Last updated on February 14th, 2025 at 04:51 pm
ಚಿಲಿ ದೇಶೊದ ಕಡಲ ಕರೆಟ್ ಅಮ್ಮೆ-ಮಗೆ ಇರ್ವೆರ್ ಕಯಾಕಿಂಗ್ ಮಲ್ತೊಂದುಪ್ಪುನಗ ಕಡಲಡಿರ್ದ್ ಬತ್ತಿನ ಒಂಜಿ ಎಲಸರಿ (ಕನ್ನಡೊಡು ತಿಮಿಂಗಿಲ) ಮಗನ್ ಇಡೀಯ ನಿಂಗ್‌ದ್ ಪಿರ ಉಬ್ಬಿದಿನ ನಡಕೆದ ವೀಡಿಯೋ ಇತ್ತೆ ವೈರಲ್ ಆತ್ಂಡ್.
ಫೆಬ್ರವರಿ 8 ದಾನಿ ಮದ್ಯಾನ ಸುಮಾರ್ 3 ಗಂಟೆದ ಅಂದಾಜಿಗ್ 24 ವರ್ಸ ಪ್ರಾಯೊದ ಏಡ್ರಿಯಾನ್ ಸಿಮಾನ್ಕಸ್ ಬೊಕ್ಕ ಆರೆನ ಅಮ್ಮೆ ಡೆಲ್, ಚಿಲಿ ದೇಶೊದ ಪ್ಯುಂಟಾ ಅರೆನಾಸ್ ಕೈತಲ್ದ ಕಡಲ ಕರೆಟ್ ಕಯಾಕಿಂಗ್ ಮಲ್ತೊಂದಿತ್ತೆರ್.
ಮಂಜಲ್ ನಿರೆತ ಕಯಾಕ್‌ಡ್ ಕುಲ್ದಿತ್ತಿನ ಮಗನ್ ಕಡಲ ಅಡಿರ್ದ್ ಒರರ್ದ್ ಒರಾನೆ ಬತ್ತಿನ ಹಂಪ್ ಬ್ಯಾಕ್ ವೇಲ್ (ಎಲಸರಿ) ನಿಂಗ್‌ದ್ಂಡ್. ಈ ನಡಕೆನ್ ಅಲ್ಪನೇ ಬರಿಟ್ ಕುಡೊಂಜಿ ಕಯಾಕ್‌ಡ್ ಇತ್ತಿನ ಅಮ್ಮೆ ಡೆಲ್ ರೆಕಾರ್ಡ್ ಮಲ್ದೆರ್.
ಕಣ್ಣೆದುರೇ ಮಗನ್ ಎಲಸರಿ ನಿಂಗಿನೆನ್ ತೂದು ದಾದ ಮನ್ಪೊಡೂಂದು ತೆರಿಯಂದೆ ತೂವೊಂದುಪ್ಪುನಗನೆ ಅಂದಾಜಿ ಮೂಜಿ ಸೆಕೆಂಡ್ ಕರಿದ್ ಎಲಸರಿ ನಿಂಗಿನಾಯನ್ ಪಿರ ಉಬ್ಬಿದ್ಂಡ್.
ಎಲಸರಿದ ಬಾಯಿರ್ದ್ ಪಿದಯಿ ಬತ್ತಿನೇ ಏಡ್ರಿಯಾನ್ ಸಿಮಾನ್ಕಸ್ ಮೀಂದೊಂದು ಅಮ್ಮೆರೆ ಕಯಾಕ್‌ದಡೆ ಬತ್ತ್‌ದೆ. ಅಲ್ಪರ್ದ್ ಅಂಚೆನೇ ಮೀಂದೊಂದು ಕರೆಕ್ ಬತ್ತ್‌ದೆ. ಇರ್ವೆರೆ ಜೂವೊಗ್ಲಾ ದಾಲ ಆತಿಜಿ.
ಈ ನಡಕೆದ ವೀಡಿಯೋ ಇತ್ತೆ ಇಂಟರ್ನೆಟ್‌ಡ್ ವೈರಲ್ ಆವೊಂದಿತ್ತ್‌ದ್, ವಿಡಿಯೋ ನ್ ತಿರ್ತ್ ಕೊರ್ತಿನ ಲಿಂಕ್‌ಡ್ ತೂವೊಲಿ.