Last updated on March 11th, 2025 at 12:36 pm
ಉತ್ತರ ಪ್ರದೇಶ: ಪಾತೆರ್ಯೆರ ಉಂಡು ಪನ್ಪಿನ ನೆವನೊಡು ಇಲ್ಲಗ್ ಬತ್ತ್ದ್ ಬಿಜೆಪಿ ನಾಯಕನ ಬಂಜಿಗ್ ವಿಷೊತ ಇಂಜೆಕ್ಷನ್ ಕೊರ್ದು ಕೆರ್ತಿನ ನಡಕೆ ಉತ್ತರ ಪ್ರದೇಶೊದ ಸಂಭಾಲ್ಡ್ ನಡತ್ದ್ಂಡ್.
ಬಿಜೆಪಿ ನಾಯಕೆ ಗುಲ್ಫಮ್ ಸಿಂಗ್ ಯಾದವ್ (60) ಮೇರ್ ಇಲ್ಲಡ್ ಕುಲ್ಲುದುಪ್ಪುನಗ ಬೈಕ್ಡ್ ಬತ್ತಿನ ಮೂವೆರ್ ಕೆಂಗುಡೆರ್ ವಿಷೊತ ಇಂಜೆಕ್ಷನ್ ಕುತ್ತುದು ಅಲ್ಪರ್ದ್ ಪದ್ರಾಡಾತೆರ್. ನಾಯಕೆರೆಡ ಪಾತೆರ್ಯೆರೆ ಉಂಡು ಪನ್ದ್ ಮೂವೆರ್ ಇಲ್ಲಗ್ ಬತ್ತಿತ್ತೆರ್. ಗುಲ್ಫಮ್ ಸಿಂಗ್ರೆನ ಒಟ್ಟು ಕುಲ್ಲುದು, ಆರೆಡ ದಾನೆ ಎಡ್ಡೆ ಪಾತೆರ್ದೆರ್. ಬೊಕ್ಕ ಪರ್ಯೆರ ನೀರ್ ಕೇನ್ದ್, ಅವೆನ್ ಪರ್ದ್ ಕಾರ್ಗ್ ಬೂರ್ದ್, ರಪಕ್ಕ ಆರೆನ್ ಪತ್ತ್ದ್ ಬಂಜಿಗ್ ಇಂಜೆಕ್ಷನ್ ಕೊರ್ದು ಅಲ್ತ್ರ್ದ್ ಪದ್ರಾಡಾತೆರ್. ಈ ಪೊರ್ತುಡು ವಿಷ ಏರ್ಯೆರ ಪತ್ತಿನೇ, ಬಿಜೆಪಿ ನಾಯಕನ ಮೈಸರಿಲಾ ತೆಟ್ಟೊಂದು ಬೈದ್ಂಡ್.
ಆ ಬೇನೆಡ್ ಗುಲ್ಫಮ್ ಸಿಂಗ್ ಕಲ್ಕ್ದೆರ್. ಕಲ್ಕಿನೆನ್ ಕೇನ್ದ್ ಇಲ್ಲಡಿತ್ತಿನಕುಲು ಪಾರೊಂದು ಬತ್ತ್ದ್ ಆರೆನ್ ಅಲಿಘರ್ ದ ಒಂಜಿ ಆಸ್ಪತ್ರೆಗ್ ಲೆತೊಂದು ಪೋತೆರ್. ಆಂಡ ಆಸ್ಪತ್ರೆಗ್ ಲೆತೊಂದು ಪೋಪಿನ ಸಾದಿ ನಡುಟೇ ತೀರ್ದೆರ್.
ಇತ್ತೆ ಗುಲ್ಫಮ್ ಸಿಂಗ್ ಯಾದವ್ ಮೆರೆನ ಮೃತದೇಹೊನು ಅಲಿಘರ್ ವೈದ್ಯಕೀಯ ಕಾಲೇಜಿಗ್ ಮರಣೋತ್ತರ ಪರೀಕ್ಷೆಗ್ ಕಡಪುಡ್ದೆರ್. ಪ್ರಕರಣೊಗು ಸಂಬಂಧಿತ್ದ್ ಅಲ್ಪದ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.