Last updated on September 16th, 2026 at 08:35 am
ಕುಡ್ಲ, ಸೆ.15 : ತುಳುನಾಡ ಆನೆಬಾಕಿಲ್ ಪನ್ದೇ ಪುದರಾತಿನ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ಉಂತಡೆಗ್ ಅಮರ್ಬೀರೆರಾಯಿನ ಕೋಟಿ-ಚೆನ್ನಯೆರೆನ ಪುದರ್ ದೀವೊಡು ಪನ್ದ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ಎಂ. ರೈ ಒತ್ತಾಯ ಮಲ್ತ್ದೆರ್. ಈ ಬಗೆಟ್ ಮಂಗಳೂರು ಜಿಲ್ಲಾ ಉಸ್ತುವಾರಿ ಸಚಿವೆ ಯು.ಟಿ. ಖಾದರ್ ಮೆರೆಗ್ ಓಲೆದ ಮುಕೇನ ಕಾಯೆಸ್ ಮಲ್ದಿನ ಆರ್, ಮಂಗಳೂರು ಜಿಲ್ಲೆಡ್ ನಡಪುನ ಐತಿಹಾಸಿಕ ರಾಜ್ಯ ಸಚಿವ ಸಂಪುಟ ಸಭೆಟೇ ಈ ಬಗೆಟ್ ಅಧಿಕೃತ ನಿರ್ಣಯ ಗೆತೊಂದು ಕೇಂದ್ರ ಸರ್ಕಾರೊಗು ಶಿಫಾರಸ್ ಕಡಪುಡ್ಲೆ ಪನ್ದ್ ಬಿನ್ನಪು ಮಲ್ತ್ದೆರ್. ಕೋಟಿ-ಚೆನ್ನಯೆರ್ ಕಾಲಿ ಐತಿಹಾಸಿಕ ನಾಯಕೆರತ್ತ್, ತುಳುನಾಡ್ದ ಸ್ವಾಭಿಮಾನ, ಸಾಮಾಜಿಕ ನ್ಯಾಯ, ಸತ್ಯ, ಧರ್ಮ, ಬೀರ ಬೊಕ್ಕ ಸಾಂಸ್ಕೃತಿಕ ಅಸ್ಮಿತೆದ ಸಂಕೇತ ಆದುಲ್ಲೆರ್. ಅಕಲ್ನ ಪುದರ್ನ್ ವಿಮಾನ ಉಂತಡೆಗ್ ದೀಪುನ ತುಳುನಾಡ ಜನತೆಗ್ ಕೊರ್ಪುನ ಮಾಮಲ್ಲ ಮಾನಾದಿಗೆ ಪನ್ದ್ ಮಿಥುನ್ ರೈ ಓಲೆಡ್ ತೆರರಿಪಾದೆರ್.
ವಿಮಾನ ಉಂತಡೆಗ್ ಕೋಟಿ-ಚೆನ್ನಯೆರೆ ಪುದರ್ ದೀಪುನ ಕಾಯೆಸ್ದ ಸುದೀರ್ಘ ಪೊರ್ಮ್ಬುದ ಬಗೆಟ್ಲಾ ಮಿಥುನ್ ರೈ ನೆನೆಪು ಮಲ್ತ್ದೆರ್. ಆರ್ ಯುವ ಕಾಂಗ್ರೆಸ್ ಜಿಲ್ಲಾಧ್ಯಕ್ಷೆರಾದಿತ್ತಿನ ಪೊರ್ತುಡು 2010ತ ಡಿಸೆಂಬರ್ 10ತಾನಿ ಕೆ.ಪಿ.ಟಿ ಸರ್ಕಲ್ರ್ದ್ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ಉಂತಡೆ ಮುಟ್ಟ ನೇಲ್ಯ ‘ಜೀಟಿಗೆದ ಮೆರವಣಿಗೆ’ನ್ ನಡಪಾದ್, ವಿಮಾನ ಉಂತಡೆಗ್ ಕೋಟಿ-ಚೆನ್ನಯೆರೆ ಪುದರ್ ದೀಯರೆ ಒತ್ತಾಯ ಮಲ್ದಿನೆನ್ ತೆದಿಪಾದೆರ್. ಈ ಕಾಯೆಸ್ಗ್ ತುಳುವೆರೆನ ಬೆರಿತಾಂಗ್ ಇತ್ತ್ದ್, ದಶಕೊಲೆನ ಪೊರ್ಮ್ಬುದ ಪಿರನಿಲೆ ಉಂಡು ಪನ್ದ ಆರ್ ಪನ್ಡೆರ್.
ಮಂಗಳೂರು ಜಿಲ್ಲೆಡ್ ನಡಪರೆ ಇಪ್ಪುನ ರಾಜ್ಯ ಸಚಿವ ಸಂಪುಟೊದ ವಿಶೇಷ ಇನಯೊದ ಮಹತ್ವೊದ ಪೊರ್ತುಡೇ, ಮಂಗಳೂರು ವಿಮಾನ ಉಂತಡೆನ್ ‘ಕೋಟಿ-ಚೆನ್ನಯ ಅಂತಾರಾಷ್ಟ್ರೀಯ ವಿಮಾನ ಉಂತಡೆ’ ಪನ್ದ್ ಪುದರ್ ದೀಪುನ ಪ್ರಸ್ತಾವನೆಗ್ ಸಂಪುಟೊಡು ಅನುಮೋದನೆ ಕೊರೊಡು, ಬೊಕ್ಕ ಕೇಂದ್ರ ಸರ್ಕಾರೊಗು ಅಂತಿಮ ಶಿಫಾರಸ್ ಕಡಪುಡುನ ಐತಿಹಾಸಿಕ ನಿರ್ಧಾರ ಗೆತೊನರೆ ಮುಖ್ಯಮಂತ್ರಿಲೆಗ್ ಪ್ರಸ್ತಾವನೆ ಮಲ್ಪೆರೆ ಮಿಥುನ್ ರೈ ಮೇರ್ ಸಚಿವೆ ಯು.ಟಿ. ಖಾದರ್ ರೆಡ ಕೇನೊಂದೆರ್.