Last updated on February 28th, 2025 at 05:11 pm
ಬೆಂಗಳೂರು, ಫೆ. 28: ಬೆಂಗಳೂರು ಬೊಕ್ಕ ಪಿಲಿಕುಳಡ್ ಕಂಬುಲ ನಡಪಾವಂದಿ ಲೆಕ ಕೋರ್ಟ್‌ಗ್ ಪೋದಿತ್ತಿನ ಪೇಟಾ ಇತ್ತೆ ಕಡೀರ ಸರ್ತಿ ಶಿವಮೊಗ್ಗಡ್ ನಡತೊಂದುಪ್ಪುನ ಕಂಬುಲದ ವಿರುದ್ಧ ಹೈಕೋರ್ಟ್ ಮಿತ್ತರ್‌ದ್ಂಡ್. ಏಪ್ರಿಲ್‌ಡ್ ಮಲೆನಾಡ್ ಶಿವಮೊಗ್ಗಡ್ ನಡಪರೆಗುಪ್ಪುನ ಕಂಬುಲದ ವಿರುದ್ಧ ಹೈಕೋರ್ಟ್‌ಡ್ ಅರ್ಜಿ ಪಾಡ್ದ್ಂಡ್.
ತುಳುನಾಡ್‌ದ ಪಿದಯಿ ನಡಪುನ ಕಂಬುಲ ಅಂಚೆನೇ ಬೇತೆ ಮುರ್ಗೊಲೆಗ್ ಕರಕರಿ ಆಪಿನ ಕಂಬುಲದ ವಿರುದ್ದ ಪೇಟಾ ತನ್ನ ಕಾನೂನು ಪೊರ್ಮ್ಬಾಟೊನು ದುಂಬರಿತ್‌ದ್ಂಡ್. ಬೆಂಗಳೂರು ಬೊಕ್ಕ ಕುಡ್ಲದ ಪಿಲಿಕುಳಡ್ ನಡಪೆರ ಅಟ್ಟನೆ ಆದಿತ್ತಿನ ಸರಕಾರಿ ಕಂಬುಲೊನು ಉಂತಾವುನೆಟ್ ಯಶಸ್ವಿಯಾತಿನ ಪೇಟಾ ಇತ್ತೆ ಮಲೆನಾಡ್ ಶಿವಮೊಗ್ಗಡ್ ನಡಪುನ ಕಂಬುಲ ಉಂತಾಯೆರ ಹೈಕೋರ್ಟ್‌ಗ್ ಪೋತುಂಡು. ಶಿವಮೊಗ್ಗ ಕಂಬುವ ಏಪ್ರಿಲ್ 19 ಬೊಕ್ಕ 20ಗ್ ಗೊತ್ತು ಮಲ್ದೆರ್. ಉಂದೆತ ವಿರುದ್ಧ ಹೈಕೋರ್ಟ್‌ಗ್ ರಡ್ಡ್ ತಿಂಗೊಲು ದುಂಬೇ ಪೇಟಾ ಒಯಿಲ್ ಕೊರ್ತುಂಡು.
ಕಂಬುಲ ಜಾನಪದ ಕ್ರೀಡೆ ಆದಿತ್ತ್‌ದ್, ಅವೆನ್ ತುಳುನಾಡ್ ಬುಡ್ದು ಪಿದಯಿಡ್ ಮನ್ಪೆರ ಅವಕಾಶ ಕೊರ್ಯೆರ ಬಲ್ಲಿ ಪನ್ಪಿನ ತರ್ಕೊನು ಎದುರು ದೀತ್ಂಡ್. ಆಂಡ ಶಿವಮೊಗ್ಗ ಕಂಬುಲ ಸಮಿತಿದ ಅಧ್ಯಕ್ಷೆ ಅವಿಭಜಿತ ದ.ಕ.ಜಿಲ್ಲಾ ಕಂಬುಲ ಸಮಿತಿ ಪ್ರಧಾನ ಕಾರ್ಯದರ್ಶಿ ಮುಚೂರು ಲೋಕೇಶ್ ಶೆಟ್ಟಿ ಮೇರ್ ಹೈಕೋರ್ಟ್‌ಗ್ ಬೀನ್ನಪು ಸಂದಾದ್ ಕಂಬುಲ ಮನ್ಪೆರ ಅನು ಕೊರೊಡು ಪನ್ದ್ ನಟ್ಟೊಂದೆರ್.