Last updated on June 4th, 2025 at 10:14 pm
ಬೆಂಗಳೂರು, ಜೂನ್ 04: 18ನೇ ಸೀಸನ್ದ ಐಪಿಎಲ್ ಫೈನಲ್ ಗೆಂದ್ದ್ ಚಾಂಪಿಯನ್ ಆತಿನ ಕುಸಿಟುಪ್ಪುನ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಟೀಮ್ದ ಗೊಬ್ಬುಗಾರೆರ್ ಬೆಂಗಳೂರುಗ್ ಬತ್ತ್ದೆರ್. ಚಿನ್ನಸ್ವಾಮಿ ಕ್ರೀಡಾಂಗಣೊಡು ಗೆಂದಿನ ಲೆಕ್ಕೊಡು ಸಂಭ್ರಮಾಚರಣೆ ನಡಪರೆಗುಂಡು. ಈ ಸಂಭ್ರಮಾಚರಣೆನ್ ತೂವರೆ ಪಾಕ ಸಂಖ್ಯೆಡ್ ಅಭಿಮಾನಿಲು ಚಿನ್ನಸ್ವಾಮಿ ಕ್ರೀಡಾಂಗಣೊದ ಕೈತಲ್ ಸೇರ್ದೆರ್. ಈ ಪೊರ್ತುಡು ಒರಿಯರ್ದೊರಿ ತೊರಿತೊಂದು, ಕಾರ್ದಡಿಕ್ ಬೂರ್ದು 11 ಜನ ಆರ್ಸಿಬಿ ಅಭಿಮಾನಿಲು ತೀರ್ದೆರ್.
ತೊರಿತೊಂದು ಕಾರ್ದಡಿಕ್ ಬೂರ್ದು 30ರ್ದ್ಲಾ ಎಚ್ಚ ಜನ ಸೀರಿಯಸ್ ಉಂಡು. ಪೆಟ್ಟಾತಿನಕಲೆನ್ ಶಿವಾಜಿನಗರೊಡು ಉಪ್ಪುನ ಬೌರಿಂಗ್ ಬೊಕ್ಕ ಲೇಡಿ ಕರ್ಜನ್ ಆಸ್ಪತ್ರೆಗ್ ದಾಕಲ್ತ್ದೆರ್. ಒರ್ತಿ ಪೊಂಜೊವು ಸೇರ್ದ್ 11 ಜನ ಆರ್ಸಿಬಿ ಅಭಿಮಾನಿಲು ತೀರ್ದೆರ್. ಬೌರಿಂಗ್ ಆಸ್ಪತ್ರೆದ ಎದುರು ತೀರ್ದಿನಕಲೆನ ಇಲ್ಲದಕುಲು ಮುರಿಯ ದೀವೊಂದುಲ್ಲೆರ್.
ಸ್ಟೇಡಿಯಂದ ಪಿದಯಿಲಾ ಜನಸಾಗರನೇ ಸೇರ್ದಿತ್ತ್ದ್, ಉಂದೆರ್ದಾವರ ಆ ರೋಡ್ಡೆ ಪೋಪಿನ ಗಾಡಿಲು ದುಂಬು ಪೋವರಾವಂದೆ ಟ್ರಾಫಿಕ್ ಜಾಮ್ ಉಂಡಾತ್ಂಡ್. ಜನೊಕ್ಲೆನ್ ಕಂಟ್ರೋಲ್ ಮಲ್ಪೆರಾವಂದೆ ಪೊಲೀಸೆರ್ ಲಾಠಿ ಚಾರ್ಜ್ ಮಲ್ದೆರ್. ನೂಕೊಂದು ನೂಕೊಂದು ಪಾಕ ಜನೊಕ್ಲೆಗ್ ಗಾತಿದ ಗಡಿಕುಲಾತ. ಪೆಟ್ಟಾತಿನಕಲೆನ್ ಪೊಲೀಸೆರ್ ತನ್ಕುಲೆ ಜೀಪ್ಲೆಡೇ ಆಸ್ಪತ್ರೆಗ್ ಲೆತೊಂದು ಪೋತೆರ್.