Last updated on August 13th, 2025 at 06:43 pm
ಬೊಲ್ತೇರ್, ಆ. 13: ಧರ್ಮಸ್ಥಳಡ್ ಪುನ ಕೌಂತಿನ ಪ್ರಕರಣೊಗು ಸಂಬಂಧಿತ್ದ್ ಎಸ್ಐಟಿ ಜಡ್ತೆ ನಡತೊಂದುಪ್ಪುನ ನಡುಟೇ ಇತ್ತೆ ಕುಡ ಇರ್ವೆರ್ ಬೊಲ್ತೇರ್ ಎಸ್ಐಟಿ ಕಚೇರಿಡ್ ಪುನ ಕೌಂತಿನೆನ್ ತೂತ ಪನ್ದ್ ಒಯಿಲ್ ಕೊರ್ತೆರ್.
ಪುರಂದರ ಗೌಡ ಬೊಕ್ಕ ತುಕಾರಾಮ್ ಗೌಡ ಪನ್ಪಿನ ಇರ್ವೆರ್ ಬೊಲ್ತೇರ್ ಎಸ್ಐಟಿಗ್ ಬತ್ತಿತ್ತೆರ್. ಆಗಸ್ಟ್ 6 ತಾನಿ ಒಯಿಲ್ ಬರೆಪಾಯೆರ ಬತ್ತಿಪ್ಪುನಗ, ಧರ್ಮಸ್ಥಳ ಸ್ಟೇಶನ್ಡ್ ಒಯಿಲ್ ಬರೆಪಾಯೆರ ಎಸ್ಐಟಿ ಅಧಿಕಾರಿಲು ಪನ್ತೆರ್. ಅಂಚ ಆಗಸ್ಟ್ 8ದಾನಿ ಒಯಿಲ್ ಬರೆಪಾಂಡಲಾ ಜಡ್ತೆಗ್ ಲೆತ್ತ್ದಿಜೆರ್ ಪನ್ದ್ ಅಕುಲೇ ಬತ್ತ್ದ್ ಎಸ್ಐಟಿ ಅಧಿಕಾರಿಲೆನ್ ಭೇಟಿ ಆತೆರ್. ಒಯಿಲ್ ಬರೆಪಾಯಿನಕ್ಲೆಟ್ ಒರಿ ನೇತ್ರಾವತಿಡ್ 40 ವರ್ಸೊರ್ದಿಂಚಿ ಅಂಗಡಿ ನಡಪಾವೊಂದು ಬೈದೆ. 2017 ಮುಟ್ಟ ಅಂಗಡಿಡ್ ಇತ್ತೆ. ಆ ಜಾಗೆಡ್ ಪುನ ಕೌಂಪುನೆನ್ ಯಾನ್ ತೂತೆ. ಅಲ್ಪ ಬೇಲೆಗ್ ಇತ್ತಿನಕುಲು, ಕಜವು ಅಡಿಪುನಕುಲು ಪುನ ಕೌಂತೊಂದಿತ್ತೆರ್. ಐಟ್ ಭೀಮೆ ಪನ್ಪಿನ ಆಂಜೊವುನ ಲೆಕ ತೋಜುನಾಯನ್ಲಾ ಯಾನ್ ತೂತೆ. ಅಂಚಿನನೇ ಮೈಕಟ್ಟ್ ಇತ್ತಿನ ಆಂಜೊವುಗ್ಲಾ, ಇತ್ತೆ ಯಾನ್ ಕೌಂತ್ದೆ ಪನ್ದ್ ಪನೊಂದುಪ್ಪುನ ಆಂಜೊವುಗ್ಲಾ ಸಾಮ್ಯತೆ ಉಂಡು” ಪನ್ದ್ ಪನ್ತೆರ್.
ಅಂಗಡಿಡ್ ಇಪ್ಪುನಗ , ದೂರುದಾರೆ ತೋಜಾದಿನ ಒಂಜನೇ ನಂಬರ್ದ ಜಾಗೆಡ್ ಪುನ ಕೌಂತಿನೆನ್ ಯಾನ್ ತೂತೆ. ಕೆಲ ಪುನೊಕುಲು ಅಂಬಾಸಿಡರ್ ಗಾಡಿಡ್ ಬರೊಂದಿತ್ತ. ಐತ ಡಿಕ್ಕಿ ದೆತ್ತ್ದ್ ಪುನ ಪಿದಯಿ ದೆತ್ತೊಂದಿತ್ತೆರ್. ಅಲ್ಪ ಒಂಜಿ ಪರಿಶೀಲನೆ ಕಚೇರಿ ಇತ್ತ್ಂಡ್. ಐತ ಪಿರವುಡು ಪುನ ದೆಪ್ಪೆದೆರ್ ಪನ್ದ್ ಪನ್ತೆರ್, ಪುನ ಕೌಂಪೆರ 2-3 ಜನ ಇಪ್ಪೆದೆರ್. ಪೊಲೀಸ್ ಇತ್ತಿನೆನ್ ಯಾನ್ ತೂತುಜಿ, ಡಾಕ್ಟರ್ಕಕುಲುಲಾ ಇಜ್ಜಂಡ್. 13 ನೇ ಜಾಗೆಡ್ ಪುನ ಕೌಂತಿನೆನ್ ಯಾನೇ ತೂತೆ. ಬಯ್ಯ 5 ಗಂಟೆದ ಅಂದಾಜಿಗ್ ಒರಿಯೇ ಕೌಂಪುನೆನ್ ಯಾನ್ ತೂತೆ. ಎನ್ನ ಅಂಗಡಿದ ಪಿರವುಡೇ ಈ ಜಾಗೆ ಇಪ್ಪುನು. ಐತ ಮಿತ್ತ ಮೆಯಿಟ್ ಒಂಜಿ ಟಾಯ್ಲೆಟ್ಲಾ ದುಂಬು ಇತ್ತ್ಂಡ್ . ಕುಡೊಂಜಿ ದಿನ ಕೈಗಾಡಿದ ಲೆಕಂದಿನೆಟ್ ಪುನ ಜೆಪ್ಪುಡಾದಿತ್ತೆರ್. ಒರಿ ಗುಂಡಿ ಒಕ್ಕೊಂದಿತ್ತೆ. ಅವೆನೇ ಪನ್ಯೆರ ಆಜನೇ ತಾರೀಕ್ಗೇ ಬತ್ತಿತ್ತೆ. ಧರ್ಮಸ್ಥಳ ಸ್ಟೇಶನ್ಡ್ ಒಯಿಲ್ ಬರೆಪಾಯೆರ ಪನ್ತೆರ್. ಆಂಡರೆ ಯಾನ್ ಕೊರ್ನ್ಡ ಒಯಿಲ್ ಗೆತೊನುಜೆರ್. ಒಂಜಿ ಪೋಸ್ಟ್ಸ್ಕ್ರಿಪ್ಟ್ ಓಲೆ ಕೊರ್ಲೆ ಪನ್ದಿತ್ತೆ, ಅವೆನ್ ಕೊರ್ತೆರ್. ಬೊಕ್ಕ 8 ನೇ ತಾರೀಕ್ಗ್ ಕೊರ್ತ. ಎಂಕ್ಲೆನ್ ಜಡ್ತೆಗ್ ಲೆತ್ತ್ದಿಜೆರ್ ಪನ್ದ್ ಎಂಕ್ಲನೇ ಬತ್ತ್ದ. ಕಂಡ್ದ್ ಕೌಂಪುನ ಲೆಕನೆ ಇತ್ತ್ಂಡ್. ಸುರುಕು ಆ ಜಾಗೆ ಕಾಡ್ದ ಲೆಕ ಇತ್ತ್ಂಡ್. ಇತ್ತೆ ಬುಲೆಚ್ಚಿಲ್ ಆತ್ಂಡ್.
ಕುಡೊರಿ ದೂರುದಾರೆ ತುಕರಾಮೆರ್ ಯಾನ್ ತೂತಿನವು ಬೇತೆ. ಎಸ್ಐಟಿ ದಕ್ಲೆಡ ಪಾತೆರ್ಬೆ. ಐರ್ದ್ ಬೊಕ್ಕ ಪನ್ಪೆ. ಎಂಕ್ಲ ತೂತಿನ ಬೇತೆ, ವಾ ಪುನ ಪನ್ದ್ ಇತ್ತೆ ಪನ್ಪುಜಿ. ಎಂಕ್ಲು ಪುಟ್ಟುದಿನೇ ಧರ್ಮಸ್ಥಳಡ್ ಪನ್ದ್ ತುಕಾರಾಮ ಗೌಡೆರ್ ಪನ್ತೆರ್.