Last updated on August 31st, 2026 at 10:51 am
ಕುಡ್ಲ, ಆ. 31: ಕ್ಷುಲ್ಲಕ ನೆವನೊಗು ನಡತಿನ ಲಡಯಿಡ್ ಮೆಗ್ಯೆನೇ ಬೀಸತ್ತಿ ಪಾಡ್ದ್ ಸ್ವಂತ ಪಲಯನ್ ಭೀಕರವಾದ್ ಕೆರ್ತಿನ ನಡಪು ಕುಡ್ಲದ ಬಿಜೈ ಕೊಟ್ಟಾರ ಕ್ರಾಸ್ ಕೈತಲ್ ಐತಾರ (ಆಗಸ್ಟ್ 30) ರಾತ್ರೆ ನಡತ್ದ್ಂಡ್. ಬೆಳಗಾವಿ ಜಿಲ್ಲೆದ ಬೈಲಹೊಂಗಲ ಮೂಲೊದ ಅಡಿವೆಪ್ಪೆ (40) ಸೈದಿನಾಯೆ. ಆಯನ ಮೆಗ್ಯೆ ರಾಜು (36) ಕೆರ್ತಿನ ಆರೋಪಿ ಆದುಲ್ಲೆ.
ಅಡಿವೆಪ್ಪೆ ಬೊಕ್ಕ ರಾಜು ಅಕ್ಲೆನ ಅಪ್ಪೆನೊಟ್ಟು ಕೊಟ್ಟಾರ ಕ್ರಾಸ್ದ ಬಾಡಾಯಿದಿಲ್ಲಡ್ ಇತ್ತೆರ್. ಅಪ್ಪೆ ಎಲ್ಯ ಗೂಡಂಗಡಿ ನಡಪಾವೊಂದಿತ್ತ್ಂಡ, ಇರ್ವೆರ್ ಮೆಗ್ಯೆ-ಪಲಯರ್ಲು ಕೂಲಿ ಬೇಲೆ ಮಲ್ತೊಂದಿತ್ತೆರ್. ಇರ್ವೆರ್ಲಾ ರಣ ಕುಡ್ಚೆಲೆರ್ಗೆ.
ಐತಾರ ರಾತ್ರೆ 10:30 ರ್ದ್ 11 ಗಂಟೆದ ನಡುಟು ಪರ್ತಿನ ಅಮಲ್ಡ್ ಇರ್ವೆರೆ ನಡುಟು ಒವ್ವಾ ಇಸಯೊಡು ಲಡಯಿ ಆತ್ಂಡ್. ಈ ಪೊರ್ತುಡು ಪಿತ್ತ್ ಗೆಜಲ್ದ್ ಮೆಗ್ಯೆ ರಾಜು, ಪಲಯೆ ಅಡಿವೆಪ್ಪಗ್ ಬೀಸತ್ತಿ ಪಾಡ್ದೆ. ಅಪ್ಪೆ ರಾತ್ರೆ ಅಂಗಡಿ ಮುಚ್ಚಿದ್ ಇಲ್ಲಗ್ ಬತ್ತ್ದ್ ತೂನಗ ಅಡಿವೆಪ್ಪೆ ನೆತ್ತೆರ್ದ ಮಡುಟು ಬೂರ್ದಿನ ತೋಜಿದ್ ಬೈದ್ಂಡ್. ಅಪಗನೇ ಆಯನ್ ಮರ್ದ್ಗ್ ವೆನ್ಲಾಕ್ ಆಸ್ಪತ್ರೆಗ್ ಲೆತೊಂದು ಪೋಂಡಲಾ, ಪರೀಕ್ಷೆ ಮಲ್ತಿನ ಡಾಕ್ಟರ್ ಆ ಪೊರ್ತುಗಾನಗ ಆಯೆ ತೀರ್ದೆ ಪನ್ದ್ ತೆರಿಪಾದೆರ್.
ಜಾಗೆಗ್ ಉರ್ವ ಪೊಲೀಸ್ ಸ್ಟೇಶನ್ ಸಿಬ್ಬಂದಿ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಆರೋಪಿ ಮೆಗ್ಯೆ ರಾಜುನ ಮಿತ್ತ್ ಪ್ರಕರಣ ದಾಕಲ್ತೊಂದು, ಬೋಡಾಪಿನ ಕಾನೂನು ಕ್ರಮ ಗೆತೊಂದೆರ್.