ತುಳು ಭಾಷೆನ್ ಎಣ್ಮನೇ ಪರಿಚ್ಛೇದೊಗು ಗೋಡ್ಯಾಯೆರ ಕೇಂದ್ರ ಅಧಿಕೃತ ಭಾಷಾ ಇಲಾಖೆದ ಕಾರ್ಯಂತೆರೆಗ್ ಬಿನ್ನಪು ಸಂದಾಯಿನ ಶಾಸಕೆ ಗುರ್ಮೆ ಸುರೇಶ್ ಶೆಟ್ರ್ ಬೊಕ್ಕ ಸಂಸದೆ ಕೋಟ ಶ್ರೀನಿವಾಸ ಪೂಜಾರ್ಲು

Last updated on July 4th, 2025 at 08:51 am

ದೆಲ್ಲಿ, ಜು. 04: ತುಳು ಭಾಷೆನ್ ಎಣ್ಮನೇ ಪರಿಚ್ಛೇದೊಗು ಗೋಡ್ಯಾಯೆರ ಅಂಚೆನೇ ತುಳು ಭಾಷೆಗ್ ಕರ್ನಾಟಕ ಬೊಕ್ಕ ಕೇರಳಡ್ ಅಧಿಕೃತ ಭಾಷೆ ಮಾನಾದಿಗೆಗ್ ಪಾಕ ದಶಕೊರ್ದು ಕಾಯೆಸ್ ಮಲ್ತೊಂದೇ ಉಲ್ಲ. ಇಂಚಿನನೇ ಒಂಜಿ ಪುನೆಪುಡು ಕಾಪು ಶಾಸಕೆ ಗುರ್ಮೆ ಸುರೇಶ್ ಶೆಟ್ರ್, ಒಡಿಪು-ಎಲ್ಯಮಗಲ್ನೂರು ಸಂಸದೆ ಕೋಟ ಶ್ರೀನಿವಾಸ ಪೂಜಾರ್ಲೆನ ಒಟ್ಟುಗು ಕೇಂದ್ರ ಗೃಹ ಇಲಾಖೆದ ಅಧೀನೊಡು ಇಪ್ಪುನ ಕೇಂದ್ರ ಅಧಿಕೃತ ಭಾಷಾ ಇಲಾಖೆದ ಕಾರ್ಯಂತೆರ್ ಶ್ರೀಮತಿ ಅನ್ಸುಲಿ ಆರ್ಯ ಮೆರೆನ್ ಭೇಟಿ ಆದ್, ತುಳುನು ಎಣ್ಮನೇ ಪರಿಚ್ಛೇದೊಗು ಗೋಡ್ಯಾವೊಡು ಪನ್ದ್ ಬಿನ್ನಪು ಮಲ್ತೆರ್.

ಗುರ್ಮೆ ಸುರೇಶ್ ಶೆಟ್ರ್ ಬರೆತಿನ ಓಲೆಡ್, ತುಳು ದ್ರಾವಿಡ ಭಾಷಾ ವರ್ಗೊಗು ಸೇರ್ದಿನ ಒಂಜಿ ಪೊಲಿದಿಂಜಿನ ಪೊರ್ಲುದ ಭಾಷೆ, ಉಂದೆನ್ ಲೋಕೊರ್ಮೆ ಸುಮಾರ್ ಒಂಜಿ ಕೋಟಿ ಜನ ಪಾತೆರುವೆರ್. ತುಳುಕು ಸುಮಾರ್ 2800 ವರ್ಸೊದ ಪರತಿರಿ ಉಂಡು. ಶಬ್ದಕೋಶ-ಅಂಕೆಅಂಶೊಲೆನ ಆಧಾರೊಡು ವಿದ್ವಾಂಸೆರ್ ತುಳು ಭಾಷೆ ಕ್ರಿ.ಪೂ. ಎಣ್ಮನೇ ಶತಮಾನೊರ್ದು ಸ್ವತಂತ್ರವಾದ್ ಬುಲೆದ್ ಬೈದ್ಂಡ್ ಪನ್ದ್ ಪನ್ಪೆರ್. ಎಡ್ಡೇನ ಶಾಸ್ತ್ರೀಯ ಸಾಹಿತ್ಯೊಲುಲಾ ತುಳು ಭಾಷೆಡ್ ಉಲ್ಲ. 14, 15ನೇ ಶತಮಾನೊದ ತುಳು ಶಾಸನೊಲು ಇತ್ತ್‌ದ್ ತುಳು ಭಾರತೊದ ಪಿರಾಕ್‌ದ ಭಾಷೆಲೆಡ್ ಒಂಜಿ ಪನ್ದ್ ಬರೆತೆರ್.

ದೇಶೊಡು ಒಟ್ಟು 22 ಭಾಷೆಲು ಎಣ್ಮನೇ ಪರಿಚ್ಛೇದೊಡು ಉಲ್ಲ, ಆಂಡ ಅವೆಟ್ ತೆನ್ಕಾಯಿ ಭಾರತೊದವು ಕಾಲಿ 4 ಮಾತ್ರ. ಪಾಕ ವರ್ಸೊರ್ದಿಂಚಿ ತುಳುನು ಎಣ್ಮನೇ ಪರಿಚ್ಛೇದೊಗು ಗೋಡ್ಯಾಯೆರ ಬಿನ್ನಪು ಮಲ್ತೊಂದುಲ್ಲ ಪನ್ದ್ ಬರೆತೆರ್.

ಕರಿನ ವರ್ಸ ಲೋಕಸಭೆಟ್ ತುಳು ಭಾಷೆನ್ ಎಣ್ಮನೇ ಪರಿಚ್ಛೇದೊಗು ಗೋಡ್ಯಾಯೆರ ಕೇನ್ದಿನ ಪ್ರಶ್ನೆಗ್ ಪೊಸತಾದ್ ಒವ್ವೇ ಭಾಷೆನ್ ಎಣ್ಮನೇ ಪರಿಚ್ಛೇದೊಗು ಗೋಡ್ಯಾಯೆರ ಒವ್ವೇ ಮಾನದಂಡೊಲು ಇಜ್ಜ, ಅಂಚಾದ್ ಪೊಸ ಮಾನದಂಡೊಲೆನ್ ಬರೆಪುನೇಟ ಗೋಡ್ಯಾಯೆರ ಸಾಧ್ಯತೆ ಇಜ್ಜಿ ಪನ್ದ್ ಸದು ಬತ್ತಿತ್ತ್ಂಡ್.