Last updated on May 24th, 2025 at 04:21 pm
ಬೊಲ್ತೇರ್, ಮೇ 24: ಗ್ರಾಹಕೆರ್ ಡಿಪೋಸಿಟ್ ದೀತಿನ 40 ಕೋಟಿ ರೂಪಾಯಿ ಕಾಸ್‌ನ್ ಪಿರಕೊರಂದೆ ದಗೆ ಮಲ್ದಿನ ಆರೋಪಡ್ ಶ್ರೀ ರಾಮ ಕ್ರೆಡಿಟ್‌ ಕೋ- ಆಪರೇಟಿವ್‌ ಸೊಸೈಟಿದ ಮಿತ್ತ್ ಬೊಲ್ತೇರ್ ಪೊಲೀಸ್‌ ಸ್ಟೇಷನ್‌ಡ್ ಎಫ್‌ಐಆರ್‌ ದಿಕಲಾತ್ಂಡ್.
ಬೊಲ್ತೇರ್ ಪೇಂಟೆದ ಜೂನಿಯರ್‌ ಕಾಲೇಜ್‌ ಸಾದಿಡ್ ಇಪ್ಪುನ ರಾಮನಗರದ ವಿ.ಆರ್‌. ನಾಯಕ್‌ ಕಾಂಪೌಂಡ್‌ಡ್ ಸುಮಾರ್ 25 ವರ್ಸೊಂರ್ದಿಂಚಿ ವೈವಾಟ್ ಮಲ್ತೊಂದಿಪ್ಪುನ ಶ್ರೀರಾಮ ಕ್ರೆಡಿಟ್‌ ಕೋ- ಆಪರೇಟಿವ್‌ ಸೊಸೈಟಿಡ್ ಆಡಳಿತ ಮಂಡಳಿದಕುಲು ಗ್ರಾಹಕೆರೆಗಾ ಸೇರ್ದಿನ ಡೆಪೋಸಿಟ್ ದೀತಿನ ಸುಮಾರ್ 40 ಕೋಟಿ ರೂ. ಕಾಸ್ ಪಿರ ಗ್ರಾಹಕೆರೆಗ್ ಕೊರಂದೆ ದಗೆ ಮಲ್ದೆರ್ ಪನ್ದ್ ಆರೋಪ ಮಲ್ದೆರ್.
ಈ ಬಗೆಟ್ ಕರಿನ ವರ್ಸ ಗ್ರಾಹಕೆರ್ ಮಾತಾ ಒಟ್ಟಾದ್ ದಾಕಲೆಲೆನ್ ಪತೊಕದು ಡಿಸಿ, ಎಸ್ಪಿ, ಸಹಕಾರ ಸಂಘ, ಗ್ರಾಹಕೆರೆ ಮಿತ್ತರ್ಮೆ ಸೇರ್ದ್ ಮಾತಾ ಕಡೆಟಾ ಒಯಿಲ್ ಬರೆಪಾದೆರ್. ಪೊಲೀಸ್‌ ಸ್ಟೇಶನ್‌ಡ್ ಪ್ರಕರಣ ದಾಕಲ್ತ್‌ದ್ ಜಡ್ತೆ ಮಲ್ಪೆರ ಸೂಚನೆ ಕೊರ್ದಿತ್ತೆರ್. ಆ ಪ್ರಕಾರ ಬೊಲ್ತೇರ್ ಪೊಲೀಸ್‌ ಸ್ಟೇಶನ್‌ಡ್ ಬೊಲ್ತೇರ್ ನಿವಾಸಿ ದಯಾನಂದ ನಾಯಕ್‌ ಸೇರ್ದ್ ಒಟ್ಟು 13 ಜನ ಗ್ರಾಹಕೆರ್ ಗುರುವಾರ ಸೊಸೈಟಿದ 14 ಜನತ ಮಿತ್ತ್ ಒಯಿಲ್ ಬರೆಪಾದಿತ್ತ್ದ್, ಶುಕ್ರವಾರ ಎಫ್‌ಐಆರ್‌ ದಾಕಲಾತ್ಂಡ್.
ದಗೆ ಆತಿನಕ್ಲೆನೆಟ್ ಕಾಲಿ 13 ಜನ ಮಾತ್ರ ಒಯಿಲ್ ಬರೆಪಾದಿತ್ತ್ದ್, ಸುಮಾರ್ 200ರ್ದ್‌ಲಾ ಎಚ್ಚ ಜನಕ್ ಈ ಸೊಸೈಟಿರ್ದ್ ದಗೆ ಆದಿತ್ತ್ಂಡಲಾ ಎಚ್ಚಿನಕುಲು ಒಯಿಲ್ ಕೊರ್ಯೆರೆ ದುಂಬು ಬರೊಂದಿಜ್ಜೆರ್ ಪನ್ದ್ ದಯಾನಂದ ನಾಯಕ್‌ ತೆರಿಪಾದೆರ್.