Last updated on August 31st, 2026 at 12:36 pm
ಕಿನ್ನಿಗೋಳಿ, ಆ. 31: ಕಿನ್ನಿಗೋಳಿ ಪೆಂಟೆಡ್ ನಡುಸಾದಿಡೇ ಗುಂಡಿ ಬೂರ್ದ್ ಪಾಕ ಸಮೆ ಆದಿತ್ತ್ಂಡಲಾ, ಸಾರ್ವಜನಿಕೆಗ್, ಟೂವೀಲರ್ಲೆಡ್, ಗಾಡಿಲೆಡ್ ಪೋಪುನಕಲೆಗ್ ಬಾರೀ ಉಪದ್ರ ಆವೊಂದಿತ್ತ್ಂಡ್ಲಾ, ಪಟ್ಟಣ ಪಂಚಾಯತ್ ಈ ಸಮಸ್ಯೆನ್ ಗೆನ್ಪಂದಿನೆರ್ದಾವರ ಸಾರ್ವಜನಿಕೆರ್ ಆ ಗುಂಡಿಡ್ ಬಾರೆದ ದಯಿ ನಡ್ದ್ ವಿಶಿಷ್ಟ ಪ್ರತಿಭಟನೆ ಮಲ್ತ್ದೆರ್.
ಕಿನ್ನಿಗೋಳಿ ಪೇಂಟೆರ್ದ್ ಗುತ್ತಕಾಡ್ ಪೋಪಿನ ರೋಡ್ಡ್, ರಿಕ್ಷಾ ಸ್ಟ್ಯಾಂಡ್ದ ಎದುರೇ ಒಂಜಿ ಗುಂಡಿ ಬೂರ್ದ್ ಪಾಕ ಸಮೆ ಆದಿತ್ತ್ಂಡಲಾ ಒರ ಕಾಲಿ ಮಿತ್ತ್ರ್ದ್ ತೇಪೆ ಪಾಡಿಲೆಕ ಮಲ್ತ್ದ್ ಕೈ ದೆಕ್ಕೊಂದಿನ ಪಟ್ಟಣ ಪಂಚಾಯತ್ದ ಮಿತ್ತ್ ಪಿಸ್ರಾದ್ ಸಾರ್ವಜನಿಕೆರ್ ಈ ಕಜ್ಜೊಗು ಕೈ ಪಾಡ್ದೆರ್. ಮುಲ್ಪ ಅಡಿಟ್ ನೀರ್ದ ಪೈಪ್ ಪುಡದಿಪ್ಪುನೆರ್ದಾವರ, ಆ ಪೈಪ್ದ ಬೇಲೆ ಸಮ ಆವಂದೆ, ಏತೇ ರೋಡ್ ರಿಪೇರಿ ಮಲ್ತ್ಂಡಲಾ ಪ್ರೇಜನ ಇಜ್ಜಿ, ಪೈಪ್ದ ಲೀಕೇಜ್ ಉಂತಾದ್ ಬೊಕ್ಕ ರೋಡ್ ಸಮ ಮಲ್ಪೊಡು ಪನ್ಪಿನ ಮುಲ್ಪದ ಸಾರ್ವಜನಿಕೆರೆ ಪಾತೆರ. ಒಂತೆ ಸಮೆ ದುಂಬು ರಿಪೇರಿ ಮಲ್ತಿತ್ತ್ಂಡಲಾ ಇತ್ತೆ ಕುಡ ಗುಂಡಿ ಆದ್ ನೀರ್ ಉಂತುದು ಗಾಡಿಡ್ ಪೋಪುನಕಲೆಗ್ ಮಾತಾ ಬಾರೀ ಉಪದ್ರ ಆತ್ಂಡ್. ಈ ಬಗೆಟ್ ನನಲಾ ಗೇನ ಕೊರಂದಿನ ಪಟ್ಟಣ ಪಂಚಾಯತ್ದ ಗೇನ ಒಯ್ಪೆರ ಸಾರ್ವಜನಿಕೆರ್ ಈ ನಮುನೆದ ಕಸರತ್ತ್ ಮಲ್ಪೊಡಾದ್ ಬೈದ್ಂಡ್.
ಈ ಬಗೆಟ್ ತೆರಿನನೇ ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಅಧಿಕಾರಿಲು ಬತ್ತ್ದ್ ಫೋಟೋ ಕಲೆದ್ ಪೋದಿತ್ತ್ದ್, ಆಯಿನಾತ್ ಬೇಗ ಈ ತಲೆಪುಗೊಂಜಿ ಪಿರಿಕಟ್ಟ್ ಆವಡ್ ಪನ್ಪಿ ನಿರೀಕ್ಷೆಡ್ ಸಾರ್ವಜನಿಕೆರ್ ಉಲ್ಲೆರ್.