Last updated on May 29th, 2025 at 02:42 pm
ಉಬಾರ್, ಮೇ 29: ನನ ಬರ್ಪಿನ ಬಕ್ರೀದ್ ಪರ್ಬೊಗು ಏಡ್ ಕನಯೆರೆ ಪಾಸಾಡಿಲೆ ಒಟ್ಟುಗು ರಾಜಸ್ಥಾನೊಗು ಪೋತಿನ 34 ನೆಕ್ಕಿಲಾಡಿದ ಮುಹಮ್ಮದ್ ಝುಬೈರ್ ಆರೀಸ್ ಅವೆರ್ದ್ ಬೊಕ್ಕ ಸಂಪರ್ಕೊಗು ತಿಕ್ಕಂದಿನ ಇಲ್ಲದಕುಲೆಗ್ ಮಲ್ಲ ತರೆಬೇನೆ ಆತ್ಂಡ್.
ಈ ಬಗೆಟ್ ಮಾಧ್ಯಮೊಗು ತೆರಿಪಾಯಿನ ಆರೆನ ಅಮ್ಮೆ ಇಬ್ರಾಹಿಂ, ಎನ್ನ ಮಗೆ ಬೊಕ್ಕ ಆಯನ ದೋಸ್ತಿಯರ್ಲು ಏಡ್‌ಲೆನ್ ಕನಯೆರೆ ಕರಿನ ಸೋಮಾರ ರಾಜಸ್ಥಾನೊಗು ಪೋತೆರ್. ಸುರುಕು ಲಾರಿದ ಬಾಡಾಯಿಗ್ 2 ಲಕ್ಷ ರೂ. ಕೊರ್ಪುನು, ಏಡ್ ಎತ್ತಿಬೊಕ್ಕ ಒರಿನ ಕಾಸ್ ಕೊರ್ಪುನು ಪನ್ದ್ ಅಲ್ಪದಕ್ಲೆಡ ಪಾತೆರ ಆದಿತ್ತ್ಂಡ್. ಆಂಡ ಅಡೆ ಪೋಯಿಬೊಕ್ಕ 10 ಲಕ್ಷ ರೂ. ಕೊರ್ಜಿಂಡ ಏಡ್‌ಲೆನ್ ಕೊರ್ಪುಜ ಪನ್ದ್ ಅಕುಲು ಪನ್ತೆರ್.
ಅವೆಕ್ ಕಾಸ್ ಒಟ್ಟುಮಲ್ಪೆರೆ ಮಗೆ ಎಂಕ್ಲೆಗ್ ಕಾಲ್ ಮಲ್ತ್‌ದ್ ಪನ್ದಿತ್ತೆ. ಆ ಪ್ರಕಾರ ಕಾಸ್‌ನ್ ಆಯನ ಬ್ಯಾಂಕ್ ಅಕೌಂಟ್‌ಗ್ ಪಾಡ್ದ. ಅಪಗ ಏಡ್‌ಲೆನ್ ಲಾರಿಡ್ ಪಾಡ್ದ್ ಕಡಪುಡ್ದ್ಂಡ್ ಪನ್ದ್ ಮಗೆ ಫೋಟೋಲಾ ಕಡಪುಡ್ದಿತ್ತೆ. ಆಂಡ ಅವೆರ್ದ್ ಬೊಕ್ಕ ಫೋನ್ ಮಲ್ತಿನ ಮಗೆ, ಅಲ್ಪದಕುಲು ಕುಡ 20 ಲಕ್ಷ ರೂ. ಕೊರ್ಯೆರೆ ಪನೊಂದುಲ್ಲೆರ್.
ಮಧ್ಯಾಹ್ನ ದ ಉಲಯಿ ಕಾಸ್ ಕೊರ್ಜಿಂಡ ಏಡ್ ಕೊರ್ಪುಜ ಅಂಚೆನೇ ಎನನ್ಲಾ ಪೋಯೆರ ಬುಡ್ಪುಜೆರ್ ಪನ್ದ್ ಪೋಡಿಕಟ್ಟಾವೊಂದುಲ್ಲೆರ್ ಪನ್ದ್ ತೆರಿಪಾದಿತ್ತೆ. ಅವೆರ್ದ್ ಬೊಕ್ಕ ಆಯನ ಫೋನ್ ಸ್ವಿಚ್ ಆಫ್ ಆತ್ಂಡ್. ಮುಲ್ಪದ ಪೊಲೀಸೆರ್ ಕೊರ್ತಿನ ನಂಬ‌ರ್‌ಡ್ ರಾಜಸ್ಥಾನೊದ ಪೊಲೀಸ್ ಕಂಟ್ರೋಲ್ ರೂಂಗ್ ಕಾಲ್ ಮಲ್ತ್‌ದ. ಅವೆಕ್ ಸದು ಕೊರ್ತಿನ ಪೊಲೀಸೆರ್, ಎನ್ನ ಮಗೆ ಸೇರ್ದ್ ಒರಿನಕುಲು ಇಪ್ಪಿ ಜಾಗೆ ನಾಡ್‌ದ್, ಅಕಲೆನ್ ಮಾತಾ ಪೊಲೀಸ್ ಸ್ಟೇಶನ್‌ಗ್ ಲೆತೊಂದು ಬತ್ತ್‌ದ ಪನ್ದ್ ತೆರಿಪಾದೆರ್. ಈತ್ ಆಂಡಲಾ ಮಗೆ ಕಾಲ್ ಸಂಪರ್ಕೊಗು ತಿಕ್ಕ್‌ದಿಜೆ. ಮುಲ್ಪದ ಪೊಲೀಸೆರೆಗ್ ಕಾಲ್ ಮಲ್ತ್ಂಡ ಅಕುಲು ಸಮ ಪಾತೆರುಜೆರ್. ಎಂಕ್ಲೆಗ್ ಬಾರೀ ಪೋಡಿಗೆ ಆವೊಂದುಂಡು, ಮಗನ ರಕ್ಷಣೆಗ್ ಶಾಸಕೆರ್ ದುಂಬು ಬರೊಡು ಪನ್ದ್ ಆರ್ ಆಗ್ರಹ ಮಲ್ದೆರ್.