Last updated on June 20th, 2025 at 12:51 pm
ಕಣ್ಣೂರ್, ಜೂನ್ 20: ನೈತಿಕ ಪೊಲೀಸ್ಗಿರಿರ್ದಾವರ ಪೋಡಿದ್ ಪೊಂಜೊವು ಒರ್ತಿ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದಿನ ನಡಕೆ ಕೇರಳದ ಪಿಣರಾಯಿ ಪೊಲೀಸ್ ಸ್ಟೇಶನ್ ಸೀಮೆದ ಕಾಯಲೋಡ್ ಪನ್ಪಿನಲ್ಪ ನಡತ್ದ್ಂಡ್. ಈ ಪ್ರಕರಣೊಗು ಸಂಬಂಧಿತ್ದ್ ಮೂವೆರಾ SDPI ಕಾರ್ಯಕರ್ತೆರೆನ್ ಅರೆಸ್ಟ್ ಮಲ್ತ್ದೆರ್.
ಕೈದಾತಿನಕಲೆನ್ ಪರಂಬಾಯಿ ನಿವಾಸಿಲಾಯಿನ ವಿಸಿ ಮಂಜಿಲ್ದ ಎಂಸಿ ಮುಬ್ಶೀರ್ (28), ಕಣಿಯನ್ ವಳಪ್ಪಿಲ್ದ ಕೆಎ ಫೈಸಲ್ (34) ಬೊಕ್ಕ ಕೂಡಥನ್ ಕಂಡಿ ಹೌಸ್ದ ವಿಕೆ ರಫ್ನಾಸ್ (24) ಪನಾದ್ ತೆರಿದ್ ಬೈದ್ಂಡ್. ಅಲ್ಳಪದಕ್ಲೆನನೇ ಒಂಜಿ ಕೂಟ ಮಲ್ದಿನ ನೈತಿಕ ಪೊಲೀಸ್ ಗಿರಿರ್ದ್ ಪೊಂಜೊವು ಆತ್ಮಹತ್ಯೆ ಮಲ್ತೊಂದೆರ್ ಪನ್ದ್ ವರದಿ ಆತ್ಂಡ್. ಕೈದಾತಿನಕಲೆನ್ ಗುರುವಾರ ನ್ಯಾಯಂತಡೆಕ್ ಹಾಜಿರಿ ಮಲ್ದೆರ್ ಅಂಚೆನೇ ನ್ಯಾಯಾಂಗ ಕೈದ್ಗ್ ಒಪ್ಯಾದೆರ್.
ಐತಾರ ಬಯ್ಯಡ್ ಅಚ್ಚಂಕರ ಪಲ್ಲಿದ ಕೈತಲ್ ಈ ನಡಕೆ ನಡತಿತ್ತ್ದ್, ರಸೀನಾ ತನ್ನ ದೋಸ್ತಿನೊಟ್ಟುಗು ಕಾರ್ಡ್ ಕುಲ್ದಿತ್ತೆರ್. ಈ ಪೊರ್ತುಡು ಆರೋಪಿಲು ಜವನನ್ ಗಾಡಿರ್ದ್ ಪಿದಯಿ ಒಯ್ತ್ದ್, ಆಕ್ದೆರ್. ಐನ್ ಗಂಟೆದಾತ್ ಪೊರ್ತು ಕಟ್ಟ್ದ್ ಪಾಡ್ದ್ ಆಕಾದ್ ರಾತ್ರೆ ಎಣ್ಮ ಗಂಟೆಗ್ ಜವನನ್ ಅಲಾಪದ SDPI ಕಚೇರಿಗ್ ಲೆತೊಂದು ಪೋತೆರ್. ಅಡೆಗ್ ರಸೀನಾನ ಇಲ್ಲದಕಲೆನ್ ಲೆಪ್ಪುಡಾದ್ ವಾರ್ನಿಂಗ್ ಕೊರ್ದು ರಾತ್ರೆ ಬುಡ್ತೆರ್. ಜವನನ ಇಲ್ಲದಕ್ಲೆನ್ಲಾ ಲೆಪ್ಪುಡಾದ್ ವಾರ್ನಿಂಗ್ ಕೊರ್ತೆರ್. ಈ ಪೊರ್ತುಡು, SDPI ಕಾರ್ಯಕರ್ತೆರ್ ಪೊಣ್ಣಗ್ ಪೆದಂಬು ನೆರ್ದ್ ಅವಮಾನ ಮಲ್ದೆರ್ ಪನ್ದ್ ವರದಿ ಆತ್ಂಡ್.
ಉಂದೆರ್ದಾವರ ಬೆಸರ್ಡ್ ಪೊಂಜೊವು ಜೂನ್ 17ತಾನಿ ಅಂಗಾರೆ ತನ್ನ ಇಲ್ಲಡ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆರ್. ಈ ಪೊರ್ತುಡು ಮೂವೆರ್ ಜವನೆರೆ ಪುದರ್ನ್ ಡೆತ್ನೋಟ್ಡ್ ಬರೆದ್ ದೀತೆರ್. ಅವೆತ ಆಧಾರೊಡು ಪೊಲೀಸೆರ್ ರಫ್ತಾಸ್, ಮುಬಾಶಿರ್ ಬೊಕ್ಕ ಫೈಸಲ್ನ್ ಕೈದ್ ಮಲ್ತ್ದೆರ್. ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಮೆರೆನ ತಮೆರಿದೂರುಡು ನಡತಿನ ಪೊಣ್ಣನ ಸಾವು ಎಸ್ಡಿಪಿಐದ ಭಯೋತ್ಪಾದಕ ಬೇಲೆಲೆನ ಪರಿಣಾಮ ಪನ್ದ್ ಬಿಜೆಪಿದ ಕಣ್ಣೂರ್ ಜಿಲ್ಲಾಧ್ಯಕ್ಷೆ ಕೆ.ಕೆ. ವಿನೋದ್ ಕುಮಾರ್ ಆರೋಪ ಮಲ್ತ್ದೆರ್.