Last updated on August 12th, 2025 at 09:32 am
ಕುಂದಾಪುರ, ಆ. 11: ಕರ್ನಾಟಕ ಸರ್ಕಾರ ಉಂಡು ಮಲ್ದಿನ ಎಸ್ಐಟಿ ಧರ್ಮಸ್ಥಳದ ಮಂಜುನಾಥನ, ಅಣ್ಣಪ್ಪ ಸ್ವಾಮಿನ ಅತ್ತ್ಂಡ ಧರ್ಮಸ್ಥಳ ಕ್ಷೇತ್ರೊದ ವಿರುದ್ಧ ಮಲ್ಪುನ ಜಡ್ತೆಗ್ ಅತ್ತ್ ಪನ್ದ್ ಒಡಿಪು ಜಿಲ್ಲಾ ಕಾಂಗ್ರೆಸ್ದ ಪಿರ ಒರಿದಿನ ವರ್ಗೊಲೆನ ಸಂಘಟನೆದ ಉಪಾಧ್ಯಕ್ಷೆ ನಾಗೇಂದ್ರ ಪುತ್ರನ್ ಪನ್ತೆರ್.
ಮಾಧ್ಯಮೊಲೆನ ಒಟ್ಟುಗು ಪಾತೆರ್ನ ಆರ್, ಕರ್ನಾಟಕೊದ ಕಾಂಗ್ರೆಸ್ ಸರ್ಕಾರ ಕೋಂಟುಗು ಸೇರ್ದಿನಕ್ಲೆನ, ಶೋಷಣೆ ಆತಿನಕ್ಲೆನ ಪರವಾದ್ ಉಂಡು. ಆತೇ ಅತ್ತಂದೆ ಮಾತಾ ಧರ್ಮೊಲೆನ್ಲಾ ಸಮಾನ ಆದ್ ತೂಪುನ ಪಕ್ಷ ಆದುಂಡು. ಆ ನೆವನೊಗೆ ಧರ್ಮಸ್ಥಳಡ್ ಅತ್ಯಾಚಾರ ಮಲ್ತ್ದ್ ಕೆರ್ತಿನ ಆರೋಪಡ್ ಪ್ರಕರಣೊಲೆಗ್ ಸಂಬಂಧಿತ್ದ್ ನಿಷ್ಪಕ್ಷಪಾತದ ಜಡ್ತೆಗ್ ಕಾಂಗ್ರೆಸ್ ಸರ್ಕಾರ ಎಸ್ಐಟಿ ಉಂಡು ಮಲ್ದ್ಂಡ್. ಉಂದು ಒವ್ವೇ ನರಮಾನಿ, ಧರ್ಮ ಅತ್ತ್ಂಡ ನಂಬೊಲಿಗೆಲೆನ ವಿರುದ್ಧ ಅತ್ತ್ ಪನ್ದ್ ಸ್ಪಷ್ಟ ಮಲ್ತ್ದೆರ್.
ಮುಲ್ಪದ ಬಿಜೆಪಿ ಶಾಸಕೆರೆನ ಬಗೆಟ್ ಪಾತೆರ್ನ ನಾಗೇಂದ್ರ ಪುತ್ರನ್, ಕಾರ್ಲದ ಶಾಸಕೆ ಸುನಿಲ್ ಕುಮಾರ್ ಧರ್ಮ ಜಾಗೃತಿದ ಬಗೆಟ್ ಎಂಕ್ಲೆಗ್ ಪಾಠ ಮಲ್ಪೊಡೂಂದು ಇಜ್ಜಿ. ಸುರುಕು ಆರ್ ಕಾರ್ಲದ ಪರಶುರಾಮ ಥೀಂ ಪಾರ್ಕ್ನ್ ಒರ ತೂವಡ್. ಎಂಕ್ಲ ದುಂಬುರ್ದೇ ಸುಬ್ರಹ್ಮಣ್ಯ, ಧರ್ಮಸ್ಥಳ ಕ್ಷೇತ್ರೊಲೆನ್ ನಂಬೊಂದು ಬತ್ತ್ದ. ಎಂಕ್ಲೆಗ್ ಧರ್ಮ, ದೇವೆರ್ ಬೊಕ್ಕ ಶ್ರದ್ಧಾ ಕೇಂದ್ರೊಲೆನ ಬಗೆಟ್ ಬಿಜೆಪಿದಕ್ಲು ಪಾಠ ಮಲ್ಪುನ ಅಗತ್ಯ ಇಜ್ಜಿ ಪನ್ದ್ ಪನ್ಡೆರ್.