Last updated on July 4th, 2025 at 12:18 pm
ಕುಡ್ಲ, ಜುಲೈ 4: ಮಗೆ ಡ್ರಗ್ಸ್ ವ್ಯಸನಿ ಆತೆ ಪನ್ದ್ ಅಪ್ಪೆಅಮ್ಮೆ ಪೊಲೀಸೆರೆಗ್ ಕೊರ್ತಿನ ಒಯಿಲ್ದ ಪ್ರಕಾರ ಜಡ್ತೆ ಮಲ್ತಿನ ಪೊಲೀಸೆರ್ ಐವೆರ್ ಡ್ರಗ್ಸ್ ಪೆಡ್ಲರ್ಲೆನ್ ಅರೆಸ್ಟ್ ಮಲ್ದೆರ್. ಉಂದೆರ್ದಾವರ ಸುಮಾರ್ 200ರ್ದ್ಲಾ ಎಚ್ಚ ಜನಕ್ ಡ್ರಗ್ಸ್ ಸಪ್ಲೈ ಮಲ್ತೊಂದಿತ್ತಿನಕುಲು ತಿಕ್ಕ್ದ್ ಬೂರ್ದೆರ್.
ಕೈದಾತಿನಕಲೆನ್ ಕುಡ್ಲದ ತುಷಾರ್ (21), ಧನ್ವಿ ಶೆಟ್ಟಿ (20), ಸಾಗರ್ ಕರ್ಕೇರಾ (19), ವಿಕಾಸ್ ಥಾಪ (23), ವಿಘ್ನೇಶ್ ಕಾಮತ್ (24) ಪನ್ದ್ ಗುರ್ತ ಪತ್ತ್ದೆರ್. ಜುಲೈ 2 ತಾನಿ ಸೆನ್ ಪೊಲೀಸ್ ಸ್ಟೇಶನ್ಗ್ ಬತ್ತಿನ ಒಲವುದ ಪ್ರಕಾರ ಕುಡ್ಲದ ಪಡುಶೆಡ್ಡೆ ಗ್ರಾಮೊದ ಹಾಲಾಡಿ ಪನ್ಪಿನಲ್ಪ ಮಾದಕ ಸೊತ್ತುಲೆನ್ ಮಾರೊಂದುಪ್ಪುನ ಪೊರ್ತುಡು ದಾಳಿ ಮಲ್ತ್ದ್ ಒರಿಯೊರಿಯನ ಕೈರ್ದ್ 1 ಕೆ.ಜಿ ರ್ದ್ಲಾ ಎಚ್ಚಿನ ಪ್ರಮಾಣೊದ ಗಾಂಜಾ ಸೇರ್ದ್ ಒಟ್ಟು 5.7 ಕೆ.ಜಿ ತೂಕೊದ ರೂ 5,20,000/- ಮೌಲ್ಯೊದ ನಿಷೇಧಿತ ಮಾದಕ ಸೊತ್ತುಲೆನ್ ಬೊಕ್ಕ ಆರೋಪಿಲು ಕೃತ್ಯೊಗು ಗಲಸ್ದಿನ 06 ಮೊಬೈಲ್ ಫೋನ್, 1 ಟೂವೀಲರ್ ಗಾಡಿನ್ ವಶೊಕು ಗೆತೊಂದೆರ್.