Last updated on August 2nd, 2025 at 11:54 am
ಬೊಲ್ತೇರ್, ಆ. 2: ಗೇರುಕಟ್ಟೆ ಕೈತಲ್ದ ಸಿಲ್ಕ್ರೋಡ್ದ ಪೆಟ್ರೋಲ್ ಬಂಕ್ಡ್ ಪೆಟ್ರೋಲ್, ಡೀಸೆಲ್ ಪಾಡ್ದಿನ ಗಾಡಿಲು ಅರ್ದೊಡೇ ಉಂತೊಂದುಲ್ಲ. ಮುಲ್ಪದ ಪೆಟ್ರೋಲಿಯಂ ಸಮ ಇಜ್ಜಿ. ದಾದನೋ ಬೆರಕೆ ಆತ್ಂಡ್ ಪನ್ದ್ ಆರೋಪ ಮಲ್ತ್ದ್ ರಿಕ್ಷಾ ಡ್ರೈವರ್ನಕುಲು ಪೋಲೀಸರೆಡ ಕೋಡೆ ಆ. 1ತಾನಿ ಒಯಿಲ್ ಬರೆಪಾದೆರ್
ಗಾಡಿಡ್ ದಾಲ ತೊಂದರೆ ಇಪ್ಪು ಪನ್ದ್ ಗ್ಯಾರೇಜ್ಡ್ ತೂಪಾದ್ ಕುಡ ಪೆಟ್ರೋಲ್ ದಿಂಜಾದ್ ಗೆಡಪುನಗ ಗಾಡಿಡ್ ಪಿರ ಬರೊಂದುಂಡು. ಅಂಚ ಟ್ಯಾಂಕ್ ಪರಿಶೀಲನೆ ಮಲ್ಪುನಗ ಬೆರಕೆದ ವಿಷಯ ತೆರಿದ್ ಬೈದ್ಂಡ್. ನೂದೆರ್ದ್ ಎಚ್ಚ ಜನ ಡ್ರೈವರ್ನಕುಲು, ಗಾಡಿಲೆನ ದನಿಕುಲು ಬಂಕ್ದ ಎದುರು ಸೇರ್ದ್ ಬಂಕ್ದ ದನಿನ್ ಪ್ರಶ್ನೆ ಮಲ್ತ್ದೆರ್. ಇಂಧನೊಗು ಬೆರಕೆ ಆತಂಡ್ ಪನ್ದ್ ಪನ್ತೆರ್. ಅವೆರ್ದ್ ಬೊಕ್ಕ ಜಾಗೆಗ್ ಪೊಲೀಸೆರ್ಲಾ ಬೈದೆರ್.
ಡೀಸೆಲ್, ಪೆಟ್ರೋಲ್ ಪರೀಕ್ಷೆ ಮಲ್ಪೆರ ಎಂಆರ್ಪಿಎಲ್ ಚೀಫ್ ರೀಜನಲ್ ಮ್ಯಾನೇಜರ್ ಅರವಿಂದ್ ಬೊಕ್ಕ ಸೇಲ್ಸ್ ಮ್ಯಾನೇಜರ್ ಮಹೇಶ್ ಗೇರುಕಟ್ಟೆ ರೇಷ್ಮೆ ರೋಡ್ ಬಂಕ್ಗ್ ಬತ್ತ್ದ್ ಪರೀಕ್ಷೆ ಮಲ್ಪುನಗ ನಾಲ್ ದಿನೊಕು ದುಂಬುದ ಡೀಸೆಲ್, ಪೆಟ್ರೋಲ್ ಸಮ ಇಜ್ಜಂಡ್ ಅಂಚೆನೇ ಜು. 30ರ್ದ್ ಬೊಕ್ಕದ ಪೆಟ್ರೋಲ್, ಡೀಸೆಲ್ ಸಮ ಉಂಡು ಪನ್ದ್ ತೆರಿಪಾದೆರ್. ಗಾಡಿದಕ್ಲೆಗ್ ಆತಿನ ಸಮಸ್ಯೆಲೆಗ್ ಪಿರಿಕಟ್ಟ್ ಮಲ್ಪುವ ಪನ್ದ್ ಸಂಸ್ಥೆದ ಮಾಲಕೆ ಸತ್ಯಪ್ರಸಾದ್ ಜೈನ್ ಪಾತೆರ ಕೊರ್ತೆರ್.