Last updated on June 20th, 2025 at 04:02 pm
ತುಳು ಪನ್ಡ ಮೆತ್ತೆನೆ, ತುಳು ಪನ್ಡ ಸಾಫ್ಟ್, ತುಳುವೆರ್ ಬುದ್ಧಿವಂತೆರ್ ಪನ್ದ್ ಪನೊಂದೇ ತುಳುವೆರೆನ್, ತುಳುನು ಗುಂಡಿಗ್ ಪಾಡುನ ಬೇಲೆ ತುಳುವೆರೆ ಕಣ್ಣೆದುರೇ ನಡತೊಂದುಂಡು.
ಒಂಜಿ ಕಡೆಟ್ ತುಳು ಸಂಸ್ಕೃತಿಗ್ ಮಕ್ಕರ್ ಮಲ್ಪುನವು ಉಂತೊಂದಿಜ್ಜಿ, ಕುಡೊಂಜಿ ಕಡೆಟ್ ನಮ್ಮ ಭಾಷೆದ ಮಿತ್ತ್ಲಾ ಸವಾರಿ ಮಲ್ಪೆರ ಪಿದಡ್ದೆರ್. ಇತ್ತೆ ನಮ ನಮ್ಮ ಪಂಚಾಯತ್ದ ಸಭೆಕ್ಲೆಡ್ ನನ ತುಳು ಪಾತೆರ್ಯೆರ ಬಲ್ಲಿಗೆ, ಕನ್ನಡ ಮಾತ್ರ ಪಾತೆರೊಡುಗೆ..!
ತುಳುವೆರ್ ಕನ್ನಡೊಗು ಕೊರ್ಪಿನಾತ್ ಮರ್ಯಾದಿ ಕನ್ನಡೆರೇ ಕೊರ್ಪೆರಾ, ಇಜ್ಜಾ! ಆಂಡಲಾ ನಮಕ್ ಇನಿ ಇಂಚಿನ ಸ್ಥಿತಿ.
ಕಾರ್ಲದ ವಾಸುದೇವ ನಗರದ ಯಶಸ್ವಿ ನಾಗರೀಕ ಸೇವಾ ಸಂಘ ಪನ್ಪಿನ ಸಂಸ್ಥೆದ ಸಂಚಾಲಕೆ ಮುರಳೀಧರೆ ಪನ್ಪಿನಾಯೆ ಗ್ರಾಮ ಪಂಚಾಯತ್ ಸಾಮಾನ್ಯ ಸಭೆಟ್ ಇಲಾಖೆದ ಅಧಿಕಾರಿಲು ಬೊಕ್ಕ ಜನಪ್ರತಿನಿಧಿಕುಲು ತುಳು ಭಾಷೆ ಗಲಸೆರೆ ಬಲ್ಲಿ, ಕನ್ನಡ ಭಾಷೆಗ್ ಪ್ರಾಮುಖ್ಯತೆ ಕೊರೊಡು ಪನ್ದ್ ಪಂಚಾಯತ್ ಅಭಿವೃದ್ಧಿ ಅಧಿಕಾರಿಲೆಗ್ ನಿರ್ದೇಶನ ಕೊರ್ಯೆರ ಬಿನ್ನಪು ಮಲ್ತ್ದ್ ಓಲೆ ಬರೆತೆ.
ಇತ್ತೆ ಅವೆತ ಎದುರು-ಪಿರ, ಎಡ್ಡೆ-ಪಡ್ಕೆ ತೂವಂದೆ ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಮಾತಾ ತಾಲೂಕು ಪಂಚಾಯತ್ ಕಾರ್ಯನಿರ್ವಾಹಕ ಅಧಿಕಾರಿಲೆಗ್ ಅಗತ್ಯ ಕ್ರಮ ಗೆತೊನರೆ ಸೂಚನೆ ಕೊರ್ತೆರ್.
ಅಡೆಗ್ ಮುಗೀಂಡ್, ನನ ನಮ್ಮ ಪಂಚಾಯ್ತಿಡ್ ನಮ್ಮ ಇಲ್ಲದ, ನಮ್ಮ ನಿರೆಕರೆತ ಸಮಸ್ಯೆಲೆನ ಬಗೆಟ್ ನಮ್ಮ ಭಾಷೆಡ್ ಪಾತೆರುನೆಕ್ ಅಡ್ಡ ದೀದಾಂಡ್.
ಅಪಗ ತುಳುವೆರ್ ಈ ದೇಶೊದ ಪ್ರಜೆಕುಲು ಅತ್ತಾ? ದ್ರಾವಿಡ ಭಾಷೆಲೆಡೇ ಮಾತೆರ್ದ್ ಎಚ್ಚ ಅಭಿವೃದ್ಧಿ ಆದಿತ್ತಿನ, ಮೋಸ್ಟ್ ಅಡ್ವಾನ್ಸ್ಡ್ ತುಳು ಭಾಷೆಗ್ ದಾಯೆ ಇಂಚಿನ ಪರಿಸ್ಥಿತಿ? ತುಳು ಪನ್ಡ ಮುರಳೀಧರ ನಂಚಿನಕಲೆಗ್ ದಾಯೆ ಈತ್ ಪಗೆ, ನಂಜಿ?
ನಮ ಮನಿಪಂದೆ ಕುಲ್ಯಂಡ ನನ ಇಲ್ಲಡ್ಲಾ ತುಳು ಪಾತೆರೊಡ್ಚಿ ಪನ್ದ್ ಆದೇಶ ಮಲ್ತ್ಂಡಲಾ ಸೋದ್ಯ ಇಜ್ಜಿ