Last updated on June 26th, 2025 at 01:33 pm
ಕುಡ್ಲ, ಜೂ. 26: ಬ್ಯಾಂಕ್ರ್ದ್ ರಿಟೈರ್ ಆತಿನ ಬೇಲೆದಾರ್ ಒರಿ ತಾನ್ ಬೇಲೆ ಮಲ್ತೊಂದಿತ್ತಿನ ಬ್ಯಾಂಕ್ಡೇ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಕುಡ್ಲದ ರಾಮಭವನ ಕಾಂಪ್ಲೆಕ್ಸ್ಡ್ ಇಪ್ಪುನ ಕೆನರಾ ಬ್ಯಾಂಕ್ದ ಸ್ಟೋರ್ ರೂಮ್ಡ್ ನಡತ್ದ್ಂಡ್.
ತೀರ್ದಿನಾರೆನ್ ಅಳಕೆ ನಿವಾಸಿ ಗಿರಿಧರ್ ಯಾದವ್ (61) ಪನ್ದ್ ಗುರ್ತ ಪತ್ತ್ದೆರ್. ಮೇರ್ ಕೊಡಿಯಾಲ್ ಬೈಲ್ ಕೆನರಾ ಬ್ಯಾಂಕ್ಡ್ ಸುಮಾರ್ 40 ವರ್ಸ ಅಟೆಂಡರ್ ಆದ್ ಬೇಲೆ ಮಲ್ದೆರ್. ಇಂಚಿಪ ರಿಟೈರ್ ಆದಿತ್ತೆರ್. ಬ್ಯಾಂಕ್ದ್ ಮಿತ್ತ್ದ ಮೋಕೆಗ್ ದಿನೋಲಾ ಬ್ಯಾಂಕ್ಗ್ ಬತ್ತ್ದ್ ಪೋಪೆದೆರ್ಗೆ. ಅಂಚೆನೇ ಕೋಡೆ ಬ್ಯಾಂಕ್ಗ್ ಬೈದಿನಾರ್ ಪಿರ ಇಲ್ಲಗ್ ಪೋತುಜೆರ್. ಅಂಚಾದ್ ಗಿರಿಧರ್ ಮೆರೆನ ಬೊಡೆದಿ ಬಂದರ್ ಪೊಲೀಸ್ ಸ್ಟೇಶನ್ಡ್ ನಾಪತ್ತೆ ಆತೆರ್ ಪನ್ದ್ ಒಯಿಲ್ ಬರೆಪಾದೆರ್ಗೆ.
ಇನಿ ಕಾಂಡೆ ಬ್ಯಾಂಕ್ದ ಬಾಕಿಲ್ ದೆಪ್ಪುನಗ ಬ್ಯಾಂಕ್ದ ಸ್ಟೋರ್ ರೂಂಡ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದಿನ ಸ್ಥಿತಿಟ್ ಗಿರಿಧರ್ ತಿಕ್ಕ್ದೆರ್. ಆತ್ಮಹತ್ಯೆಗ್ ಪತ್ತ ನೆವನ ತೆರಿದ್ ಬೈದಿಜಿ. ಜಾಗೆಗ್ ಪೊಲೀಸೆರ್ ಬತ್ತ್ದ್ ಜಡ್ತೆ ಮಲ್ತೊಂದುಲ್ಲೆರ್ . ಗಿರಿಧರ್ ಯಾದವ್ ಮೇರ್ ರಾಜ್ಯಮಟ್ಟೊದ ಪವರ್ ಲಿಪ್ಟರ್ ಆದಿತ್ತ್ದ್, ಪಾಕ ಪದಕೊಲೆನ್ ಗೆಂದ್ದೆರ್. ಆರೆಗ್ ಆರೋಗ್ಯದ ಸಮಸ್ಯೆ ಇತ್ತ್ಂಡ್ ಪನ್ದ್ ಪನೊಂದುಲ್ಲೆರ್.