Last updated on July 22nd, 2025 at 06:49 pm
ಕುಡ್ಲ, ಜು. 22: ಪುದರ್ಗ್ ಸ್ಮಾರ್ಟ್ ಸಿಟಿ ಆಂಡಲಾ, ಮರ್ಯಾಲಡ್ ಮುಲ್ಪದ ರೋಡ್ಲೆನ ಅವಸ್ತೆ ಪನ್ಯೆರ ಪೊಕ್ಕಡೆ ಆಪುಂಡು. ಪೇಂಟೆದ ಮಲ್ಲ ಮಲ್ಲ ರೋಡ್ಲು ಸೇರ್ದ್ ಪಾಕ ರೋಡ್ಲ್ ಗುಂಡಿ ಗುರುಂಪುಲೆಡ್ ದಿಂಜಿದ್ ಪೋತ. ಉಂದೆರ್ದಾವರ ಗಾಡಿ ಬುಡ್ಪುನಕುಲೆಗ್ ಬಾರೀ ಬಂಙ ಆತ್ಂಡ್. ಪಾಲಿಕೆದ ಗೋಸ್ಮರಿರ್ದಾವರ ಜನೊಕುಲು ಪಿಸಿರಾದಿತ್ತ್ದ್, ಡಿವೈಎಫ್ಐ ಸಂಘಟನೆ ಇನಿ ಉಂದೆತ ಬಗೆಟ್ ಪೊರ್ಮ್ಬಾಟ ಮಲ್ದ್ಂಡ್.
ಪಂಪ್ವೆಲ್ರ್ದ್ ಕಂಕನಾಡಿ ಆದ್ ಕುಡ್ಲ ಪೇಂಟೆ ಪೊಗ್ಗುನ ಸಾದಿಡ್ ಗುಂಡಿ ಗುರುಂಪುಲೆನನೇ ಕಾರ್ಬಾರ್. ಇಂಚಿನ ಮಲ್ಲ ಮಲ್ಲ ಗುಂಡಿಲೆರ್ದಾವರ ಬೈಕ್, ಸ್ಕೂಟರ್ಡ್ ಪೋಪುನಕ್ಲೆನ ಬಂಙ ಪನ್ಡ್ದ್ ಸುಖ ಇಜ್ಜಿ. ಪಾಕ ಜನ ಈ ಗುರಿಕ್ಲೆಗ್ ಬೂರ್ದು ಪೆಟ್ಟ್ ಮಲ್ತೊಂದು ಪೋತೆರ್.
ಕುಡ್ಲ ಕದ್ರಿ ಕಂಬುಲರ್ದ್ ಕದ್ರಿ ದೇಲಂತಡೆಗ್ ಪೋಪುನ ಸಾದಿ, ಕೋಡಿಯಾಲ್ ಬೈಲ್ ಅಡ್ಡ ತಾದಿ, ಜೆಪ್ಪು ಮಾಂಕಾಳಿ ಪಡ್ಪು ಶಾಲೆದ ಕೈತಲ್ದ ಸಾದಿ, ಇಂಚ ಪಾಕ ಸಾದಿಲು ಅಲಕ್ಕ ಅಂಡಮಾನ್ ಆದ್ ಪೋತ.
ಇನಿ ಸಾದಿದ ಗುಂಡಿ ಗುರುಂಪುಲೆನ ಬಗೆಟ್ ಡಿವೈಎಫ್ಐ ಕುಡ್ಲ ಸಮಿತಿ ಕಂಕನಾಡಿದ ಕರಾವಳಿ ಸರ್ಕಲ್ಡ್ ಮಲ್ಲ ಪೊರ್ಮ್ಬಾಟ ಮಲ್ತ್ಂಡ್.
ಪೊರ್ಮ್ಬಾಟೊಡು ಪಾತೆರ್ನ ಡಿವೈಎಫ್ಐ ಜಿಲ್ಲಾಧ್ಯಕ್ಷೆ ಬಿ.ಕೆ. ಇಮ್ತಿಯಾಜ್, ಕೋಟಿಗಟ್ಲೆ ರೂಪಾಯಿ ಸ್ಮಾರ್ಟ್ ಸಿಟಿಕ್ ಬತ್ತ್ಂಡಲಾ, ಪೇಂಟೆಗ್ ಪೊಗ್ಗುನ ರೋಡ್ನೇ ನನಲಾ ಸಮ ಮಲ್ದಿಜೆರ್. ಈ ಗುಂಡಿ ಗುರುಂಪುಲೆರ್ದಾವರ ದಿನೋಲಾ ಎಡ್ತೆಲು ಆವೊಂದುಲ್ಲ , ಜೂವೊಲು ಪೋವೊಂದುಲ್ಲ. ಉಂದೆಕ್ ಮಾತಾ ಪಾಲಿಕೆನೇ ಜವಾಬ್ದಾರಿ ಪನ್ದ್ ಪನ್ಡೆರ್.