Last updated on March 17th, 2025 at 12:42 pm
ಚಾಮರಾಜನಗರ: ಈರೆನ ತರೆಟ್ ಕುಜಲ್ ಇಜ್ಜಿ ಪನ್ದ್ ಬೊಡೆದಿ ಮಕ್ಕರ್ ಮಲ್ತಿನೆರ್ದಾವರ ಬೆಸರ್‌ಡ್ ಕಂಡನೆ ಆತ್ಮಹತ್ಯೆ ಮಲ್ತೊಂದಿವ ನಡಕೆ ಚಾಮರಾಜನಗರ ತಾಲೂಕ್‌ದ ಉಡಿಗಾಲ ಗ್ರಾಮೊಡು ನಡತ್‌ದ್ಂಡ್. ಪರಶಿವಮೂರ್ತಿ(32) ತೀರ್ದಿನ ಆಂಜೊವು.
ತರೆಟ್ ಕುಜಲ್ ಇಜ್ಜಿ ಪನ್ದ್ ಪರಶಿವಮೂರ್ತಿಗ್ ಬೊಡೆದಿ ಮಮತಾ ಮಕ್ಕರ್ ಮಲ್ತೊಂದಿತ್ತಲ್. ಅಂಚಾದ್ ಆತ್ಮಹತ್ಯೆ ಮಲ್ತೊಂದೆರ್ ಪನ್ದ್ ಚಾಮರಾಜನಗರ ಗ್ರಾಮೀಣ ಸ್ಟೇಶನ್‌ಡ್ ಕೇಸ್ ದಾಕಲಾತ್ಂಡ್.
ಲಾರಿ ಡ್ರೈವರ್ ಆದಿತ್ತಿನ ಪರಶಿವಮೂರ್ತಿ ರಡ್ಡ್ ವರ್ಸೊಗು ದುಂಬು ಮಮತಾ ಪನ್ಪಿನಾಲೆನ್ ಮದಿಮೆ ಆದಿತ್ತೆರ್. ಮದಿಮೆ ಆಯಿ ಬೊಕ್ಕ ಪರಶಿವಮೂರ್ತಿನ ಕುಜಲ್ ಅಲಕ್ಕ ಉದುರೊಂದು ಬತ್ತಿತ್ತ್ಂಡ್. ಪಿದಯಿ ಪೋಂಡ ಎಂಕ್ ನಾಚಿಗೆ ಆಪುಂಡು ಪನ್ದ್ ಮಮತಾ ಪನೊಂದಿತ್ತಲ್‌ಗೆ. ಆತೇ ಅತ್ತಂದೆ ಸುಳ್ಳು ಬದಿತ ಕಿರುಕುಳ ಕೇಸ್‌ಲಾ ಮಮತಾ ದಾಕಲ್ತ್‌ದಿತ್ತ್‌ದ್, ಪರಶಿವಮೂರ್ತಿನ್ ಜೈಲ್‌ಗ್ಲಾ ಪಾಡ್ಪದಿತ್ತಲ್. ಸೋಶಿಯಲ್ ಮಿಡಿಯಾಡ್ ಆಕ್ಟಿವ್ ಇತ್ತಿನ ಮಮತ, ಮದಿಮೆ ಆದಿತ್ತ್ಂಡಲಾ ಕರಿಮಣಿದಾಂತಿನ ಫೋಟೋಲೆನ್ ಪಟ್ಟೊಂದಿತ್ತಲ್. ಈ ವಿಚಾರೊಗು ಇಲ್ಲಡ್ ಗಡಿಗಡಿ ಜಗಳ ಆಪೆದ್ಂಡ್. ಅಂಚಾದ್ ಬೊಡೆದಿನ ಈ ಗೊಬ್ಬುಲೆರ್ದಾವರ ಬೆಸರ್‌ಡ್ ಪರಶಿವಮೂರ್ತಿ ಆತ್ಮಹತ್ಯೆ ಮಲ್ತೊಂದೆರ್.