Last updated on September 5th, 2026 at 08:46 am
ಪುತ್ತೂರ್, ಸೆ. 04: ಪೆರ್ಸಾದಿದ ಬರಿಟ್ ಉಂತಾದಿತ್ತಿನ ಗಾಡಿಲೆನ ಡಿಸೆಲ್ ಟ್ಯಾಂಕ್ರ್ದ್ ಡಿಸೇಲ್ ಕಂಡೊನ್ದಿತ್ತಿನ ಪ್ರಕರಣೊಗು ಸಂಬಂಧಿತ್ದ್ ಇರ್ವೆರ್ ಆರೋಪಿಲೆನ್ ಉಬಾರ್ ಪೊಲೀಸೆರ್ ಕೈದ್ ಮಲ್ತ್ದೆರ್.
ಮಂಡ್ಯ ಮದ್ದೂರು ನಿವಾಸಿಲಾಯಿನ ಜೈಮುತ್ತಾ (23) ಬೊಕ್ಕ ಮುತ್ತು (28) ಕೈದಾತಿನ ಆರೋಪಿಲು.
ಸೆ.3 ತಾನಿ ರಾತ್ರೆ ರೌಂಡ್ಸ್ ಬೇಲೆಡ್ ಇತ್ತಿನ ಉಬಾರ್ ಪೊಲೀಸ್ ಸ್ಟೇಶನ್ ಸಿಬ್ಬಂದಿ ಬೈಕ್ಡ್ ಕಡಬ ಕೌಕ್ರಾಡಿ ಗ್ರಾಮೊದ ಅಲಂಪಾಡಿ ಕ್ರಾಸ್ ಪನ್ಪಿನವೆಟೆ ಪೋವೊಂದಿತ್ತೆರ್. ಈ ಪೊರ್ತುಡು ಕುಡ್ಲ-ಬೆಂಗಳೂರು ಪೆರ್ಸಾದಿದ ಬರಿಟ್ ಉಂತಾದಿತ್ತಿನ ಟ್ಯಾಂಕರ್ ಕೈತಲ್ ಒಂಜಿ ಬೊಲೆರೋ ಪಿಕ್ ಅಪ್ ಗಾಡಿ ಉಂತುದಿತ್ತ್ದ್, ಬರಿಟೇ 3 ಜನ ಅನುಮಾನಾಸ್ಪದವಾದ್ ಉಂತುದಿನ ತೋಜಿದ್ ಬೈದ್ಂಡ್.
ಪೊಲೀಸೆರ್ ಬರ್ಪಿನೆನ್ ತೂಯಿನ ಅಕುಲು ಬಲಿಪೆರ ತೂತೆರ್. ಈ ಪೊರ್ತುಡು ಇರ್ವೆರೆನ್ ಪತ್ತ್ದ್ ವಿಚಾರಣೆ ಮಲ್ಪುನಗ ಪೆರ್ಸಾದಿದ ಬರಿಟ್ ಉಂತಾದಿತ್ತಿನ ಗಾಡಿಲೆನ ಡಿಸೆಲ್ ಟ್ಯಾಂಕ್ರ್ದ್ ಡಿಸೇಲ್ ಕಂಡೊನ್ದುಲ್ಲ ಪನ್ದ್ ತಪ್ಪು ಒತ್ತೊನ್ದೆರ್.
ಪೊಲೀಸೆರ್ ಕ್ಯಾನ್ಡ್ ದಿನ್ಜಾದಿತ್ತಿನ ಸುಮಾರ್ 20 ಲೀಟರ್ ಡಿಸೆಲ್, ಖಾಲಿ ಕ್ಯಾನ್ಲು, ಡಿಸೆಲ್ ಕಂಡ್ಯೆರ ಗಲಸುನ ಒಂಜಿ ರಬ್ಬರ್ ಪೈಪ್ ಬೊಕ್ಕ ಬೇತೆ ಸೊತ್ತುಲೆನ್, ಪಿಕಪ್ ಗಾಡಿದ ಒಟ್ಟುಗು ಉಲಕೈ ಮಲ್ತೊಂದೆರ್.
ಈ ಬಗೆಟ್ ಉಬಾರ್ ಪೊಲೀಸ್ ಸ್ಟೇಶನ್ಡ್ ಅ.ಕ್ರ: 118/2026, ಕಲಂ: ಕಲಂ 35 (1)(ಡಿ) ಬಿ.ಎನ್. ಎಸ್. ಎಸ್. 2023 ಬೊಕ್ಕ ಕಲಂ 303 (2) ಬಿ.ಎನ್. ಎಸ್. 2023 ದ ಪ್ರಕಾರ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.