. ಖಾದರ್ ಮೆರೆಡಲಾ ಗ್ರಾಮಸ್ಥೆರ್ ಬಿನ್ನಪು ಮಲ್ತೊಂದೆರ್.
ಈ ಸಮಸ್ಯೆಗ್ ನೆವನ ಆತಿನಕಲೆನ ಮಿತ್ತ್ ಗ್ರಾಮಸ್ಥೆರ್ ಅಕಲೆಗ್ ಪೊಕ್ಕಡೆ ಆಪಿನಂಚಿನ ಸೊಲ್ಲಂಜೊಲೆನ ಮುಕೇನ ಆಕ್ರೋಶ ತೋಜಾದಿತ್ತ್ದ್, ಕಣಿಕ್ ಗಲೇಜಿ ನೀರ್ ಬುಡ್ಪುನಕಲೆನ್ ಖಂಡನೆ ಮಲ್ಪುನೆತ ಒಟ್ಟುಗು, ಪರಿಸ್ಥಿತಿಗ್ ನೆವನ ಆತಿನಕಲೆಗ್ ‘ಹೃತ್ಪೂರ್ವಕ ಶ್ರದ್ಧಾಂಜಲಿ’ ಪನ್ಪಿ ರೀತಿಡ್ ಮಕ್ಕರ್ ಮಲ್ತ್ದೆರ್.
ಇತ್ತೆ ಮಾಗಣ್ತಡಿ ನಿವಾಸಿಲೆನ ಸಮಸ್ಯೆದಂಚಿ ಆಡಳಿತ ನನ ಆಂಡಲಾ ಗುಮನ ಕೊರ್ದು ಬೋಡಾಪಿನ ಕ್ರಮ ಗೆತೊನುಂಡಾ ಅತ್ತ್ ನನದ ಮರ್ಯಾಲ ಮುಟ್ಟ ಈ ಸಮಸ್ಯೆನ್ ಇಂಚೆನೇ ಎದುರು ಕೊನೊಪೆರಾ ಪನ್ದ್ ಕಾತ್ದ್ ತೂವೊಡಾತೆ.