Last updated on June 26th, 2025 at 10:43 am
ಮಂಜೇಶ್ವರ, ಜೂ. 26: ರಾತ್ರೆ ಇಲ್ಲಡ್ ಜೆತ್ತ್ದಿತ್ತಿನ ಅಪ್ಪೆನ್ ಸೂ ಪಾಡ್ದ್ ಕೆರ್ತಿನ ದಾರುಣ ನಡಕೆ ಮಂಜೇಶ್ವರದ ವರ್ಕಾಡಿಡ್ ನಡತ್ದ್ಂಡ್. ಅಪ್ಪೆನ್ ಕೆರ್ನೆರ್ದ್ ಬೊಕ್ಕ, ಬರಿತಿಲ್ಲದ ಪೊಣ್ಣನ್ಲಾ ಇಲ್ಲಗ್ ಲೆತ್ತ್ದ್, ಆಲೆಗ್ಲಾ ಕೆಂಗುಡೆ ಸೂ ಕೊರ್ತೆ.
ಬರಿತಿಲ್ಲದ ಪೊಣ್ಣು ಸೀರಿಯಸ್ ಆದ್ ಆಸ್ಪತ್ರೆಗ್ ದಾಕಲಾತೆರ್. ವರ್ಕಾಡಿ ನಲ್ಲಂಗಿ ನಿವಾಸಿ ದಿ.ಲೂಯಿಸ್ ಮೊಂತೇರೋ ಮೆರೆನ ಬೊಡೆದಿ ಹಿಲ್ಲಾ (60) ತೀರ್ದಿನಾರ್. ಮಗೆ ಮೇಲ್ವಿನ್ ಸೂ ಪಾಡ್ದಿನಾಯೆ. ಬರಿತಿಲ್ಲದ ವಿಕ್ಟರ್ ಮೆರೆನ ಬೊಡೆದಿ ಲೊಲಿಟಾ (30) ಸೀರಿಯಸ್ ಆದ್ ಆಸ್ಪತ್ರೆಗ್ ದಾಕಲಾತಿನಾರ್. ಜೂನ್ 26 ಗುರುವಾರ ಪುಲ್ಯ ಈ ನಡಕೆ ನಡತಿತ್ತ್ದ್, ಮಗೆ ಮೇಲ್ವಿನ್ ಮೊಂತೇರೋ (33) ಸೂ ಪಾಡ್ದ್ ಪದ್ರಾಡಾತೆ. ರಾತ್ರೆ ಅಪ್ಪೆಗ್ ಸೂ ಪಾಡಿಬೊಕ್ಕ, ಬರಿತಿಲ್ಲದಾರೆನ್ ಅಪ್ಪೆಗ್ ಉಷಾರಿಜ್ಜಿ ಪನ್ದ್ ಇಲ್ಲಗ್ ಲೆತ್ತ್ದ್ ಆರೆಗ್ಲಾ ಸೂ ಪಾಡ್ದೆ. ಅಪ್ಪೆನ ಪುನ ಇಲ್ಲದ ಪಿರವು ಬಲ್ಲೆಡ್ ತಿಕ್ಕ್ದ್ಂಡ್. ಇಲ್ಲಡ್ ಅಪ್ಪೆ ಬೊಕ್ಕ ಮಗೆ ಮಾತ್ರ ಇತ್ತ್ದ್, ಕುಡೊರಿ ಮಗೆ ಅಲ್ವಿನ್ ಮೊಂತೇರೋ ಗಲ್ಫ್ಡ್ ಉಲ್ಲೆರ್. ಆರೋಪಿ ಮೇಲ್ವಿನ್ ಕಟ್ವಾನ ಕಾರ್ಮಿಕೆ ಆದಿತ್ತ್ದ್, ದಾಯೆ ಕೆರ್ತೆ ಪನ್ದ್ ತೆರಿದ್ ಬೈದಿಜಿ. ಮಂಜೇಶ್ವರ ಪೊಲೀಸೆರ್ ಜಾಗೆಗ್ ಬತ್ತ್ದ್ ಜಡ್ತೆ ಮಲ್ತೊಂದುಲ್ಲೆರ್.