Last updated on July 10th, 2025 at 06:31 pm
ಕುಡ್ಲ, ಜು. 10: ಕದ್ರಿ ಟ್ರಾಫಿಕ್ ಪೊಲೀಸ್ ಸ್ಟೇಶನ್ದ ಸಿಬ್ಬಂದಿ ತಸ್ಲಿಂ ರೂ. 5000/- ಲಂಚದ ಕಾಸ್ ಗೆತೊನೊಂದುಪ್ಪುನಗ ಲೋಕಾಯುಕ್ತ ಪೊಲೀಸೆರೆ ಬೇಪುಗು ಬೂರ್ದೆರ್. ಇತ್ತೆ ಸಿಬ್ಬಂದಿನ್ ವಶೊಕು ಗೆತೊಂದು ಜಡ್ತೆ ಮಲ್ತೊಂದುಲ್ಲೆರ್.
ಕಾರ್ ಬೊಕ್ಕ ಸ್ಕೂಟರ್ ನಡುಟು ನಂತೂರು ಸರ್ಕಲ್ಡ್ ಎಕ್ಸಿಡೆಂಟ್ ಆದಿತ್ತ್ದ್, ಈ ಬಗೆಟ್ ಕದ್ರಿ ಟ್ರಾಫಿಕ್ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ಂಡ್. ಕದ್ರಿ ಟ್ರಾಫಿಕ್ ಪೊಲೀಸ್ ಸ್ಟೇಶನ್ದ ಸಿಬ್ಬಂದಿ ತಸ್ಲಿಂ ಮೇರ್ ಕಾರ್, ಕಾರ್ದ ರೆಕಾರ್ಡ್ಲೆನ್ ಪೊಲೀಸ್ ಸ್ಟೇಶನ್ಗ್ ಕನತ್ದ್ ಕೊರ್ಯೆರ ತೆರಿಪಾದಿತ್ತೆರ್, ಅಂಚೆನೇ ಒಯಿಲ್ ಬರೆಪಾದಿನಾರ್ ಕಾರ್ದ ರೆಕಾರ್ಡ್ಲೆನ್ ಪೊಲೀಸ್ ಸ್ಟೇಶನ್ಗ್ ಕೊರ್ತೆರ್.
ಈ ಬಗೆಟ್ ಒಯಿಲ್ ಬರೆಪಾದಿನಾರೆಡ ಆರೆನ ಕಾರ್ನ್ ಪೊಲೀಸ್ ಸ್ಟೇಶನ್ರ್ದ್ ಬುಡ್ಪಾಯೆರ ಕದ್ರಿ ಟ್ರಾಫಿಕ್ ಪೊಲೀಸ್ ಸ್ಟೇಶನ್ ಸಿಬ್ಬಂದಿ ತಸ್ಲಿಂ ಮೇರ್ ರೂ. 50,000/- ಲಂಚ ಕೇನ್ದೆರ್. ಅವೆರ್ದ್ ಬೊಕ್ಕ ಒಯಿಲ್ ಬರೆಪಾದಿನಾರ್ ತನ್ನ ವಕೀಲೆರೆಡ ಈ ವಿಷಯೊನು ತೆರಿಪಾದ್ ವಕೀಲೆರ್ ಸ್ಟೇಶನ್ಗ್ ಬತ್ತ್ದ್ ಪಿರ್ಯಾದಿದಾರೆರೆನ ಕಾರ್ನ್ ಬುಡ್ದು ಕೊರ್ರೆ ಪನ್ನಗ, ದೂರುದಾರೆರ್ ಕಾರ್ನ್ ಗೆತೊಂದೆರ್ ಪನ್ದ್ ಕಾಲಿ ಸೈನ್ ಗೆತೊಂದು ಕಾರ್ನ್ ಪೊಲೀಸ್ ಸ್ಟೇಶನ್ರ್ದ್ ಬುಡ್ತುಜೆರ್. ಬೊಕ್ಕ ತಸ್ಲಿಂ ಮೇರ್ ಕಾರ್ನ್ ಪಿರ್ಯಾದಿದಾರೆರೆಗ್ ಬುಡ್ದುಕೊರ್ಯೆರ ದೂರುದಾರೆರೆ ಮೊಬೈಲ್ನ್ ಒತ್ತಾಯೊಡು ಗೆತೊಂದು ಕಾರ್ನ್ ಬುಡ್ದು ಕಡಪುಡ್ದೆರ್.
ಬೊಕ್ಕ ದೂರುದಾರೆರ್ ತನ್ನ ಮೊಬೈಲ್ ಪೋನ್ನ್ ಪಿರ ಕೊರ್ಯೆರ ಪನ್ನಗ ತಸ್ಲಿಂ ರೂ 50,000/- ಲಂಚ ಕೇನ್ದ್, ಮೊಬೈಲ್ ಪಿರ ಕೊರೊಡಾಂಡ ಒರಿಜಿನಲ್ ಲೈಸನ್ಸ್ನ್ ಸ್ಟೇಶನ್ಗ್ ಕನತ್ ಕೊರೊಡು ಪನ್ದ್ ಪನ್ತೆರ್. ಅಂಚೆನೇ ದೂರುದಾರೆರ್ ಒರಿಜಿನಲ್ ಲೈಸನ್ಸ್ನ್ ಕೊರ್ತೆರ್.
ತಸ್ಲಿಂ ಸ್ಟೇಶನ್ದ ಕುಡೊರಿ ಸಿಬ್ಬಂದಿ ವಿನೋದ್ರೆಡ ರೂ. 30,000/- ಲಂಚದ ಕಾಸ್ ಕೊರ್ದು ಒರಿಜಿನಲ್ ಲೈಸನ್ಸ್ ಗೆತೊಂದು ಪೋಯೆರ ಪನ್ದಿತ್ತ್ದ್, ದೂರುದಾರೆರ್ ಜುಲೈ 9, 2025 ತಾನಿ ಕದ್ರಿ ಟ್ರಾಪಿಕ್ ಪೊಲೀಸ್ ಸ್ಟೇಶನ್ಗ್ ಪೋದು ತಸ್ಲಿಂ ರೆನ್ ತಿಕ್ಕ್ದ್ ಪಾತೆರ್ನಗ ಒರಿಜಿನಲ್ ಲೈಸನ್ಸ್ ಕೊರ್ಯೆರ ತಸ್ಲಿಂ ರೂ 10,000/- ಕಾಸ್ ಕೇನ್ದೆರ್.
ಅಪಗ ದೂರುದಾರೆರ್ ಎನಡ ರೂ 500 ಉಂಡು ಪನ್ದ್ ಪನ್ನಗ ರೂ 5000 ಇಜ್ಜಂದೆ ಸ್ಟೇಶನ್ದಂಚಿ ಕಾರ್ ದೀವೊರ್ಚಿ ಪನ್ದ್ ನೆರ್ದ್ ಕಡಪುಡ್ದೆರ್. ಒರಿಜಿನಲ್ ಲೈಸನ್ಸ್ ಕೊರ್ಯೆರ ರೂ 5000/- ಲಂಚ ಕೇನ್ದೆರ್. ದೂರುದಾರೆರೆಗ್ ಕಾನೂನು ಬದ್ಧವಾದ್ ಮಲ್ಪೊಡಾಯಿನ ಸರ್ಕಾರಿ ಬೇಲೆಗ್ ಲಂಚ ಕೊರ್ದು ಮಲ್ತೊನರೆ ಇಷ್ಟ ಇಜ್ಜಂದಿನೆರ್ದಾವರ ಕುಡ್ಲ ಲೋಕಾಯುಕ್ತ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಈ ಬಗೆಟ್ ಕುಡ್ಲ ಲೋಕಾಯುಕ್ತ ಪೊಲೀಸ್ ಸ್ಟೇಶನ್ಡ್ ಕದ್ರಿ ಟ್ರಾಪಿಕ್ ಪೊಲೀಸ್ ಸ್ಟೇಶನ್ದ ಸಿಬ್ಬಂದಿ ತಸ್ಲಿಂ ಬೊಕ್ಕ ವಿನೋದ್ರೆನ ಮಿತ್ತ್ ಪ್ರಕರಣ ದಾಕಲಾತ್ಂಡ್.
ಈ ಕಾರ್ಯಾಚರಣೆಡ್ ಶ್ರೀ ಕುಮಾರಚಂದ್ರ, ಪೊಲೀಸ್ ಅಧೀಕ್ಷಕೆರ್ (ಪ್ರಭಾರ), ಕರ್ನಾಟಕ ಲೋಕಾಯುಕ್ತ, ಕುಡ್ಲ ವಿಭಾಗ ಮೆರೆನ ಮಾರ್ಗದರ್ಶನೊಡು, ಕುಡ್ಲ ಲೋಕಾಯುಕ್ತ ಪೊಲೀಸ್ ಸ್ಟೇಶನ್ದ ಪೊಲೀಸ್ ಉಪಾಧೀಕ್ಷಕೆರಾಯಿನ ಡಾ. ಗಾನ ಪಿ ಕುಮಾರ್, ಶ್ರೀ ಸುರೇಶ್ ಕುಮಾರ್.ಪಿ, ಪೊಲೀಸ್ ನಿರೀಕ್ಷಕೆರಾಯಿನ ಶ್ರೀಮತಿ ಭಾರತಿ ಜಿ, ಶ್ರೀ ಚಂದ್ರಶೇಖರ್ ಕೆ.ಎನ್, ಕುಡ್ಲ ಲೋಕಾಯುಕ್ತ ಸಿಬ್ಬಂದಿಲೆ ಒಟ್ಟುಗು ಟ್ರ್ಯಾಪ್ ಕಾರ್ಯಾಚರಣೆ ಮಲ್ದೆರ್.