Last updated on June 2nd, 2025 at 09:16 am
ತುಮಕೂರು, ಜೂನ್ 2: ಸಾದಿಗ್ ಮಣ್ಣ್ ದೊರಿತೆರ್… ಟಯರ್‌ಗ್ ಸೂ ಕೊರ್ಯೆರ್… ಸಾದಿಡ್ ಜೆತೊಂದು ಪೊರ್ಮ್ಬಾಟ ಮಲ್ತೆರ್… ಆಕ್ರೋಶ ತೂಪಾಯೆರ್…ಬಸ್‌ ಟೈರ್‌ದ ಗಾಳಿ ದೆತ್ತೆರ್.. ಭಾರೀ ಹೈಡ್ರಾಮಾ… ಆಕ್ರೋಶರ್ದಾವರ ತುಮಕೂರು ಜಿಲ್ಲೆ ಗುಬ್ಬಿ ತಾಲೂಕ್‌ದ ಸುಂಕಾಪುರ ಪೊತ್ತೊಂದುಂಡು. ಉಂದೆಕ್ ನೆವನ ಹೇಮಾವತಿ ಎಕ್ಸ್ಪ್ರೆಸ್ ಲಿಂಕ್ ಕೆನಾಲ್‌ದ ಬೇಲೆ. ಅಂಚಾಂಡ, ಈ ಬೇಲೆಗ್ ವಿರೋಧ ದಾಯೆ?
ತುಮಕೂರುಡು ಹೇಮಾವತಿ ಎಕ್ಸ್ಪ್ರೆಸ್ ಲಿಂಕ್ ಕೆನಾಲ್‌ದ ಪೊರ್ಮ್ಬಾಟ ಲಕ್ಕ್‌ದ್ಂಡ್. ವಿರೋಧೊದ ನಡುಟುಲಾ ಸರ್ಕಾರ ಬೇಲೆ ಮಲ್ಪೆರ ಪಿದಡ್ದ್ಂಡ್. ಅಂಚಾದ್ ಸರ್ಕಾರೊದ ನಡಕೆಗ್ ಪೊರ್ಮ್ಬಾಟಗಾರೆರ್, ಸ್ವಾಮೀಜಿಲು, ಬೆನ್ನಿದಕುಲು ಪಿಸ್‌ರಾದಿತ್ತ್‌ದ್, ಗುಬ್ಬಿ ತಾಲೂಕ್‌ದ ಸುಂಕಾಪುರ ಬೊಕ್ಕ ಡಿ. ರಾಮ್ ಪುರೊಡು ಮೇ 31ತಾನಿ ನೇಲ್ಯ ಪೊರ್ಮ್ಬಾಟ ಮಲ್ತ್‌ದೆರ್. ತುಮಕೂರುದ ಮಲ್ಲಸಂದ್ರದ ಕಳ್ಳಿಪಾಳ್ಯಡ್ ಸಾದಿ ಅಡ್ಡಕಟ್ಟ್‌ದ್ ಬಿಜೆಪಿ ಶಾಸಕೆರಾಯಿನ ಜ್ಯೋತಿಗಣೇಶ್, ಸುರೇಶ್ ಗೌಡೆ ಪೊರ್ಮ್ಬಾಟ ಮಲ್ತಿತ್ತ್‌ದ್, ಉಂದೆಕ್ ಮಠಾಧೀಶೆರ್‌ಲಾ ಕೈ ಗೋಡ್ಯಾದೆರ್. ಪೊರ್ಮ್ಬಾಟ ಜೋರಾವೊಂದಿತ್ತಿಲೆಕನೆ ಹೇಮಾವತಿ ಎಕ್ಸ್ಪ್ರೆಸ್ ಲಿಂಕ್ ಕೆನಾಲ್ ಬೇಲೆನ್ ತಾತ್ಕಾಲಿಕವಾದ್ ಉಂತಾದೆರ್.
ದುಂಬೆಚ್ಚರ್ಗೆದ ಕ್ರಮ ಆದ್ ಸುಂಕಾಪುರ ತಾರ್ದ ಕೈತಲ್ ಸುತ್ತ 10 ಕಿ.ಮೀ ಸೀಮೆಡ್ ಜಿಲ್ಲಾಡಳಿತ 144 ಸೆಕ್ಷನ್ ಜಾರಿ ಮಲ್ದ್ಂಡ್. ಆಂಡಲಾ ಅವೆನ್ ಗೆನ್ಪಂದೆ ರೈತೆರ್ ಬೊಕ್ಕ ಬಿಜೆಪಿ ನಾಯಕೆರ್, ಕಾರ್ಯಕರ್ತೆರ್ 144 ಸೆಕ್ಷನ್ ಸೀಮೆದ ಉಲಯಿ ಬೊಕ್ಕ ಪಿದಯಿ ಸರ್ಕಾರ ಬೊಕ್ಕ ಡಿಸಿಎಂ ಡಿಕೆ ಶಿವಕುಮಾರ್ ವಿರುದ್ಧ ಘೋಷಣೆ ಲೆತ್ತ್‌ದ್ ಆಕ್ರೋಶ ತೂಪಾದೆರ್.
ರೈತೆರೆ ಪೊರ್ಮ್ಬಾಟ ಬಾರೀ ಜೋರಾದಿತ್ತ್‌ದ್, ತುಮಕೂರು ಮೈನ್‌ರೋಡ್‌ದ ನಡುಟೇ ಟ್ರ್ಯಾಕ್ಟರ್‌ಡ್ ಮಣ್ಣ್ ಕನತ್‌ದ್ ಪಾಡ್ದ್ ಸರ್ಕಾರೊದ ವಿರುದ್ಧ ರೈತೆರ್ ಆಕ್ರೋಶ ತೂಪಾಯೆರ್. ಪೊರ್ಮ್ಬಾಟ ಜೋರಾವೊಂದಿತ್ತಿಲೆಕನೆ ಜಿಲ್ಲಾಡಳಿತ ಬೇಲೆನ್ ತಾತ್ಕಾಲಿಕವಾದ್ ಉಂತಾದೆರ್. ಬೊಕ್ಕ ರೈತೆರ್, ಬಿಜೆಪಿ ನಾಯಕೆರ್ ಪೊರ್ಮ್ಬಾಟ ಉಂತಾದೆರ್. ಆತೇ ಅತ್ತಂದೆ ತಾತ್ಕಾಲಿಕ ಮಾತ್ರ ಅತ್ತ್, ಉಂದು ಅಲಕ್ಕ ಉಂತೊಡು. ಇಜಿಂಡ ಕುಡ ಪೊರ್ಮ್ಬಾಟ ಮಲ್ಪುವ ಪನ್ದ್ ಎಚ್ಚರ್ಗೆ ಕೊರ್ತೆರ್.
ಸರಕಾರೊದ ಪ್ರಕಾರ ಈ ಯೋಜನೆರ್ದಾವರ ನೀರ್‌ದ ಕುಂದೆಲ್ ಇತ್ತಿನ ಜಾಗೆಲೆಗ್ ಸಕಾಯ ಆಪುಂಡುಗೆ.
ಈ ಯೋಜನೆಗ್ ತುಮಕೂರು ಜಿಲ್ಲೆದ ರಾಜಕಾರಣಿಲು, ರೈತೆರ್ ಬಾರೀ ವಿರೋಧ ಮಲ್ತೊಂದುಪ್ಪುನು ದಾಯೆ ಪನ್ಡ ಗೊರೂರು ಡ್ಯಾಂ ರ್ದ್ ವರ್ಸೊಗು 24 TMC ನೀರ್ ತುಮಕೂರು ಜಿಲ್ಲೆಗ್ ಬುಡೊಡು ಪನ್ದ್ ರಾಜ್ಯ ಸರ್ಕಾರ ನೀರ್ ಪಟ್ಟ್‌ದ್ಂಡ್. ಇತ್ತೆ ಮಾಗಡಿ ತಾಲ್ಲೂಕ್‌ಗ್ ಬೇತೆನೇ ಪೊಸತಾದ್ ನೀರ್ ಪಟ್ಟಂದೆ 0.75 ಟಿಎಂಸಿ ನೀರ್ ಬುಡ್ಯೆರ ಪೈಪ್‌ಲೇನ್ ಕಾಮಗಾರಿ ನಡತೊಂದುಂಡು.
ಉಂದೆತ ಒಟ್ಟುಗು ತನ್ನಾತೆಗೇ ತಾರ್ದ ಮುಕೇನ ಕುಣಿಗಲ್‌ಡೆ ಮಾಗಡಿಗ್ ನೀರ್ ಕೊನೊತೊಲಿ. ಅವೆತ ಪಗತೆಗ್ ಸ್ಟೀಲ್ ಪೈಪ್‌‌ಲೆನ್ ಪಾಡ್ದ್ ಮಾಗಡಿಗ್ ಹೇಮಾವತಿ ನೀರ್ ಬುಡ್ಂಡ ಕುಣಿಗಲ್ ತಾಲ್ಲೂಕ್‌ಗ್ ನೀರ್ ಇಜ್ಜಂದಿಲೆಕ ಆಪುಂಡು. ತುಮಕೂರು ಜಿಲ್ಲೆದ ಒರಿನ ತಾಲ್ಲೂಕ್‌ಲೆಗ್ ನೀರ್ ಕಮ್ಮಿ ಆಪುಂಡು ಪನ್ಪಿನ ಪೋಡಿಗೆ ತುಮಕೂರು ಜಿಲ್ಲೆದ ರಾಜಕಾರಣಿಲೆನವು. ತುಮಕೂರು ಜಿಲ್ಲೆಗ್ ವರ್ಸೊಗು 24 ಟಿಎಂಸಿ ಹೇಮಾವತಿ ನೀರ್ ಪನ್ಡ್‌ದಿತ್ತೆರ್ನ್ಡಲಾ, ಇದಮುಟ್ಟ ಒಂಜಿ ವರ್ಸೊಲಾ 24 ಟಿಎಂಸಿ ಹೇಮಾವತಿ ನೀರ್ ತುಮಕೂರು ಜಿಲ್ಲೆಗ್ ಬೈದಿನೇ ಇಜ್ಜಿ. ತುಮಕೂರು ಜಿಲ್ಲೆದ ಕೆದುಕುಲೆಗ್, ಪರ್ಪಿನ ಉದ್ದೇಶೊಗು, ಕೃಷಿ ಉದ್ದೇಶೊಗು ಹೇಮಾವತಿದ ನೀರ್ ಗಲಸುವೆರ್.
ತುಮಕೂರು ಪೇಂಟೆಗ್ಲಾ ಪರ್ಯೆರ ಹೇಮಾವತಿ ನೀರೇ ಬೋಡು. ಗೊರೂರು ಡ್ಯಾಂದ ನೀರ್‌ನ್ ತುಮಕೂರು ಪೇಂಟೆದ ಕೈತಲ್ದ ಬುಗುಡನಹಳ್ಳಿ ಕೆರೆಕ್ ಬುಡ್ದ್, ಅಲ್ಪರ್ದ್ ಪೈಪ್‌ಡ್ ತುಮಕೂರು ನಗರೊಗು ಕಡಪುಡ್ವೆರ್. ಅಂಚೆನೇ ಮಧುಗಿರಿ, ಶಿರಾ ಪೇಂಟೆಲೆಗ್ಲಾ ಕೆರೆಕ್ಲೆಗ್ ನೀರ್ ದಿಂಜಾದ್ ಹೇಮಾವತಿ ನೀರ್‌ನ್ ಪರ್ಯೆರೆ ಕಡಪುಡುವೆರ್. ಗುಬ್ಬಿ, ತುರುವೇಕೆರೆ, ತಿಪಟೂರು, ಚಿಕ್ಕನಾಯಕನಹಳ್ಳಿ, ಕುಣಿಗಲ್ ತಾಲ್ಲೂಕ್‌ಲೆಗ್ಲಾ ಹೇಮಾವತಿ ನೀರ್ ಪರ್ಯೆರೆ, ಬೆನ್ನಿಗ್ ಬೋಡು. ತುಮಕೂರು ಜಿಲ್ಲೆಗ್ ಹೇಮಾವತಿ ಸುದೆತ ನೀರ್ ಬುಡ್ಂಡ, ಬೇತೆ ಸುದೆ ನೀರ್‌ದ ಮೂಲ ಇಜ್ಜಿ. ತುಮಕೂರು ಜಿಲ್ಲೆಗ್ ಹೇಮಾವತಿಯೇ ಜೂವ. ಅಂಚಾದ್ ತುಮಕೂರು ಜಿಲ್ಲೆದ ಜನೊಕುಲು, ರಾಜಕಾರಣಿಲು ಪೆಲಣ ಬುಡ್ಂಡಲಾ ಹೇಮಾವತಿದ ನೀರ್ ಕೊರ್ಪುಜ ಪನ್ದ್ ಪೊರ್ಮ್ಬಾಟದ ಸಾದಿ ಪತ್ತ್‌ದೆರ್.
ಇತ್ತೆ ರಾಜ್ಯೊದುಲಯಿಡೇ ನೀರ್‌ಗ್ ಬೋಡಾದ್ ರಾಜ್ಯೊದಕುಲೇ ಕಂಟ್ಯೊನುನಡೆ ಮುಟ್ಟ ಎತ್ತ್‌ದೆರ್.
ಈ ಬಗೆಟ್ ಇನಿ, ಜೂನ್ 2ಕ್ ಉಪಮುಖ್ಯಮಂತ್ರಿ ಡಿ ಕೆ ಶಿವಕುಮಾರ್ ಸುದ್ದಿಗೋಷ್ಠಿ ಲೆತ್ತ್‌ದೆರ್.