Last updated on March 21st, 2025 at 05:49 pm
ಬೆಂಗಳೂರು, ಮಾ, 21: ವಿಧಾನಸಭೆ ಅಧಿವೇಶನೊಡು ಸ್ಪೀಕರ್ ಖಾದರ್ ಮೆರೆನ ಪೀಠೊಗು ಪೋದು ಪೊರ್ಮ್ಬಾಟ ಮಲ್ತಿನತ್ತಂದೆ ಕಾಕಜಿ ದಕ್ಕ್‌ದ್ ಗಲಾಟೆ ಮಲ್ತಿನ ಆರೋಪಡ್ 18 ಬಿಜೆಪಿ ಶಾಸಕೆರೆನ್ ಕಲಾಪೊರ್ದು 6 ತಿಂಗೊಲು ಮುಟ್ಟ ಸಸ್ಪೆಂಡ್ ಮಲ್ತ್‌ದ್ ವಿಧಾನಸಭಾ ಸ್ಪೀಕರ್ ಯು.ಟಿ.ಖಾದರ್ ಆದೇಶ ಕೊರ್ತೆರ್.
ಹನಿಟ್ರ್ಯಾಪ್ ಪ್ರಕರಣೊನು ಖಂಡಿತ್‌ದ್, ಪ್ರಕರಣೊದ ಸಿಬಿಐ ಜಡ್ತೆ ಆವೊಡು ಪನ್ದ್ ಬಿಜೆಪಿ ಸದಸ್ಯೆರ್ ಸದನೊದ ಗೂವೆಲ್‌ಗ್ ಜತ್ತ್‌ದ್ ಪೊರ್ಮ್ಬಾಟ ಮಲ್ತಿತ್ತೆರ್. ಆಡಳಿತ ಪಕ್ಷೊದ ವಿರುದ್ಧ ಬಿಜೆಪಿ ಸದಸ್ಯೆರ್ ಘೋಷಣೆ ಲೆತ್ತೆರ್. ಸ್ಪೀಕರ್ ಪೀಠೊದ ಮಿತ್ತ್ ಬರ್ತಿನ ಬಿಜೆಪಿ ಸದಸ್ಯೆರ್ ತನ್ಕುಲೆ ಆಕ್ರೋಶ ಪಿದಯಿ ಪಾಡ್ಯೆರ್. ಈ ರಂಬಾರೂಟಿದ ನಡುಟು ಸ್ಪೀಕರ್ ಪೀಠೊದ ಮಿತ್ತ್ ಬಿಜೆಪಿ ಸದಸ್ಯೆರ್ ಕಾಕಜಿ ಪರಿತ್‌ದ್ ದಕ್ಕ್‌ದಿತ್ತೆರ್. ಅಂಚಾದ್ ಪೀಠೊಗು ಅಗೌರವ ತೂಪಾಯಿನ 18 ಜನ ಬಿಜೆಪಿ ಸದಸ್ಯೆರೆನ್ ಸದನ ಕಲಾಪೊರ್ದು 6 ತಿಂಗೊಲು ಸಸ್ಪೆಂಡ್ ಮಲ್ತ್‌ದ್ ಸ್ಪೀಕರ್ ರೂಲಿಂಗ್ ಕೊರ್ಯೆರ್.
ಬಿಜೆಪಿ ಶಾಸಕೆರಾಯಿನ ದೊಡ್ಡಣ್ಣ ಗೌಡ ಪಾಟೀಲ್, ಎಸ್.ಆರ್ ವಿಶ್ವನಾಥ್, ಅಶ್ವತ್ಥ್ ನಾರಾಯಣ್, ಚೆನ್ನಬಸಪ್ಪ, ಉಮನಾಥ್ ಕೋಟ್ಯಾನ್, ಯಶಪಾಲ್ ಸುವರ್ಣ, ಹರೀಶ್ ಬಿ.ಪಿ., ಚಂದ್ರು ಲಮಾಣಿ, ಶರಣು ಸಲಗಾರ್, ಶೈಲೇಂದ್ರ ಬೆಳ್ದಾಳೆ, ಸಿ.ಕೆ.ರಾಮಮೂರ್ತಿ, ಮುನಿರತ್ನ, ಧೀರಜ್ ಮುನಿರಾಜ್, ಭರತ್ ಶೆಟ್ಟಿ, ಬಸವರಾಜ್ ಮತ್ತಿಮೂಡ್, ಸುರೇಶ್ ಗೌಡ, ಬಿ.ಬಸವರಾಜ್, ಎಂ.ಆರ್.ಪಾಟೀಲ್ ಮೊಕಲೆನ್ ಆಜಿ ತಿಂಗೊಲುಗು ವಿಧಾನಸಭೆ ಕಲಾಪರ್ದ್ ಸಸ್ಪೆಂಡ್ ಮಲ್ತ್‌ದ್ ಆದೇಶ ಕೊರ್ತೆರ್.