Last updated on August 20th, 2025 at 08:35 am
ಬೆಂಗಳೂರು, ಆ. 20: ಕರಿನ ಐನ್ ವರ್ಸೊಡು ಕರ್ನಾಟಕ ರಾಜ್ಯೊಡೊರ್ಮೆ 14 ಸಾರೊರ್ದು ಎಚ್ಚ ಜೋಕುಲು ನಾಪತ್ತೆ/ಕಿಡ್ನಾಪ್ ಆದಿತ್ತ್ದ್, ಉಂದೆಟ್ 1,336 ಜೋಕುಲೆನ ಬಗೆಟ್ ನನಲಾ ದಾಲ ತೆರಿದಿಜಿ. ಈ ವಿಚಾರೊನು ಗೃಹಸಚಿವೆ ಜಿ.ಪರಮೇಶ್ವರೆರೇ ಅಂಗಾರೆ ವಿಧಾನಪರಿಷತ್ಡ್ ತೆರಿಪಾದೆರ್. ಕಿಡ್ನಾಪ್ ಬೊಕ್ಕ ನಾಪತ್ತೆ ಆತಿನಕಲೆನೆಟ್ ಪೊಣ್ಣು ಜೋಕುಲೇ ಎಚ್ಚ. ಜೋಕುಲು ತೋಜಂದೆ ಆತಿನ ಲೆಕ್ಕಾಚಾರೊದ ಪಟ್ಟಿಡ್ ಬೆಂಗಳೂರು ಪೇಂಟೆಗ್ ಕಡೀರ ತಾನ ಪನ್ದ್ ಆರ್ ಒಲವು ಕೊರ್ತೆರ್.
ರಾಜ್ಯೊಡು ಜೋಕುಲೆನ ಕಿಡ್ನಾಪ್ ವರ್ಸೊರ್ದು ವರ್ಸೊಗು ಎಚ್ಚನೇ ಆವೊಂದುಂಡು. ಈ ವರ್ಸ ಜುಲೈ ಅಕೇರಿಗ್ 2,170 ಜೋಕುಲು ನಾಪತ್ತೆ ಆತೆರ್. ಐಟ್ಲಾ ಕಿಡ್ನಾಪ್ ಆತಿನೆಟ್ ಪೊಣ್ಣು ಜೋಕುಲೇ ಎಚ್ಚ ಇಪ್ಪುನವು ಪೋಡಿಗೆದ ವಿಷಯ.
ಜೋಕುಲು ನಾಪತ್ತೆ ಆತಿನೆತ ಅಂಕೆಅಂಶೊ: 2020ರ್ದ್ ಇದಮುಟ್ಟ ರಾಜ್ಯೊಡು 14,878 ಜೋಕುಲೆನ ನಾಪತ್ತೆ ಪ್ರಕರಣ ದಾಕಲಾದಿತ್ತ್ದ್, ಉಂದೆಟ್ 13,542 ಪ್ರಕರಣೊಲೆಡ್ ಜೋಕುಲು ಅಪ್ಪೆಅಮ್ಮನ ಮಟ್ಟೆಲ್ಗ್ ಪಿರ ಸೇರ್ದೆರ್. ಬಾಕಿ 1,336 ಜೋಕುಲೆಗ್ ದಾದ ಆತ್ಂಡ್ ಪನ್ದ್ ನನಲಾ ತೆರಿದ್ ಬೈದಿಜಿ. ಕಿಡ್ನಾಪ್ ಆತಿನ 10,792 ಪೊಣ್ಣು ಜೋಕುಲೆಡ್ 1,003 ಜೋಕುಲು ತಿಕ್ಕ್ದಿಜೆರ್. 4,086 ಆಣ್ ಜೋಕುಲೆಡ್ 333 ಜೋಕುಲು ತಿಕ್ಕ್ದಿಜೆರ್. ಕಿಡ್ನಾಪ್ ಪ್ರಕರಣೊಡು ಐನ್ ವರ್ಸೊಡು 634 ಕಿಡ್ನಾಪರ್ನಕ್ಲೆನ್ ಕೈದ್ ಮಲ್ದ್ಂಡ್ ಪನ್ದ್ ಗೃಹ ಸಚಿವೆ ಪರಮೇಶ್ವರ್ ತೆರಿಪಾದೆರ್.
ಜೋಕುಲು ನಾಪತ್ತೆ ಆಯೆರ ನೆವನೊಲು ದಾದ?
ಬಾಲ ಕಾರ್ಮಿಕೆರಾದ್ ಬೆನ್ಪಾಯೆರ ಜೋಕುಲೆನ್ ಕನ್ಡ್ದ್ ಕೊನೊಪೆರ್. ಕಾಸ್ದಾಸೆ ತೋಜಾದ್ ಮೆಯಿ ಮಾರೊನುನ ಬೇಲೆಗ್ ಕುಲ್ಲಾವುನ, ಸೋಷಿಯಲ್ ಮೀಡಿಯಾ ಪ್ರಭಾವೊಡು ಲವ್-ಮೋಕೆ ಆದ್ ಬಲಿಪುನ, ಅಂಗಾಂಗ ಮಾರುನ ದಂಧೆ, ನಟ್ಟಾಯೆರೆ ಜೋಕುಲೆನ್ ಕಿಡ್ನಾಪ್ ಮಲ್ಪುವೆರ್ ಪನ್ದ್ ತೆರಿದ್ ಬೈದ್ಂಡ್.
ಒಟ್ಟಾರೆ ಕರ್ನಾಟಕ ರಾಜ್ಯೊಡು ಜೋಕುಲೆನ ನಾಪತ್ತೆ ಕೇಸ್ ದಿನೊರ್ದು ದಿನೊಕು ಎಚ್ಚ ಆವೊಂದುಂಡು. ಸರ್ಕಾರ ಉಂದೆನ್ ಗಾತಿಡ್ ಗೆತೊನೊಡು, ಅಂಚೆನೆ ಅಪ್ಪೆಅಮ್ಮೆಲಾ ಜಾಗ್ರ್ತೆಡ್ ಇಪ್ಪೊಡು.
ಜೋಕುಲೆನ ನಾಪತ್ತೆ ಪ್ರಕರಣೊಡು ವಾ ಜಿಲ್ಲೆಗ್ ವಾ ತಾನ?
1. ಬೆಂಗಳೂರು
2. ದಾವಣಗೆರೆ
3. ಒಡಿಪು
4. ಮಂಗಳೂರು ಜಿಲ್ಲೆ
5. ಹಾವೇರಿ
6. ಚಿತ್ರದುರ್ಗ
7. ತುಮಕೂರು
8. ಮೈಸೂರು