Last updated on May 16th, 2025 at 12:06 pm
ರಾಮನಗರ ಜಿಲ್ಲೆದ ಬಿಡದಿ ತಾಲೂಕ್‌ದ ಭದ್ರಾಪುರೊದ ಹಕ್ಕಿ-ಪಿಕ್ಕಿ ಸಮುದಾಯೊದ 14 ವರ್ಸ ಪ್ರಾಯೊದ ಕೆಬಿ ಕೇನಂದಿನ, ಬಾಯಿ ಬರಂದಿನ ಖುಷಿ ಪನ್ಪಿನ ಪುದರ್‌ದ ಪೊಣ್ಣನ್ ಸಾಮೂಹಿಕವಾದ್ ಅತ್ಯಾಚಾರ ಮಲ್ತ್‌ದ್ ಕೆರ್ದ್, ಪುನೊನು ಮೇ 14ತಾನಿ ಅರೆ ಉರ್ಬುಲಿ ಸ್ಥಿತಿಟ್ ರೈಲ್ವೇ ಪಟ್ಟೆಡ್ ದಕ್ಕ್‌ದ್ ಪೋತೆರ್. ಈ ನಡಕೆ ಸೋಷಿಯಲ್ ಮೀಡಿಯಾಡ್ ಇತ್ತೆ ಬಾರೀ ಸುದ್ದಿ ಮಲ್ತೊಂದುಂಡು.
ಪೊಣ್ಣಗ್ ಬಾಯಿ ಬರ್ಪೆದಿಜಿ, ಕೆಬಿ ಕೇನೆದಿಜಿ, ನಾಲೈನಾ ದಿನೊರ್ದು ತೋಜಂದೆ ಆದಿತ್ತಲ್. ಪೋಲಿಸ್ ಜಡ್ತೆದ ಪ್ರಕಾರ, ಕಮ್ಮಿಡ್ ನಾಲ್ ಜನ ಕೆಂಗುಡೆರ್ ಆಲೆನ ಮಿತ್ತ್ ದೌರ್ಜನ್ಯ ಮಲ್ತ್‌ದ್, ಅತ್ಯಾಚಾರ ಮಲ್ತ್‌ದ್, ಆಲೆನ ಬೆರಿಮುಲ್ಲು ಪೊಲ್ತ್‌ದ್, ಕೆಕ್ಕಿಲ್ ಪೊಜೆಂಕ್‌ದ್ ಕೆರ್ದ್, ರೈಲ್ ಪಟ್ಟೆದಲ್ಪ ದಕ್ಕ್‌ದ್ ಪೋತೆರ್. ವಿಧಿವಿಜ್ಞಾನ ಪ್ರಯೋಗಾಲಯದ ವರದಿ ಬತ್ತಿನೇ ಕೆಂಗುಡೆರ್ ಪಾಫದ ಪೊಣ್ಣು ಬಾಲೆಗ್ ಮಲ್ದಿನ ಅನಾಚಾರೊದ ಪತ್ತ ಒಲವು ತಿಕ್ಕುಂಡು. ಈ ಕ್ರೌರ್ಯದ ಕೊಲೆತ ಬಗೆಟ್ ಬಾರೀ ಆಕ್ರೋಶ ತೋಜಿದ್ ಬರೊಂದುಂಡು.
ಈ ಪ್ರಕರಣೊಡು ನ್ಯಾಯೊಗು ಬೋಡಾದ್, #JusticeForKushi ಪನ್ಪಿನ ಹ್ಯಾಷ್‌ಟ್ಯಾಗ್‌ಡ್ ಟ್ರೆಂಡ್ ಆವೊಂದುಂಡು. ಅಮ್ಮೆದಾಂತಿ ಬಾಲೆದ ಸಾವುಗು ನ್ಯಾಯ ತಿಕ್ಕೊಡು ಪನ್ದ್ ಅಪ್ಪೆ ಬೊಕ್ಕ ಸಮುದಾಯೊದಕುಲು ಬುಲ್ತೊಂದುಲ್ಲೆರ್.
ಸಿಸಿಟಿವಿ ಆಧಾರೊಡು ಪುನ ತಿಕ್ಕಿನಾನಿ ಆ ಪಸಂದ್ರೊಡೆ ತಿರ್ಗೊದಿತ್ತಿನ ನಾಲ್ವೆರೆನ್ ಪೊಲೀಸೆರ್ ಪತ್ತ್‌ದ್ ವಿಚಾರಣೆ ಮಲ್ತೊಂದುಲ್ಲೆರ್ ಪನ್ದ್ ತೆರಿದ್ ಬೈದ್ಂಡ್.
ಉಪಮುಖ್ಯಮಂತ್ರಿ ಡಿ ಕೆ ಶಿವಕುಮಾರ್ ಇಲ್ಲಗ್ ಬತ್ತ್‌ದ್ ಸಮಾಧಾನೊದ ಪಾತೆರ ಪಾತೆರ್ದ್, ಸಮಾಜ ಕಲ್ಯಾಣ ಇಲಾಖೆರ್ದ್ 4,12,500 ರೂಪಾಯಿದ ಚೆಕ್ ಅಂಚೆನೇ ಮಂಚನಾಯಕನಹಳ್ಳಿ ಗ್ರಾಮ ಪಂಚಾಯಿತಿದ 50,000 ರೂಪಾಯಿದ ಚೆಕ್ ಪಿರಿಕಟ್ಟ್ ರೂಪೊಡು ಕೊರ್ಯೆರ್.