Last updated on August 10th, 2025 at 11:29 am
ಪುತ್ತೂರು: ಕೆದಿಲ ಗ್ರಾಮೊದ ಕಾಂತುಕೋಡಿ ತೋಡುಡು ಪೊಂಜೊವುನ ಪುನ ತಿಕ್ಕಿನಾನಿರ್ದ್ ನಾಪತ್ತೆ ಆದಿತ್ತಿನ ಆ ಪೊಂಜೊವುನ ಬಾವೆ ಇನಿ ಆಗಸ್ಟ್ 10 ತ ಐತಾರ ಕಾಂಡೆ ಇಲ್ಲಜಾಲ್ಡ್ ಪ್ರತ್ಯಕ್ಷ ಆತೆರ್. 4 ದಿನೊರ್ದು ತೋಜಂದೆ ಆದಿತ್ತಿನ ಬಾವೆ ಕಡೇಕ್ಲ ಬತ್ತ್ದೆರ್.
ಕೆದಿಲ ಉಲಕುಮೇರಿ ನಿವಾಸಿ ಗಣಪತಿ ಯಾನೆ ರಾಮಣ್ಣ ಗೌಡ್ರೆನ ಬೊಡೆದಿ ಮಮತಾ ಪನ್ಪಿನಾರೆನ ಪುನ ಆ.6 ತಾನಿ ಕೆದಿಲ ಗ್ರಾಮೊದ ಕಾಂತುಕೋಡಿಡ್ ತೋಡುಡು ತಿಕ್ಕ್ದಿತ್ತ್ಂಡ್. ಅವ್ವೇ ದಿನೊರ್ದು ರಾಮಣ್ಣ ಗೌಡ್ರೆನ ಪಲಯೆ ಸುಂದರೆ ಯಾನೆ ಲೋಕಯ್ಯ ಗೌಡೆರ್ ನಾಪತ್ತೆ ಆದಿತ್ತೆರ್. ಮಮತಾನ ಸಾವುದ ಬಗೆಟ್ ಡೌಟ್ ಬತ್ತ್ದ್ ಲೋಕಯ್ಯೆ ಯಾನೆ ಸುಂದರೆ ಕೆರ್ದಿಪ್ಪೆ ಪನ್ದ್ ಆರೋಪ ಮಲ್ತ್ದ್ ಮಮತಾನ ಕಂಡನೆ ಗಣಪತಿ ಯಾನೆ ರಾಮಣ್ಣ ಗೌಡೆರ್ ಪೊಲೀಸೆರೆಡ ಒಯಿಲ್ ಬರೆಪಾದಿತ್ತೆರ್.
ಈ ಬಗೆಟ್ ಪೊಲೀಸೆರ್ ಪ್ರಕರಣ ದಾಕಲ್ತೊಂದು ಆರೋಪಿನ್ ಪತ್ಯೆರ ಕೆದಿಲದ ಸುತ್ತಮುತ್ತ ಕಾಡ್ಡ್ ನಾಡ್ಯೆರ ಸುರು ಮಲ್ತಿತ್ತೆರ್. ಆಂಡ ಲೋಕಯ್ಯ ಗೌಡೆರ್ ತಿಕ್ಕ್ದಿಜ್ಜಂಡ್. ಇನಿ ಆ.10 ತ ಕಾಂಡೆ ಲೋಕಯ್ಯ ಗೌಡೆರ್ ತನ್ನ ಇಲ್ಲದ ಎದುರು ಪ್ರತ್ಯಕ್ಷ ಆತೆರ್. ಆರೆನ್ ತೂದು ಇಲ್ಲದಕುಲು ಪತ್ತ್ರ್ದ್ ದೀದ್ ಮಮತಾನ್ ಕೆರ್ತಿನ ಬಗೆಟ್ ವಿಚಾರಣೆ ಮಲ್ತ್ದೆರ್. ಈ ಬಗೆಟ್ ಪೊಲೀಸೆರೆಗ್ ಒಲವು ಕೊರ್ದಿತ್ತ್ದ್ ಪೊಲೀಸೆರ್ ಜಾಗೆಗ್ ಬತ್ತ್ದೆರ್ ಪನ್ದ್ ತೆರಿದ್ ಬೈದ್ಂಡ್.