“ಕೊರಗ ತನಿಯನ ಆರಾಧನೆಡ್ ಗಂಗಸರ ದೀಪುನವು ನಿಷಿದ್ಧ; ಕಲಿ ದೀಪುನವು ಮಾತ್ರ ಸತ್ಯ; ನಿಕುಲು ನಿಷಿದ್ಧ ಬೇಲೆ ಮಲ್ತೊಂದುಲ್ಲರ್”: ಪಾಂಗಾಳ ಬಾಬು ಕೊರಗ

Last updated on April 14th, 2025 at 11:03 am

ಕಟ್ಪಾಡಿ, ಎ. 14: ತುಳು ಭಾಷೆ, ಲಿಪಿ, ಸಾಹಿತ್ಯ, ಸಂಸ್ಕೃತಿದ ಒರಿಪು ಬುಲೆಚ್ಚಿಲ್‌ಗ್ ಎಪ್ರಿಲ್ 13 ತಾನಿ ಕಟ್ಪಾಡಿ ವಿಶ್ವನಾಥ ಕ್ಷೇತ್ರೊಡು ನಡತಿನ ತುಳುನಾಡ್ ಕಾನ್‌ಕ್ಲೇವ್‌ 2025ಡ್ ಕೊರಗ ಸಾಹಿತಿ ಪಾಂಗಾಳ ಬಾಬು ಕೊರಗ ಮೇರ್ ಕೊರ್ರೆ ಬಾಸೆ ಬೊಕ್ಕ ತುಳುನಾಡ ಕೊರಗೆರ್ ಪನ್ಪಿನ ವಿಷಯೊಡು ಪಾತೆರೊಂದು ಕೊರಗೆರೆನ ಜೀವನ, ಚರಿತ್ರೆ, ಬತ್ತಿ ಬಂಙೊಲು, ತೂಪಿ ತಲೆಪುಲೆನ ಬಗೆಟ್ ಪಾತೆರ್ಯೆರ್.

ತುಳು ಸಾಂಸ್ಕೃತಿಕ ಸಂಶೋಧನಾ ಪ್ರತಿಷ್ಠಾನೊದ ಗುರ್ಕಾರಿ ಮಹಿ ಮುಲ್ಕಿ ನಡಪಾದ್ ಕೊರಿನ ಈ ಪಾತೆರಕತೆಡ್ ಪಾತೆರ್ನ ವಿದ್ವಾಂಸೆ ಬಾಬು ಕೊರಗೆರ್ ಕೊರಗ ತನಿಯನ ಆರಾಧನೆದ ಬಗೆಟ್ ಪಾತೆರ್ನಗ ಇನಿತ ದಿನೊಟು ತನಿಯಗ್ ದೀವೊಂದುಪ್ಪುನ ಕಂಟ್ರಿ, ವೈನ್ ಮಾತ ಆರಾಧನೆಡ್ ನಿಷಿದ್ಧ, ಕಲಿ ಮಾತ್ರ ದೀವೊಡು, ಬೇತೆ ಮದ್ಯೊಲೆನ್ ದೀದ್ ತಪ್ಪು ನಿಷಿದ್ಧ ಬೇಲೆ ಮಲ್ತೊಂದುಲ್ಲರ್ ಪನ್ದ್ ಪನ್ಡೆರ್.

ಅಂಚೆನೇ ಬೀಡ ದೀಪುನೆತ ಬಗೆಟ್ ಪಾತೆರ್ನ ಬಾಬು ಕೊರಗೆರ್ ದೀಪುನಾಂಡ ಇಡೀ ಬಚ್ಚಿರೆ ಬಜ್ಜೈ ದೀಲೆ. ಒಟ್ಟೆ ಆತಿನ ಬೀಡ ದೀಡ್ಂಡ ಏಳ್ ತರೆಮಾರ್‌ಗ್ ದೋಷ ಬರ್ಪುಂಡು ಪನ್ದ್‌ಲಾ ಪನ್ಡೆರ್.