Last updated on February 7th, 2025 at 01:23 pm
ಬೊಲ್ತೇರ್: ಬೊಡೆದಿನ್ ಕೆರ್ದ್ ಆತ್ಮಹತ್ಯೆ ಪನ್ದ್ ತೋಜಾಯಿನ ಕಂಡನ್ಯಗ್ ಕೋರ್ಟ್ ಜೀವಾವಧಿ ಶಿಕ್ಷೆ ಕೊರ್ದು ಆದೇಶ ಮಲ್ದ್ಂಡ್. ಸುಳ್ಯ ತಾಲೂಕ್‌ದ ತೊಡಿಕಾನದ ಅಂಡ್ಯಡ್ಕ ನಿವಾಸಿ ರಾಜೆ(64) ಶಿಕ್ಷೆ ಆತಿನ ಆರೋಪಿ. ಕಮಲಾ ಕೊಲೆಯಾತಿನ ಪೊಂಜೊವು.
ನಡಕೆದ ಒಲವು:
ಆರೋಪಿ ರಾಜೆ ತನ್ನ ಬೊಡೆದಿ ಕಮಲಾಡ ದಿನೊಲಾ ಕುಡ್ಚಿದ್ ಬತ್ತ್‌ದ್ ಗಲಾಟೆ ಮಲ್ತೊಂದಿತ್ತೆ. 2022ತ ಸೆ.04 ತಾನಿ ರಾಜೆ ಬೊಕ್ಕ ಬೊಡೆದಿ ಕಮಲಾ ರಬ್ಬರ್ ಟ್ಯಾಪಿಂಗ್ ಬೇಲೆ ಕೇನೊಂದು ಬೊಲ್ತೇರ್ ತಾಲೂಕ್‌ದ ಕೊಯ್ಯರ್ ಗ್ರಾಮೊದ ಅಲೆಕ್ಕಿ ಧರ್ಣಪ್ಪ ಗೌಡ್ರೆನ ಇಲ್ಲಡೆ ಪೋದಿತ್ತ್‌ದ್, ಅಲ್ಪ ಇಲ್ಲದಕುಲು ಅಕಲೆಗ್ ರಬ್ಬರ್ ಟ್ಯಾಪಿಂಗ್ ಬೇಲೆ ಕೊರ್ಯೆರ ಒತ್ತೊಂದು ರಬ್ಬರ್ ತೋಟಡ್ ಇತ್ತಿನ ಶೆಡ್‌ಡ್ ಇಪ್ಪೆರ ಅವಕಾಶ ಕೊರ್ದಿತ್ತೆರ್.
ರಾಜೆ ತನ್ನ ಬೊಡೆದಿ ಕಮಲಾನೊಟ್ಟುಗು ಇತ್ತಿನ ಆ ಶೆಡ್‌ಡ್ 2022 ಸೆ.06ತಾನಿ ಬಯ್ಯ 5.30ರ್ದ್ ಬೊಕ್ಕ ರಾಜೆ ಕಮಲಾಡ ಏಪೊಲ್ದ ಲೆಕ ಕಂಟ್ಯೊನರೆ ಜತ್ತ್‌ದೆ, ರಾತ್ರೆ ರಾಜೆ ಪಿಸ್‌ರ್‌ಡ್ ಬೊಡೆದಿ ಕಮಲಾನ ಕೆಕ್ಕಿಲ್ ಪತ್ತ್‌ದ್ ತರೆನ್ ನೆಲಕ್ಕ್ ಜೋರು ಆಕ್‌ದ್, ಬೊಕ್ಕ ತನ್ನ ಕಂಬೈನ್ ನೀಟ ಪರ್ತ್‌ದ್ ಬಲ್ಲ್‌ದ ಲೆಕ ಮಲ್ತ್‌ದ್, ಅವೆಟ್ ಕಮಲಾನ ನಾಲಿ ಕಾಯ್ತಿನೆರ್ದಾವರ ಕಮಲಾ ತೀರ್ದಿತ್ತೆರ್.
ಅವೆರ್ದ್ ಬೊಕ್ಕ ಆರೋಪಿ ಕಮಲಾ ಆತ್ಮಹತ್ಯೆ ಮಲ್ತೊಂದೆರ್ ಪನ್ಪಿಲೆಕ ಕತೆ ಕಟ್ಟ್‌ದ್ ಜಾಗೆದ ದನಿ ಧರ್ಣಪ್ಪ ಗೌಡ್ರೆನ ಮಗೆ ಪ್ರಮೋದ್ ಗ್ ತೆರಿಪಾದಿತ್ತೆ.
ಬೊಲ್ತೇರ್ ಪೊಲೀಸ್ ಸ್ಟೇಶನ್‌ಡ್ ಅಸ್ವಾಭಾವಿಕ ಮರಣೊದ ಬಗೆಟ್ ಬರೆಪಾದಿನ ಒಯಿಲ್‌ದ ಪ್ರಕಾರ ದೇರಳಕಟ್ಟೆದ ವೈದ್ಯಾಧಿಕಾರಿ ಡಾ. ವರ್ಷಾ ಶೆಟ್ಟಿ ಮೇರ್ ಪೋಸ್ಟ್ ಮಾರ್ಟಮ್ ಮಲ್ಪುನಗ ಉಂದೊಂಜಿ ಕೊಲೆ ಪ್ರಕರಣ ಪನ್ದ್ ತೆರಿದ್ ಬತ್ತ್‌ದ್ಂಡ್. ಪೋಸ್ಟ್ ಮಾರ್ಟಮ್ ರಿಪೋರ್ಟ್‌ದ ಆಧಾರೊಡು ಆರೋಪಿನ ಮಿತ್ತ್ ಬೊಲ್ತೇರ್ ಪೊಲೀಸ್ ಸ್ಟೇಶನ್‌ಡ್ ಕೊಲೆ ಪ್ರಕರಣ ದಾಕಲಾದಿತ್ತ್ಂಡ್.
ಸುರುತ ಜಡ್ತೆನ್ ಅಪಗದ ಪೊಲೀಸ್ ಉಪ ನಿರೀಕ್ಷಕೆರಾಯಿನ ನಂದ ಕುಮಾರ್ ಎಮ್.ಎಮ್ ಮೇರ್ ಮಲ್ತಿತ್ತ್‌ದ್, ಅವೆರ್ದ್ ಬೊಕ್ಕ ಪತ್ತ ಜಡ್ತೆನ್ ಅಪಗದ ಬೋಲ್ತೇರ್ ಪೊಲೀಸ್ ಸ್ಟೇಶನ್‌ದ ನಿರೀಕ್ಷಕೆರಾಯಿನ ಶಿವ ಕುಮಾರ್ ಬಿ ಮೇರ್ ಮಲ್ತ್‌ದ್ ಆರೋಪಿನ ವಿರುದ್ಧ ಕಲಂ 302 ಐಪಿಸಿ ದ ಪ್ರಕಾರ ದೋಷಾರೋಪಣೆ ಪಟ್ಟಿ ನ್ಯಾಯಂತಡೆಕ್ ಸಂದಾದಿತ್ತೆರ್.
ಈ ಪ್ರಕರಣೊಡು ಒವ್ವೇ ಪ್ರತ್ಯಕ್ಷ ಪುರಾಪುದಾಂತಿನೆರ್ದಾವರ ಆರೋಪಿನ ವಿರುದ್ಧದ ಆರೋಪನ್ ವೈದ್ಯಕೀಯ ಪುರಾಪುದ ಸಕಾಯೊಡು ರುಜುವಾತು ಮಲ್ತಿತ್ತ್‌ದ್, ಸರ್ಕಾರೊದ ಪರವಾದ್ ಮಾತಾ ಸಾಕ್ಷಿದಾರೆರೆನ ವಿಚಾರಣೆನ್ ಪಬ್ಲಿಕ್ ಪ್ರಾಸಿಕ್ಯೂಟರ್ ಮೋಹನ್ ಕುಮಾರ್.ಬಿ ಮೇರ್ ಮಲ್ತ್‌ದ್ ವಾದ ಮಂಡನೆ ಮಲ್ದೆರ್.