Last updated on March 23rd, 2025 at 08:33 am
ಮಲ್ಪೆ, ಮಾ. 23: ಕಡಲಾಯೆರೆನ್ ಕೈದ್ ಮಲ್ತಿನೆನ್ ವಿರೋಧಿತ್‌ದ್ ನಡತಿನ ಪೊರ್ಮ್ಬಾಟೊಡು ಪ್ರಚೋದಕಾರಿ ಭಾಷಣ ಮಲ್ದೆರ್ ಪನ್ಪಿನ ಆರೋಪೊಡು ಮಾಜಿ ಸಚಿವೆ ಪ್ರಮೋದ್ ಮಧ್ವರಾಜ್‌ರೆನ ಮಿತ್ತ್ ಮಲ್ಪೆ ಪೊಲೀಸ್ ಸ್ಟೇಶನ್‌ಡ್ ಸ್ವಯಂ ಪ್ರೇರಿತ ಪ್ರಕರಣ ದಾಕಲಾತ್ಂಡ್.
ಮಲ್ಪೆ ಡೆಕ್ಕೆಡ್ ಮೀನ್ ಕಂಡಿನ ಆರೋಪಡ್ ಪೊಂಜೊವು ಒರ್ತಿನ್ ಮರಕ್ಕ್ ಕಟ್ಟ್‌ದ್ ಪಾಡ್ದ್ ಪೆಟ್ಟ್ ಪಾಡ್ದಿನ ಆರೋಪಡ್ ಕಡಲಾಯೆರೆನ್ ಪೊಲೀಸೆರ್ ಕೈದ್ ಮಲ್ತಿನೆನ್ ವಿರೋಧಿತ್‌ದ್ ಮಲ್ಪೆ ಮೀನ್‌ಗಾರೆರೆ ಸಂಘೊದ ಮುತಾಲಿಕೆಡ್ ನಡತಿನ ಪೊರ್ಮ್ಬಾಟೊಡು ಸೇರಿನಕಲೆನ್ ಉದ್ದೇಶಿತ್‌ದ್ ಪಾತೆರ್ನ ಮಾಜಿ ಸಚಿವೆ ಪ್ರಮೋದ್ ಮಧ್ವರಾಜ್, ನಮ್ಮ ಇಲ್ಲಗ್ ಕಲ್ವೆರ್ ಬತ್ತ್ಂಡ್ ನಮ ದಾದ ಮನ್ಪ? ಪೊಲೀಸೆರ್ ಬರ್ಯೆರ 5-6 ಗಂಟೆ ಕಡೆಸ್ಸ್ಂಡ ನಮ ದಾದ ಮನ್ಪ? ಕಲ್ವೆರೆನ್ ಕಟ್ಟ್‌ದ್ ಪಾಡೊಡು, ಬೊಕ್ಕ ದಾದ ಮನ್ಪೆರಾಪುಂಡು? ಅಕ್ಲೆಗ್ ಕತ್ತಿಡ್ ಕಡ್ತ್‌ದನಾ? ಕಾಲಿ ಕೆಪ್ತಂಡೆಗ್ ರಡ್ಡ್ ಪಾಡ್ದಿನಾತೆ. ಅವುಲಾ ಕಲ್ವೆದಿ ಪನ್ದ್ ಆರೋಪ ಇತ್ತಿನ ಒಂಜಿ ಜನಕ್. ಆ ಪೊಂಜೊವುನ ದಾದಾಂಡಲಾ ಆಕ್ಷೇಪ ಉಂಡಾ? ಪನ್ದ್ ಪೊಂಜೊವುಗು ಸಾರ್ವಜನಿಕವಾದ್ ಕಟ್ಟ್‌ದ್ ಪಾಡ್ದ್ ಆಕಿನೆನ್ ಸಮರ್ಥನೆ ಮಲ್ತೊಂದೆರ್ ಪನ್ದ್ ಒಯಿಲ್‌ಡ್ ತೆರಿಪಾದೆರ್.
ಆ ಮುಕೇನ ಪ್ರಮೋದ್ ಮಧ್ವರಾಜ್ ಸಾರ್ವಜನಿಕೆರೆರ್ದ್ ಈ ರೀತಿದ ಅಪರಾಧ ಮನ್ಪೆರ ಪ್ರೇರಣೆ ಕೊರೊಂದು, ದ್ವೇಷ ಭಾವನೆಡ್ ಭಾಷಣ ಮಲ್ತ್‌ದ್ ಕೊಲಲ ಆಪಿನ ಸಂಭವ ಉಂಡು ಪನ್ದ್ ತೆರಿಪಾದಿತ್ತ್‌ದ್, ಅಲ್ಪ ಇತ್ತಿನಕ್ಲೆನ್ ಪ್ರಚೋದನೆ ಮಲ್ತೊಂದು ಉದ್ರೇಕ ಭಾಷಣ ಮಲ್ತ್‌ದೆರ್ ಪನ್ದ್ ಒಯಿಲ್‌ಡ್ ಬರೆದುಂಡು. ಈ ಬಗೆಟ್ ಮಲ್ಪೆ ಪೊಲೀಸ್ ಸ್ಟೇಶನ್‌ಡ್ ಕಲಂ 57, 191(1), 192. ಬಿಎನ್‌ಎಸ್‌ ದ ಪ್ರಕಾರ ಪ್ರಕರಣ ದಾಕಲ್ತೊಂದೆರ್.