Last updated on August 31st, 2026 at 05:50 pm
ಕಿನ್ನಿಗೋಳಿ, ಆ. 31: ಪಾಕ ಜನೊಕುಲು, ಗಾಡಿಲು ಪೋಪುನ ಕಿನ್ನಿಗೋಳಿ- ಗುತ್ತಕಾಡ್ ಸಾದಿಡ್ ಕಿನ್ನಿಗೋಳಿ ಬಸ್ ಉಂತಡೆದ ಬರಿಟೆ ಇನಿ ಕಾಂಡೆ ಕಾಂಡೆ ತೂಯಿನಕಲೆಗ್ ಮಾತ ಬಾರೀ ಸೋದ್ಯ! ನಡು ಸಾದಿಡ್ ಕುತ್ತ ಬಾರೆ ಒಂಜಿ ಉಂತುದುಂಡು!
ನಡುಸಾದಿಡ್ ಇತ್ತಿನ ಗುಂಡಿ ಒಂಜಿ ಮಲ್ಲೆ ಆದ್, ನೀರ್ ಉಂತುದು, ಪೋಪುನ ಬರ್ಪುನಕುಲು ಬೂರುನ ಪೋಡಿಗೆಡೇ ಕಡಪೊಡಾಯಿನ ನೇಲ್ಯ ಗುಂಡಿ ನನಲಾ ದಾನೆ ಆಡಳಿತದಕಲೆಗ್ ತೋಜಿದಿಜಿ, ನನ ಜೂವೊಗು ಎಚ್ಚಿಕಮ್ಮಿ ಆಪುನೇಟ ಕಾಪುನ ಬೊರ್ಚಿ ಪನ್ದ್ ಅಕಲೆನ ಗೇನ ಇಂಚಿ ಒಯ್ಪೆರೆ ಕಿನ್ನಿಗೋಳಿದ ಸಾರ್ವಜನಿಕೆರ್ ಮಲ್ತಿನ ಐಡಿಯಾ. ನಡುಸಾದಿಡ ಮರಣಗುಂಡಿಡ್ ಬಾರೆ ನಡ್ದ್ ನಾಲ್ ದಾಸವಾಳ ಪೂ ದೀತೆರ್. ಈ ವಿಷಯ ವೈರಲ್ ಆಯಿನೇ ಅಧಿಕಾರಿಲು ಬತ್ತ್‌ದ್ ತೂದು ಬಯ್ಯಾವೊಡ್ಡ ಬೋಡಾಪಿನ ಕ್ರಮ ಗೆತೊಂದೆರ್.
ರೋಡ್‌ದ ಅಡಿಟ್ ಪರ್ಪಿನೀರ್‌ದ ಪೈಪ್ ಪುಡಾದ್ ಏಪೊಲಾ ನೀರ್ ಒಸರ್‌ದ ಲೆಕ ಪರತೊಂದು, ಏತ್ ರೋಡ್ ರಿಪೇರಿ ಮಲ್ತ್ಂಡಲಾ ಉಂತೆದಿಜಿ. ಮೂಲಸಮಸ್ಯೆಗ್ ಪಿರಿಕಟ್ಟ್ ಮಲ್ಪಂದೆ ಏತೇ ಸರ್ತಿ ಗುಂಡಿ ಮುಚ್ಚಿಂಡಲಾ ಪ್ರೇಜನ ಇಜ್ಜಿ ಪನ್ದ್ ಸಾರ್ವಜನಿಕೆರ್ ತೆರಿಪಾಯಿನೆರ್ದಾವರ ಇತ್ತೆ ಪೈಪ್‌ಲೈನ್ ಒಕ್ಕುದ್, ಪುಡತಿನ ಪೈಪ್‌ನ್ ಸಮ ಮಲ್ತ್‌ದ್ ಬೊಕ್ಕ ಗುಂಡಿನ್ ಮುಚ್ಚೆರೆ ಆಡಳಿತ ಪಿದಾಡ್ದ್ಂಡ್.
ಈ ಸಮಸ್ಯೆ ದೂರ ಆವರೆ ಬಾರೆ ನಡೊಡಾದ್ ಬತ್ತ್ಂಡ್. ನನ ಕಿನ್ನಿಗೋಳಿರ್ದ್ ಮುಲ್ಕಿ ಮುಟ್ಟದ ಸಾದಿ ಸಮ ಆವೊಡಾಂಡ ಬಾರೆದ ತೋಟೊನೇ ಸಾದಿ ಉದ್ದ ಮಲ್ಪೊಡಾವು ಪನ್ದ್ ಈ ಪೊರ್ತುಡು ಸಾರ್ವಜನಿಕೆರ್ ಪಾತೆರೊಂಡೆರ್.
ಎಂಚಲಾ ಕಾಂಡೆ ಒಂಜಿ ಬಾರೆ ನಡ್ನೆರ್ದಾವರ ಬಯ್ಯಾನಗ ರೋಡ್ ಸಮ ಆಪಿಲೆಕ ಆಂಡ್. ಬಯ್ಯಾನಗ ಬಾರೆ ಫಲ ಕೊರ್ಂಡ್!