Last updated on April 3rd, 2025 at 06:31 pm
ಮಣಿಪಾಲ, ಎ. 03: ಟೈಮಿಂಗ್ ವಿಚಾರೊಗು ಬಸ್ ಕಂಡಕ್ಟರ್ನಕ್ಲೆನ ನಡುಟು ಕೊಲಲ ನಡತಿನ ನಡಕೆ ಒಡಿಪು ಜಿಲ್ಲೆದ ಮಣಿಪಾಲ ಬಸ್ ಉಂತಡೆಡ್ ನಡತ್ದ್ಂಡ್. ನಡಕೆದ ವಿಡಿಯೋ ವೈರಲ್ ಆತ್ಂಡ್. ಇತ್ತೆ ನಡುಸಾದಿಡ್ ಲಡಯಿ ಮಲ್ತೊಂಡಿನ ಡ್ರೈವರ್ ಬೊಕ್ಕ ಕಂಡಕ್ಟರ್ನ್ ಪೊಲೀಸೆರ್ ಕೈದ್ ಮಲ್ದೆರ್.
ಕೈದಾತಿನಕ್ಲೆನ್ ಮಂಜುನಾಥ ಬಸ್ಸ್ದ ಡ್ರೈವರ್ ಉಚ್ಚಿಲದ ಮೊಹಮ್ಮದ್ ಆಲ್ಪಾಜ್ (25), ಬೊಕ್ಕ ಆನಂದ ಬಸ್ಸ್ದ ಕಂಡಕ್ಟರ್ ಚಿತ್ರದುರ್ಗದ ವಿಜಯಕುಮಾರ್ (25) ಪನ್ದ್ ಗುರ್ತ ಪತ್ತ್ದೆರ್. ಎಪ್ರಿಲ್ 2 ತಾನಿ ಬಯ್ಯಡ್ ಮಣಿಪಾಲದ ಟೈಗರ್ ಸರ್ಕಲ್ ಕೈತಲ್ ಇಪ್ಪುನ ಪ್ರೈವೇಟ್ ಬಸ್ ಉಂತಡೆಡ್ ಬಸ್ ಉಂತಾವುನ ಟೈಮಿಂಗ್ ವಿಚಾರೊಡು ಆನಂದ್ ಬಸ್ದ ಕಂಡಕ್ಟರ್ ವಿಜಯ ಕುಮಾರ್ ಬೊಕ್ಕ ಮಂಜುನಾಥ ಬಸ್ಸ್ದ ಡ್ರೈವರ್ ಮೊಹಮ್ಮದ್ ಆಲ್ಪಾಜ್ ನಡುಟು ಗಲಾಟೆ ನಡತಿತ್ತ್ಂಡ್. ಮೊಕುಲಿರ್ವೆರ್ ಆಕೊನುನ ವಿಡಿಯೋ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆದಿತ್ತ್ಂಡ್.
ಈ ಬಗೆಟ್ ಮಣಿಪಾಲ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ದ್, ಪೊಲೀಸೆರ್ ಇರ್ವೆರೆನ್ ದಸ್ತಗಿರಿ ಮಲ್ತ್ದ್ ನ್ಯಾಯಂತಡೆಕ್ ಹಾಜಿರಿ ಮಲ್ದೆರ್. ಬಸ್ಲೆನ್ ವಶೊಕು ಗೆತೊಂದೆರ್.